ފެޝަން ޝޯވއެއް ވިއްޔާ ކޮންމެހެންވެސް ހުންނަންޖެހޭނީ އައު ހެދުންތަ؟

ފެޝަން ޝޯއެކޭ ބުނާ ހިސާބުން ގިނަ ފަހަރަށް ޢާންމު ޤަބޫލު ކުރުމަކަށް ވެފައި އޮންނަނީ، އެންމެ ފަހުގެ ޒަމާނީ ހެދުންތަކާއި އާ ފަރުމާތައް ފެނިގެންދާނެ ކަމަށެވެ. އެހެން ހީ ނުވާންވީ ސަބަބެއްވެސް ނެތެވެ. ގިނަ ފަހަރަށް ކަން ވެފައިވެސް އޮންނަނީ އެހެންނެވެ. ނަމަވެސް، ޢިރާޤުގެ ބަސްރާގެ ރަންވޭއިން މި ފަހަރު ފެނިގެން ދިޔައީ މުޅިން ތަފާތު ޓްރެންޑްއެކެވެ.

ޝޯވގެ މޮޑެލްއިން މުޅިންހެންވެސް ދައްކާލީ "ސެކަންޑް-ހޭންޑް" ހެދުމެވެ. ނުވަތަ، އެހެން މީހަކު މީގެ ކުރިން ލާ، ބޭނުން ނެތިގެން ދޫކޮށްލާފައިވާ ހެދުންތަކެވެ.

"ސެކަންޑް-ހޭންޑް" ފެޝަން ޝޯވއަކީ، ފެޝަންގެ ސިނާޢަތުގެ ސަބަބުން އުފެދިގެން ޖައްވު ހޫނުކުރާ ވިހަ ގޭހުގެ ސިއްކަ ނުވަތަ ކާބަން ފުޓްޕްރިންޓް ކުޑަ ކުރުމުގެ އަމާޒުގައި، ތިމާވެއްޓާ މެދު މީހުންގެ މެދުގައި ހޭލުންތެރިކަން އިތުރު ކުރުމުގެ ގޮތުން، ޢިރާޤުގެ ޒުވާނުންގެ ގުރޫޕަކުން އިސްނަގައިގެން، ހިލޭ ސާބަހަށް ކުރިއަށް ގެންދިޔަ ފެޝަން ޝޯވއެކެވެ.

މުޅި ދުނިޔޭގެ ނިސްބަތުން ބަލާއިރު، އަހަރެއްގެ ތެރޭގައި ޖައްވަށް ބޭރުވެގެންދާ ކާބަންގެ 10 ޕަސެންޓް ހިއްސާ ކުރަނީ ފެޝަންގެ ސިނާޢަތް ކަމަށް ވޯލްޑް ބޭންކުގެ ތަފާސް ހިސާބުތަކުން ދައްކައެވެ. "ސެކަންޑް-ހޭންޑް" ފެޝަން ޝޯވ ކުރިއަށް ގެންދިޔަ ބަސްރާގެ ތަރިކައާ ގުޅިފައިވާ ޢައްބާސީދު އެލީވޭޒްގައެވެ. ޝޯވ އިންތިޒާމް ކުރި ފަރާތުން ބުނި ގޮތުގައި، ޢައްބާސީދު އެލީވޭޒްގައި އެ އިވެންޓް ކުރިއަށް ގެންދިޔައީ، ގިނަ ބައެއްގެ ހަނދާނުން ކައްސާލާފައިވާ ޢިރާޤޫގެ މުއްސަނދި ތަރިކައަށް ދިރުން ގެނެސްދިނުމުގެ މަޤްޞަދުގައެވެ.

މަދުން ނޫނީ ނުފެންނަ ޒާތުގެ އެ އިވެންޓަށް، ގިނަ ބައެއްގެ ތަރުޚީބު ވަނީ ލިބިފައެވެ. ޒުވާނުންގެ ބައިވެރިވުންވެސް ފާހަގަ ކުރަންޖެހެއެވެ.

ހިޖުރަވެރިންނާ ބެހޭ ބައިނަލްއަޤުވާމީ ޖަމިއްޔާ (އައިއޯއެމް)އިން މިދިޔަ އަހަރު އާންމު ކޮށްފައިވާ ރިޕޯޓެއް ބުނާ ގޮތުގައި، މޫސުމީ ނޭދެވޭ ބަދަލުތަކުން ކުރާ އަސަރުގެ ގޮތުން ބަލާއިރު، ޢިރާޤު ހިމެނެނީ މުޅި ދުނިޔޭގެ ނިސްބަތުންވެސް 5 ވަނައަށް އެންމެ ނާޒުކުގެ ޤައުމުގެ ގޮތުގައެވެ.