ކ. މާލެ
|
13 ފެބްރުއަރީ 2023 | ހޯމަ 12:52
ތުރުކީ އަދި ސީރިޔާއަށް އައި ބާރުގަދަ ބިންހެލުމުގައި އެތައް ހާސް ބަޔަކު ވަނީ މަރުވެފައި
ތުރުކީ އަދި ސީރިޔާއަށް އައި ބާރުގަދަ ބިންހެލުމުގައި އެތައް ހާސް ބަޔަކު ވަނީ މަރުވެފައި
ރާއްޖެއެމްވީ
ތުރުކީ-ސީރިޔާ ބިންހެލުން
ތުރުކީއަށް އެހީވާން ދިޔަ ދިވެހިން: "އެއީ ބުނެދޭން އުނދަގޫ ޙާލަތެއް، މުޅި ސަރަޙައްދުން ދުވަނީ ކުނި ވަސް"
 
ޓީމުގެ ކުރިމަތިން ދެފޫޓެއްހާ ގާތުންވެސް މަރުވެފައިވާ ހަށިގަނޑެއް ނެރެގެން ގެންދިޔަ މަންޒަރު ފެނުނު
 
މީހުން އެމީހުންގެ އާއިލާ މެންބަރުން ދިރިހުއްޓާ ފެނޭތޯ ރުއި ރުއިން ފެނިފައިވޭ
 
ޓީމުން ވަނީ ކޮންމެ ދުވަހަކުވެސް 50،000 މީހުންނަށް ކާބޯތަކެތި ބެހުމުގައި ޙަރަކާތްތެރިވެފައި

ފެބްރުއަރީ ހަ ވަނަ ދުވަހު ތުރުކީ އަދި ސީރިޔާއަށް އައި ބާރުގަދަ ބިންހެލުމުގައި އެތައް އިމާރާތެއް ވެއްޓި އެތައް ހާސް ބައެއްގެ ފުރާނަ ގޮސްފައިވާއިރު، ފޫނުބެއްދޭ ވަރުގެ ބޮޑެތި ގެއްލުންތަކެއް މިވަނީ ވެފައެވެ. ބިން ހެލުން އައި ސަރަޙައްދުތަކުން ބަލާލި ކޮންމެ ދިމާއަކުންވެސް ފެންނަމުންދަނީ ވީރާނާކަމާއި ހިތްދަތިކަމެވެ. ބައެއް މަންޒަރުތައް ބަލާލަންވެސް ނުހަނު ހިތްދައްޗެވެ.

މި ހިތާމަވެރި ދަނޑިވަޅުގައި އެ ޤައުމުތަކަށް އެހީވުމަށް އެކި ޤައުމުތަކުން އަތުކުރި އޮޅާލާފައިވާއިރު، އެ ބަޔަކަށް ވީ މިންވަރަކުން ގެންދަނީ އެހީތެރިކަން ފޯރުކޮށްދެމުންނެވެ.

ބޭރުގައި ހާލުގައި ޖެހޭ މީހުންނަށް އެހީވުމަށް ކުރިއަށްގެންދާ އިންޓަނޭޝަނަލް އެއިޑް ކެމްޕެއިން (އައިއޭސީ)އާ ގުޅިގެން އެހީވުމަށް ރާއްޖޭގެ ފަރާތުން ދިޔަ މީހުންގެ ތެރޭގައި ކެމްޕޭނުގެ އިންޓަނޭޝަނަލް ރިލޭޝަންސް ޑައިރެކްޓަރު މުޙައްމަދު އަލީއާއެކު ރާއްޖޭގެ އެތެރެހަށީގެ ޑޮކްޓަރު، ޑރ. މުހައްމަދު އަލީއާއި، އައިއޭސީގެ މީޑިއާ އެންޑް ޕަބްލިކް ރިލޭޝަންސް ޑައިރެކްޓަރ އަޒްހަދުވެސް ހިމެނެއެވެ.

މި ކެމްޕޭނުގެ އިންޓަނޭޝަނަލް ރިލޭޝަންސް ޑައިރެކްޓަރު މުޙައްމަދު އަލީ ވަނީ އެ ފަރާތްތަކުގެ ތަޖުރިބާ ކޮންމެވެސް ވަރަކަށް ރާއްޖެއެމްވީއާ ހިއްސާ ކޮށްދެއްވާފައެވެ.

މި ޓީމަށްވެސް ވަނީ ވެއްޓިފައި ހުރި އިމާރަތްތަކާއި، އެތަނުގައި ދިރިއުޅުނު މީހުންގެ ޙާލަތު ގާތުން ފެނިފައެވެ. މީހުން އެމީހުންގެ އާއިލާ މެންބަރުން ދިރިހުއްޓާ ފެނޭތޯ ރުއި ރުއިމާއި، ކޮޅުކޮޅުމައްޗަށް ޙަރަކާތްތެރިވަމުން ދިޔަ މަންޒަރު ގާތުން ފެނިފައިވެއެވެ.

ތުރުކީގެ އިމާރާތެއްގެ ދަށުގައި ތާށިވެ މަރުވި މީހެއްގެ ހަށިގަނޑު ގެންދަނީ - ރޮއިޓާސް

ބިންހެލުމުގެ އެޕިސެންޓަރުކަމަށްވާ "ކަހްރަމާންމަރަސް" އަށް ޓީމުން ގޮސްފައިވާއިރު، މުޅި ސަރަޙައްދުން ދުވަމުންދަނީ "ކުނި ވަސް" ކަމަށް އެ ފަރާތްތަކުން މައުލޫމާތު ދެއެވެ. އެއީ ބުނެދޭންވެސް ނޭނގޭ ކަހަލަ މަންޒަރުތަކެއްކަމަށް އެ ފަރާތްތަކުން ސިފަކޮށްދެއެވެ.

އޭރުވެސް އާއިލާތަކުގެ މީހުން މަރުވެފައިވާ ހަށިތައް ކައިރީގައި ގޮތް ހުސްވެ، ރޯން ތިބިކަމަށް މުޙައްމަދު އަލީ ރާއްޖެއެމްވީއަށް ކިޔާދިނެވެ.

އެ ނުތަނަވަސްކަމުގެ ތެރޭގައި ދޭތެރެ ދޭތެރެއިން ސަރޗް އެންޑް ރެސްކިއު ޓީމުތަކާއި އާއިލާތަކާއި މެދުގައި ޒުވާބު ކުރުމާއި އަރާރުންވުންވެސް ހިނގާކަމަށް އޭނާ ވިދާޅުވިއެވެ. ވާނީވެސް އެހެންތާއެވެ. ފުނޑުފުނޑުވެފައިވާ ބަރު ގާތަކާއި އިމާރަތްތަކުގެ ދަށުގައި އާއިލާ މީހަކު އޮވެދާނެކަމަށް ހީވާނަމަ، އަޅުގަނޑުމެންގެ ޙާލަތަކީވެސް ހަމަ އެއީކަން ޔަޤީނެވެ.

އޭނާ ކިޔާދެއްވި ގޮތުގައި އެހީވާން ދިޔަ ޓީމުތަކާއި، ސަރޗް އެންޑް ރެސްކިއު ޓީމުތަކާއި، އާންމު ރައްޔިތުންވެސް ތިބީ ނަފްސާނީ ގޮތުން ނުހަނު ބަލިކަށިވެފައެވެ. 5 ދުވަސް ވެގެންދިޔައިރު ގިނަ މީހުން ކާންވެސް ހަނދާނުގައި ނުހުންނަ ފަހަރު ގިނަކަމަށް އޭނާ ވިދާޅުވިއެވެ.

މުޅި ތަން އޮތީ އަނެއްހެން ބުނަންޏާ މަރުވެފައި، އެންމެންގެ މޫނުމަތިންވެސް ފެންނަނީ ހިތާމަވެރިކަން. އާއިލާ ގެ މީހުން އަޑީގައި ވާތީ މީހުންގެ ފަރާތުން އެ ފެނުނު ކެތްމަދުކަމާއި، ދިރިހުރެ ނުކުމޭތޯ އެ ކުރާ އިންތިޒާރާ،
ކެމްޕޭނުގެ އިންޓަނޭޝަނަލް ރިލޭޝަންސް ޑައިރެކްޓަރު މުޙައްމަދު އަލީ

އެ ޓީމުގެ ކުރިމަތިން ދެފޫޓެއްހާ ގާތުންވެސް މަރުވެފައިވާ ހަށިގަނޑެއް ނެރެގެން ގެންދިޔަ މަންޒަރު ވަނީ ފެނިފައެވެ.

އޭނާ ވިދާޅުވި ގޮތުގައި މިހާރު އިންޓަނޭޝަނަލް އެއިޑް ކެމްޕޭނުންވެސް ބޮޑަށް ފޯކަސް ކުރަމުންދަނީ ސަރޗް އެންޑް ރިކަވަރީއަށެވެ.

މި ޙާލަތުގައި ޓީމުން ވަނީ ކޮންމެ ދުވަހަކުވެސް 50،000 މީހުންނަށް ކާބޯތަކެތި ބެހުމުގައި ޙަރަކާތްތެރިވެފައެވެ. އެކަމުގައި ދިވެހިންގެ ހިއްސާވެސް ހިމެނެއެވެ. ދިވެހިންގެ ފަރާތުން ފޮނުވާ އެހީތައް ފޯރުކޮށްދިނުުމުގައި ޓީމުން ވަނީ ކުރީ ސަފުގައި ޙަރަކާތްތެރިވެފައެވެ.

އޭގެ އިތުރުން، ސީރިއާގައި ފިނި މޫސުމުގައި ލާ އަންނައުނާއި، އާއިލާތަކަށް 1 މަސް ދުވަހުގެ ކެއިން ބުއިމުގެ ކަންކަން ހަމަޖެއްސުމާއި، ސާރޗް އެންޑް ރެސްކިއުގައި ބޭނުންކުރާނެ އާލަތްތައް ބެހުމުގައިވެސް ޓީމުން ވަނީ ޙަރަކާތްތެރިވެފައެވެ.

އިމާރާތްތަކުގެ ދަށުން ސަލާމަތްކުރެވުނު ތުރުކީގެ ރެފިއުޖީއެއް އެމްބިއުލާންސައްލާން ގެންދަނީ - ރޮއިޓާސް
އޭގެ ތެރޭގައި ބްރިކް ހެމަރ، ޝަވަލްސް އަދި ބޮޑެތި ގާ ފަޅަން ބޭނުންކުރާ ކޮމްޕްރެސަރ، އަދި ރެއިންކޯޓާއި ސަރޗް އެންޑް ރެސްކިއު މީހުންނަށް ޚާއްސަކޮށް ކާބޯތަކެތި ވާނީ ބަހާފައި
ކެމްޕޭނުގެ އިންޓަނޭޝަނަލް ރިލޭޝަންސް ޑައިރެކްޓަރު މުޙައްމަދު އަލީ

ތުރުކީއަށް ދުނިޔޭގެ އެކި ކަންކޮޅުތަކުން ސަރޗް އެންޑް ރެސްކިއު ޓީމުތައް ގޮސް މަސައްކަތްތައް ކުރަމުންދާކަމަށްވެސް އޭނާ ވިދާޅުވިއެވެ. ނަމަވެސް ސީރިޔާއަށް އަދިވެސް އެކަށީގެންވާ ގޮތެއްގައި އެހީތެރިކަން ނުލިބޭ ކަމަށާއި، އެކަމުގައި ގޮންޖެހުންތައް ހުރިކަމަށް ޓީމުން މައުލޫމާތުދެއެވެ.

ތުރުކީގައި މަސައްކަތް ކުރަމުންދަނީ ވަރަށް ޤާބިލު އެކްސްޕަރޓް ޓީމުތައް، ފުރަތަމަ އައި ޓީމުތަކުގެ ތެރެއިން ބައެއް ޓީމުތައް މިހާރު ވަނީ އަނބުރާ ގޮސްފައި، އެހެންނަމަވެސް ސީރިޔާއަށް އެކަށީގެންވާ ގޮތެއްގައި އެހީތެރިކަން ލިބިފައެއް ނުވޭ، އެއީ ސީިރިޔާއަށް އެހީ ވެއްދުމުގައި ބައިވަރު ހުރަސްތައް، އެކި ސެންކްޝަންސްތައް ހުރީމައި،
ކެމްޕޭނުގެ އިންޓަނޭޝަނަލް ރިލޭޝަންސް ޑައިރެކްޓަރު މުޙައްމަދު އަލީ

އައިއޭސީން މިހާރު ބޮޑަށް މަސައްކަތް ކުރަމުންދަނީ ހާލުގައި ޖެހިފައިވާ ފަރާތްތަކަށް އެމީހުންގެ ދިރިއުޅުން އާރާސްތު ކުރުމަށް އެހީވެދިނުމަށެވެ.

ތުރުކީއާއި ސީރިއާއަށް ދިމާވެފައިމިވާ ކާރިސާގެ ދަނޑިވަޅުގައި ރާއްޖެއިންވެސް ވީ އެންމެ ބޮޑަކަށް އެ ޤައުމުތަކަށް އެހީވުމަށް ދަނީ މަސައްކަތް ކުރަމުންނެވެ.

އެންމެ ފަހުން އަޕްޑޭޓް ކުރީ: 2 މަސް ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
100%
0%
0%
ކޮމެންޓް