ސެލީނާ ގޮމޭޒް 'ހުތުރު'ކަމަށް ބުނި ފެޝަން ޑިޒައިނަރަށް އޭނާގެ މަންމަ ރައްދު ދީފި

އެމެރިކާގެ މަޝްހޫރު ލަވަކިޔުންތެރިޔާ ސެލީނާ ގޮމޭޒް "ވަރަށް ހުތުރު"ކަމަށް އިޓަލީގެ ފެޝަން ހައުސެއްކަމަށްވާ 'ޑޮލްޗޭ އެންޑް ގަބާނާ'ގެ ސްޓެފާނޯ ގަބާނާ ބުނުމުން މަންމަ މޭންޑީ ޓީފޭ ރައްދު ދީފިއެވެ.

ސެލީނާގެ ފޭން އެކައުންޓަކުން ޖޫން 12ގައި ޕޯސްޓްކޮށްފައިވާ ފޮޓޯއެއްގައި 'ޑޮލްޗޭ އެންޑް ގަބާނާ'ގެ އެއް ބާނީކަމަށްވާ ސްޓެފާނޯވަނީ އިޓަލީ ބަހުން ކޮމެންޓްކޮށްފައެވެ. ކޮމެންޓްގައި ބުނެފައިވަނީ 'އޭނާ ވަރަށް ހުުތުރު'ކަމަށެވެ.

މިކަމާގުޅޭ ގޮތުން ސެލީނާ މަންމަ މޭންޑީއާ ސުވާލު ކުރުމުން އޭނާ ބުނީ، "އެއްވެސް މީހަކު އެފަދަ ނަފްރަތުގެ ބަސް ބޭނުން ކުރާނަމަ އަޅައެއް ނުލަން" ކަމަށެވެ. މި ފަދަ ނަފުރަތުގެ ބަސްތައް މީހުން ބުނަނީ ސޯޝަލް މީޑިއާގައި ސަމާލުކަން ހޯދުމަށް ކަމަށާއި އެފަދަ ހާލަތްތަކުގައި އާއިލާއިން ކަންކުރާ ގޮތަކީ އެއަށް އަޅާ ނުލާ 'ދުވަސް ކޮޅަކަށް ގެއްލުން' ކަމަށް އޭނޭ ބުންޏެވެ.

ސެލީނާއާ ދިމާލާށް ސްޓެފާނޯ ހުތުރޭ ބުނެގެން އެންމެ ފުރަތަމަ އޭނާގެ ދިފާއުގައި އެއްޗެއް ބުނި މީހުންގެ ތެރޭގައި ލަވަކިޔުންތެރިޔާ މައިލީ ސައިރަސް ހިމެނެއެވެ. މައިލީގެ އިތުރުން ހޮލީވުޑްގެ ބައެއް އެހެން ތަރިންވެސް ސެލީނާގެ ކޮޅު ނަގާފައިވާ އިރު، ސެލީނާގެ ފޭނުުންދަނީ އިންސްޓަގްރާމް އަދި ޓްވިޓަރ މެދުވެރިކޮށް ސްޓެފާނޯގެ އަމަލަކީ ސައިބަރ ބުލީ ކުރުމުގެ އަމަލެއްކަން ފާހަގަކޮށް ފާޑު ކިޔަމުންނެވެ.

މިކަމާ ގުޅޭ ގޮތުން ސެލީނާ އަދި ކޮމެންޓެއް ކޮށްފައެއް ނުވެއެވެ.