ތުރުކީއަށް އެހީވާން ދިޔަ ދިވެހިން: "އެއީ ބުނެދޭން އުނދަގޫ ޙާލަތެއް، މުޅި ސަރަޙައްދުން ދުވަނީ ކުނި ވަސް"

ފެބްރުއަރީ ހަ ވަނަ ދުވަހު ތުރުކީ އަދި ސީރިޔާއަށް އައި ބާރުގަދަ ބިންހެލުމުގައި އެތައް އިމާރާތެއް ވެއްޓި އެތައް ހާސް ބައެއްގެ ފުރާނަ ގޮސްފައިވާއިރު، ފޫނުބެއްދޭ ވަރުގެ ބޮޑެތި ގެއްލުންތަކެއް މިވަނީ ވެފައެވެ. ބިން ހެލުން އައި ސަރަޙައްދުތަކުން ބަލާލި ކޮންމެ ދިމާއަކުންވެސް ފެންނަމުންދަނީ ވީރާނާކަމާއި ހިތްދަތިކަމެވެ. ބައެއް މަންޒަރުތައް ބަލާލަންވެސް ނުހަނު ހިތްދައްޗެވެ.

މި ހިތާމަވެރި ދަނޑިވަޅުގައި އެ ޤައުމުތަކަށް އެހީވުމަށް އެކި ޤައުމުތަކުން އަތުކުރި އޮޅާލާފައިވާއިރު، އެ ބަޔަކަށް ވީ މިންވަރަކުން ގެންދަނީ އެހީތެރިކަން ފޯރުކޮށްދެމުންނެވެ.

ބޭރުގައި ހާލުގައި ޖެހޭ މީހުންނަށް އެހީވުމަށް ކުރިއަށްގެންދާ އިންޓަނޭޝަނަލް އެއިޑް ކެމްޕެއިން (އައިއޭސީ)އާ ގުޅިގެން އެހީވުމަށް ރާއްޖޭގެ ފަރާތުން ދިޔަ މީހުންގެ ތެރޭގައި ކެމްޕޭނުގެ އިންޓަނޭޝަނަލް ރިލޭޝަންސް ޑައިރެކްޓަރު މުޙައްމަދު އަލީއާއެކު ރާއްޖޭގެ އެތެރެހަށީގެ ޑޮކްޓަރު، ޑރ. މުހައްމަދު އަލީއާއި، އައިއޭސީގެ މީޑިއާ އެންޑް ޕަބްލިކް ރިލޭޝަންސް ޑައިރެކްޓަރ އަޒްހަދުވެސް ހިމެނެއެވެ.

މި ކެމްޕޭނުގެ އިންޓަނޭޝަނަލް ރިލޭޝަންސް ޑައިރެކްޓަރު މުޙައްމަދު އަލީ ވަނީ އެ ފަރާތްތަކުގެ ތަޖުރިބާ ކޮންމެވެސް ވަރަކަށް ރާއްޖެއެމްވީއާ ހިއްސާ ކޮށްދެއްވާފައެވެ.

މި ޓީމަށްވެސް ވަނީ ވެއްޓިފައި ހުރި އިމާރަތްތަކާއި، އެތަނުގައި ދިރިއުޅުނު މީހުންގެ ޙާލަތު ގާތުން ފެނިފައެވެ. މީހުން އެމީހުންގެ އާއިލާ މެންބަރުން ދިރިހުއްޓާ ފެނޭތޯ ރުއި ރުއިމާއި، ކޮޅުކޮޅުމައްޗަށް ޙަރަކާތްތެރިވަމުން ދިޔަ މަންޒަރު ގާތުން ފެނިފައިވެއެވެ.

ބިންހެލުމުގެ އެޕިސެންޓަރުކަމަށްވާ "ކަހްރަމާންމަރަސް" އަށް ޓީމުން ގޮސްފައިވާއިރު، މުޅި ސަރަޙައްދުން ދުވަމުންދަނީ "ކުނި ވަސް" ކަމަށް އެ ފަރާތްތަކުން މައުލޫމާތު ދެއެވެ. އެއީ ބުނެދޭންވެސް ނޭނގޭ ކަހަލަ މަންޒަރުތަކެއްކަމަށް އެ ފަރާތްތަކުން ސިފަކޮށްދެއެވެ.

އޭރުވެސް އާއިލާތަކުގެ މީހުން މަރުވެފައިވާ ހަށިތައް ކައިރީގައި ގޮތް ހުސްވެ، ރޯން ތިބިކަމަށް މުޙައްމަދު އަލީ ރާއްޖެއެމްވީއަށް ކިޔާދިނެވެ.

އެ ނުތަނަވަސްކަމުގެ ތެރޭގައި ދޭތެރެ ދޭތެރެއިން ސަރޗް އެންޑް ރެސްކިއު ޓީމުތަކާއި އާއިލާތަކާއި މެދުގައި ޒުވާބު ކުރުމާއި އަރާރުންވުންވެސް ހިނގާކަމަށް އޭނާ ވިދާޅުވިއެވެ. ވާނީވެސް އެހެންތާއެވެ. ފުނޑުފުނޑުވެފައިވާ ބަރު ގާތަކާއި އިމާރަތްތަކުގެ ދަށުގައި އާއިލާ މީހަކު އޮވެދާނެކަމަށް ހީވާނަމަ، އަޅުގަނޑުމެންގެ ޙާލަތަކީވެސް ހަމަ އެއީކަން ޔަޤީނެވެ.

އޭނާ ކިޔާދެއްވި ގޮތުގައި އެހީވާން ދިޔަ ޓީމުތަކާއި، ސަރޗް އެންޑް ރެސްކިއު ޓީމުތަކާއި، އާންމު ރައްޔިތުންވެސް ތިބީ ނަފްސާނީ ގޮތުން ނުހަނު ބަލިކަށިވެފައެވެ. 5 ދުވަސް ވެގެންދިޔައިރު ގިނަ މީހުން ކާންވެސް ހަނދާނުގައި ނުހުންނަ ފަހަރު ގިނަކަމަށް އޭނާ ވިދާޅުވިއެވެ.

އެ ޓީމުގެ ކުރިމަތިން ދެފޫޓެއްހާ ގާތުންވެސް މަރުވެފައިވާ ހަށިގަނޑެއް ނެރެގެން ގެންދިޔަ މަންޒަރު ވަނީ ފެނިފައެވެ.

އޭނާ ވިދާޅުވި ގޮތުގައި މިހާރު އިންޓަނޭޝަނަލް އެއިޑް ކެމްޕޭނުންވެސް ބޮޑަށް ފޯކަސް ކުރަމުންދަނީ ސަރޗް އެންޑް ރިކަވަރީއަށެވެ.

މި ޙާލަތުގައި ޓީމުން ވަނީ ކޮންމެ ދުވަހަކުވެސް 50،000 މީހުންނަށް ކާބޯތަކެތި ބެހުމުގައި ޙަރަކާތްތެރިވެފައެވެ. އެކަމުގައި ދިވެހިންގެ ހިއްސާވެސް ހިމެނެއެވެ. ދިވެހިންގެ ފަރާތުން ފޮނުވާ އެހީތައް ފޯރުކޮށްދިނުުމުގައި ޓީމުން ވަނީ ކުރީ ސަފުގައި ޙަރަކާތްތެރިވެފައެވެ.

އޭގެ އިތުރުން، ސީރިއާގައި ފިނި މޫސުމުގައި ލާ އަންނައުނާއި، އާއިލާތަކަށް 1 މަސް ދުވަހުގެ ކެއިން ބުއިމުގެ ކަންކަން ހަމަޖެއްސުމާއި، ސާރޗް އެންޑް ރެސްކިއުގައި ބޭނުންކުރާނެ އާލަތްތައް ބެހުމުގައިވެސް ޓީމުން ވަނީ ޙަރަކާތްތެރިވެފައެވެ.

ތުރުކީއަށް ދުނިޔޭގެ އެކި ކަންކޮޅުތަކުން ސަރޗް އެންޑް ރެސްކިއު ޓީމުތައް ގޮސް މަސައްކަތްތައް ކުރަމުންދާކަމަށްވެސް އޭނާ ވިދާޅުވިއެވެ. ނަމަވެސް ސީރިޔާއަށް އަދިވެސް އެކަށީގެންވާ ގޮތެއްގައި އެހީތެރިކަން ނުލިބޭ ކަމަށާއި، އެކަމުގައި ގޮންޖެހުންތައް ހުރިކަމަށް ޓީމުން މައުލޫމާތުދެއެވެ.

އައިއޭސީން މިހާރު ބޮޑަށް މަސައްކަތް ކުރަމުންދަނީ ހާލުގައި ޖެހިފައިވާ ފަރާތްތަކަށް އެމީހުންގެ ދިރިއުޅުން އާރާސްތު ކުރުމަށް އެހީވެދިނުމަށެވެ.

ތުރުކީއާއި ސީރިއާއަށް ދިމާވެފައިމިވާ ކާރިސާގެ ދަނޑިވަޅުގައި ރާއްޖެއިންވެސް ވީ އެންމެ ބޮޑަކަށް އެ ޤައުމުތަކަށް އެހީވުމަށް ދަނީ މަސައްކަތް ކުރަމުންނެވެ.