އިންޑިޔާގެ އެންމެ ވައި ނުސާފު ސިޓީއަކަށް މުމްބާއީ

އިންޑިޔާގެ އެންމެ ވައި ނުސާފު ސިޓީއެއްގެ ގޮތުގައި ވެރިރަށް ޑެލްހީ އޮތް އޮތުން ބަދަލުވެ, މިވަގުތު އެންމެ ވައިނުސާފު ސިޓީއަކީ މުމްބާއީކަމަށް ރިކޯޑްތަކުން ދައްކައިފިއެވެ. ސްވިސް އެއަރޓްރެކިންގ އިންޑެކްސް "އައިކިކު އެއަރ" ދައްކާގޮތުން، ޖެނުއަރީ 29ން ފެބްރުއަރީ 8އަށް ހިނގި މުއްދަތުގައި އެންމެ ވައި ނުސާފު ތަންތަނުގެ ލިސްޓުގައި މުމްބާއީ ހިމެނުނުއިރު، ޑެލްހީ އެލިސްޓްގައި އެފަހަރު ހިމެނިފައެއް ނުވެއެވެ.

ފެބްރުއަރީ ދެވަނަ ދުވަހު މުމްބާއީ ލިސްޓުގެ އެންމެ ކުރިއަށްވެސް އަރާފައިވެއެވެ. އެއަށްފަހު ޖެހިގެން އައި ދުވަސްތަކުގައި ލިސްޓުގެ އެހެން ވަނަތަކަށް ދިއުމަށްފަހު، ފެބްރުއަރީ 8 ވަނަ ދުވަހު އަނެއްކާ ލިސްޓުގެ ދެވަނައަށް އަރާފައިވެއެވެ. އަދި ފެބްރުއަރީ ތޭރަވަނަ ދުވަހުގެ ރެކޯޑްތައް ދައްކާގޮތުން، ވައި ނުސާފުވުމުގެ ސަބަބުން ސިއްހީގޮތުން އެންމެ ރައްކާތެރިނޫން ސިޓީތަކުގެ ތެރޭގައި މުމްބާއީ ވަނީ ހިމެނިފައެވެ.

ސްވިސް އެއަރޓްރެކިންގ އިންޑެކްސް "އައިކިކު އެއަރ"އަކީ ވައިގެ ކޮލިޓީ ދެނެގަތުމަށްޓަކައި ޔުނެޕް އަދި ގްރީންޕީސްއާ ގުޅިގެން ގާއިމްކޮށްފައިވާ މިންގަނޑެކެވެ. މީގައި ބޭނުންކުރެވެނީ ސެންޓްރަލް ޕޮލިއުޝަން ކޮންޓްރޯލް ބޯޑުން ފޯރުކޮށްދޭ ޑޭޓާއެވެ. މި ޓެސްޓުތަކުން ވައި ތިން ބަޔަކަށް ކެޓަގަރައިޒް ކުރެއެވެ. އެއީ ސިއްހީގޮތުން ރައްކާތެރި، ރައްކާތެރި ނޫން އަދި ގެއްލުންވާވަރަށް ގޯސް، މި ތިން ކެޓަގަރީއެވެ.

ސެންޓްރަލް ޕޮލިއުޝަން ކޮންޓްރޯލް ބޯޑުގެ ޑޭޓާ ދައްކާގޮތުން މިފަހަރުގެ ފިނި މޫސުމުގައި (ނޮވެމްބަރުން ޖަނަވަރީއަށް) ކުރީ ތިން އަހަރަށްވުރެ ދެގުނައަށް މުމްބާއީގެ ވައި ތަޣައްޔަރުވެފައިވެއެވެ. މުމްބާއީގެ ވައި މިހާބޮޑަށް ތަޣައްޔަރުވާން ދިމާވެފައިވަނީ ކޮންޓްރަކްޝަން ސައިޓްތަކުން އަރާ ކުނޑިއާއި އަދި ވެހިކަލްތަކުން ދޫކުރާ ދުމުގެ ސަބަބުންނެވެ. ވައި ނުސާފުކަމުގެ 71 އިންސައްތައަކީ މި ދެ ބާވަތުގެ ދުމާއި ކުނޑިކަމަށްވެއެވެ. މީގެއިތުރުން، ފެކްޓަރީތަކާއި އިންޖީނުގެތައް، އެއާޕޯޓްތައް އަދި ކުނިއަޅާ ޑަމްޕްތަކުގައި އަމަލުތައް ހުންނަ ގޮތުންވެސް ވައި ތަޣައްޔަރުވުމަށް މެދުވެރިވެއެވެ.

ދުނިޔޭގައި މިވަގުތު ވައި އެންމެ ނުސާފުކަމަށް ފާހަގަކުރެވޭ ތަންތަނަކީ:

1- ލާހޫރު (ޕާކިސްތާން)

2- މުމްބާއީ (އިންޑިޔާ) 

3- ކާބުލް (އަފްޣާނިސްތާން)

4- ކައޮޝިއުންގ (ޓައިވާން)

5- ބިޝްކެކް (ކިރްގިސްތާން)  

6- އަކްރާ (ގާނާ)

7- ކްރާކޮވް (ޕޯލަންޑް)

8- ދޯހާ (ގަތަރު)

9 އަސްތާނާ (ކަޒަކްސްތާން)

10) ސެންޓިއާގޯ( ޗިލީ)

މައުލޫމާތު: ވިއޯން