ލައިޕްޒިގް ބަލިކޮށް ބާލިން އިން ދެ ވަނަ އަށް ޖެހިލައިފި

ޖަރުމަނު ލީގުގައި އާރްބީ ލައިޕްޒިގާ ދެކޮޅަށް ކުޅުނު މެޗުން މޮޅުވެ ޔޫނިއަން ބާލިން ލީގު ތާވަލްގެ ދެ ވަނަ މަގާމަށް ޖެހިލައިފި އެވެ.

ހޮނިހިރު ދުވަހުގެ ރޭ ލައިޕްޒިގްގެ ދަނޑުގައި ކުޅުނު މެޗު ބާލިން އިން ކާމިޔާބު ކުރީ އެ ޓީމުން ކުރި ހޯދާފައި ވަނިކޮށެވެ. މެޗުން ބާލިން މޮޅުވީ 2-1 އިންނެވެ. މެޗުން ޕޮއިންޓެއް ހޯދުމަށް ލައިޕްޒިގަށް ލިބުނު ފުރުސަތަށް ހުރަސްއެޅީ ވީއޭއާރު އެވެ.

މެޗު ފަށައިގެން 24 ވަނަ މިނެޓުގައި ލައިޕްޒިގަށް ލީޑު ނަގައިދިނީ ބެންޖަމިން ހެންރިޗްސް އެވެ. އެއީ އަންދްރޭ ސިލްވާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގައި ބާލިންގެ ލަނޑުތައް ފެނުނީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން 61 ވަނަ މިނެޓުގައި ބާލިން އަށް ނަތީޖާ ހަމަހަމަކޮށްދިނީ ޖަނިކް ހާބާ އެވެ. އޭގެ ފަހުން ބާލިން އިން މެޗުގައި ލީޑު ނެގީ 71 ވަނަ މިނެޓުގައި ލިބުނު ޕެނަލްޓީ އަކުންނެވެ. އެ ޓީމުގެ ޕެނަލްޓީ ކާމިޔާބުކޮށްދިނީ ރޮބިން ނޯޗް އެވެ. އޭގެ ފަހުން ލައިޕްޒިގްގެ ޔޫސުފް ޕޯލްސަން ލަނޑެއް ޖެހި ނަމަވެސް ވީއޭއާރުން ވަނީ ލަނޑު ބަލައި ނުގެންފަ އެވެ.

މެޗުން މޮޅުވެ ބާލިން ދެ ވަނައިގައި އޮތީ ކުޅުނު 20 މެޗުން 42 ޕޮއިންޓާއެކު އެެވެ. އެއް ވަނައިގައި އޮތް ބަޔާން މިއުނިކާ ދެމެދު މިހާރު އޮތީ ޕޮއިންޓެއްގެ ފަރަގެކެވެ. އެއް ވަނައިގައި ބަޔާން އޮތީ 20 މެޗުން 43 ޕޮއިންޓާއެކު އެވެ. މެޗުން ބަލިވި ލައިޕްޒިގް އޮތީ 36 ޕޮއިންޓާއެކު ފަސް ވަނައިގަ އެވެ.