އެސްޓީއޯއިން ހުޅުމާލޭ ދެވަނަ ފިޔަވަހީގައި ޝޮޕިން މޯލެއް އަޅަނީ
ހުޅުމާލޭގައި އެސްޓީއޯއިން ހިންގާ ފިހާރަ އަޕްގްރޭޑްކޮށް ކޭޝިއާ ލެސް ފިހާރައެއް ގޮތުގައި ހުޅުވަން ވެސް ވަނީ ނިންމާފައި
ހިޔާ ފްލެޓް ސަރަހައްދު
އެސްޓީއޯއިން ހުޅުމާލޭ ދެވަނަ ފިޔަވަހީގައި ޝޮޕިން މޯލެއް އަޅަން ނިންމައިފިއެވެެ.
ހުޅުމާލޭ ދެވަނަ ފިޔަވަހީގައި މީހުން ދިރިއުޅެން ފެށިތާ އަހަރަކަށްވުރެ ގިނަ ދުވަސްވެފައިވާއިރު އެ ތަނުގައި ދިރިއުޅޭ ގިނަ ބައެއްގެ ޝަކުވާއަކީ އެއް ތަނަކުން ހުރިހާ އެއްޗެއް ލިބޭނޭ ފިހާރައެއް ނުވަތަ މޯލެއް ނެތުމެވެ. އަދި ހެޔޮއަގުގައި މުދާ ލިބޭ ފިހާރަތައް ނެތުމަކީ ވެސް އެ މީހުންގެ ކަންބޮޑުވުމެކެވެ.
ދެވަނަ ފިޔަވަހީގައި ދިރިއުޅޭ ބައެއް މީހުން އެކަމުގެ ކަންބޮޑުވުން ސޯޝަލް މީޑިއާގައި ވެސް ފާޅުކުރަމުން އަންނައިރު ހޯމަ ދުވަހު މީހަކު ވަނީ އެސްޓީއޯގެ މެނޭޖިން ޑިރެކްޓަރު ހުސައިން އަމްރު ޓްވީޓާގައި ޓެގްކޮށް އެ ކަމުގެ ކަންބޮޑުވުންތައް ލިޔެފައެވެ. އެ ޓްވީޓަށް ޖަވާބުދެއްވަމުން އަމްރު ވިދާޅުވީ ތައްޔާރުވަމުން މިދަނީ ހުޅުމާލޭ ފޭސް 2 ގައި ޝޮޕިން މޯލެއް އަޅަން ކަމަށެވެ. އެހެން ވިދާޅުވެ އެކަމުގެ އިތުރު ތަފްސީލެއް އަމްރު ނުދެއްވައެވެ.
އެކަމާ ގުޅިގެން އެސްޓީއޯގެ މީޑިއާ އޮފިޝަލަކާ ސުވާލުކުރުމުން ވިދާޅުވީ ހުޅުމާލޭ ފޭސް 2ގައި މޯލް އެޅުމަށް ވަރަށް އަވަހަށް އެޗްޑީސީ އާއި އެސްޓީއޯއާ ދެމެދު އެއްބަސްވުމެއްގައި ސޮއިކުރާނެ ކަމަށެވެ. އަދި ސޮއިކުރުމަށްފަހު މި ޕްރޮޖެކްޓުގެ އިތުރު ތަފްސީލުތައް ހާމަކުރަމުން ގެންދާނެ ކަމަށް ވެސް އޭނާ ވިދާޅުވިއެވެ.
އެސްޓީއޯއިން ވަނީ ހުޅުމާލޭގައި ހުންނަ އެ ކުންފުނީގެ ފިހާރަ ތަރައްގީކޮށް، ކޭޝިއާ ލެސް ފިހާރައެެއްގެ ގޮތުގައި އެ ތަން ހުޅުވަން ވެސް ތައްޔާރުވެފައެވެ. އިއްޔެ އަމްރު ކުރެއްވި ޓްވީޓއްގައި ވިދާޅުވީ މާރިޗު މަހު އެ ފިހާރަ އަޕްގްރޭޑާއެކު ހުޅުވޭނެ ކަމަށެވެ.
