ނިއު ދޫކޮށް ސޮބާ ވިކްޓްރީގެ ކޯޗުކަމާ ހަވާލުވެއްޖެ

ނިއު ރޭޑިއަންޓް ސްޕޯޓްސް ކުލަބް ދޫކޮށް، ސޮބާހް މުޙައްމަދު (ސޮބާ) ވިކްޓްރީ ސްޕޯޓްސް ކުލަބުގެ ކޯޗުކަމާ ހަވާލުވެއްޖެ އެވެ.

ވިކްޓްރީން ވަނީ މިދިޔަ އަހަރު އޮތް އެފްއޭއެމް ދެ ވަނަ ޑިވިޝަންގެ ފުޓުބޯޅަ މުބާރާތުގައި ވެސް ވާދަކޮށްފަ އެވެ. ނަމަވެސް އެ މުބާރާތް ވިކްޓްރީން ނިންމާލަން ޖެހުނީ ގްރޫޕްސް ސްޓޭޖުންނެވެ. ދަރަނިތައް ދެއްކުމަށް ފަހު ވިކްޓްރީން ސަސްޕެންޝަނުން ސަލާމަތްވެ، ދެ ވަނަ ޑިވިޝިންގައި ވާދަކުރީ ބިދޭސީ ކޯޗެއްގެ އިރުޝާދުގެ ދަށުންނެވެ.

ހޯމަ ދުވަހުގެ ރޭ ވިކްޓްރީން ވަނީ އެ ކުލަބުގެ ކޯޗުކަމަށް ސޮބާ ހަމަޖައްސާފައިވާކަން ރަސްމީކޮށް އިއުލާންކޮށްފަ އެވެ. ސޮބާ އަކީ ކުރިން ވިކްޓްރީ އަށް ކުޅެދީ، އެ ކުލަބާއެކު ކާމިޔާބީތަކެއް ހޯދާފައިވާ ކުޅުންތެރިޔެކެވެ. މިއީ ސޮބާ ވިކްޓްރީގެ ކޯޗުކަމާ ހަވާލުވި ފުރަތަމަ ފަހަރެވެ. މީގެ ކުރިން ސޮބާ ވަނީ ފުރަތަމަ ޑިވިޝަންގައި ގިނަ ކުލަބުތަކަށް ވެސް އިރުޝާދު ދީފަ އެވެ. އޭގެ ތެރޭގައި ނިއުގެ އިތުރުން ކުލަބް ގްރީން ސްޓްރީޓްސް އާއި ކުލަބް ވެލެންސިއާ ވެސް ހިމެނެ އެވެ. ވިކްޓްރީން އެ ޓީމުގެ ކޯޗަކަށް ސޮބާ ހަމަޖެއްސީ މިއަހަރުގެ ދެ ވަނަ ޑިވިޝަން ފުޓުބޯޅަ މުބާރާތުގައި ވާދަކޮށް، ފުރަތަމަ ޑިވިޝަނަށް ކޮލިފައިވުމުގެ އަމާޒުގަ އެވެ. މީގެ އިތުރުން އެފްއޭ ކަޕްގައި ވާދަކުރުމަށް ރަނގަޅު ޓީމެއް އެކުލަވާލައި، ކާމިޔާބު މަސައްކަތެއް ކުރުމަށެވެ.