މާލެ ސަރަޙައްދުގައި ދިރިއުޅޭ ރައްޔިތުންގެ ހިތްދަތިކަން ދުރުކޮށްދިނުމަށް ރައީސް ފުއްދަވައިދެއްވި އެންމެ މުހިންމު އެއް ވައުދުފުޅަކީ ކުޑަގިރި ޕިކްނިކް އައިލެންޑް ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

ކުޑަގިރި ރަސްމީކޮށް ހުޅުވުމަށް ބޭއްވި ރަސްމިއްޔާތު ގައި ވާހަކަ ދައްކަވަމުން އާޒިމް ވަނީ މިފަދަ ރަށެއް ތަރައްޤީ ކުރުމުގެ މަސައްކަތް ފެށިގެން އައި ގޮތަށް އަލިއަޅުވާލައްވާފައެވެ.

އާޒިމް ވިދާޅުވީ، އެއް ރެއަކު ނައިބްރައީސް ފައިސަލް ނަސީމް ގުޅުއްވި ކަމަށާއި، ބައްދަލު ކޮށްލައްވަން އެދިވަޑައިގެންނެވި ކަމަށެވެ. އެ ބައްދަލު ކުރެއްވުމުގައި ނައިބްރައީސް މަޝްވަރާ ކުރެއްވީ ރައީސް އިބްރާހިމް މުޙައްމަދު ސާލިހުގެ ރިޔާސީ ވައުދުފުޅެއް ކަމަށްވާ މާލޭ ސަރަޙައްދުގައި ޕިކްނިކް އައިލެންޑް ޤާއިމު ކުރެއްވުމާއި ގުޅޭގޮތުންކަމަށެވެ. އަދި ނައިބްރައީސް ވަނީ އެމްޓީސީސީން ޕްރޮޖެކްޓުތައް ކުރިއަށްގެންދާ ބާރު މިނަށްވުރެވެސް އަވަހަށް އެ ޕްރޮޖެކްޓު ކުރިއަށް ގެންދިއުމަށް އެދިވަޑައިގެންފަ ކަމަށް އާޒިމް ވިދާޅުވިއެވެ.

އެހިސާބުން އީޕީއޭގެ ދިރާސާތަކަށްފަހު އެމްޓީސީސީން ފެށީ އެ ރަށް ހިއްކުމުގެ މަސައްކަތެވެ. އެއީ 27 ޖެނުއަރީ 2022 ގައެވެ. އެ މަސައްކަތް ނިމުނީ 24 ޖޫން 2022 ގައެވެ.

އާޒިމް ވިދާޅުވީ، ކުޑަބަނޑޮހުގެ ބަދަލުގައި ރައީސް ސާލިޙު ތަރައްޤީ ކުރެއްވި ކުޑަގިރިއަކީ އޭގެ ދެގުނަ ބޮޑު ރަށެއް ކަމަށެވެ. މިއީ މާލޭ ރައްޔިތުންނަށް ރައީސް ފުއްދަވައިދެއްވި މުހިންމު ވައުދުފުޅެއްގެ ގޮތުގައި އާޒިމް ވަނީ ސިފަ ކުރައްވާފައެވެ.

ކ އަތޮޅަށް އެކަނި ބަލާލި ނަމަވެސް ރައީސް ސާލިޙު ގެނެސްދެއްވަމުން ގެންދަވާ ތަރައްޤީ ފެންނަމުންދާކަމަށް އާޒިމް ވިދާޅުވިއެވެ.

އެމްޓީސީސީއަކީ ސަރުކާރުގެ އެންމެ ގިނަ މަޝްރޫއުތައް ހިންގަމުންދާ އެއް ކުންފުނިކަން ފާހަގަ ކުރައްވައި އާޒިމް އިތުރަށް ވިދާޅުވީ، ރާއްޖޭގެ އެކި ސަރަޙައްދުތަކުގައި މިހާތަނަށް 135 މަޝްރޫއެއް ހިންގިފައިވާ ކަމަށެވެ. މިހާރުވެސް އިތުރު 130 މަޝްރޫއެއްގެ މަސައްކަތް ކުރިއަށްދާކަމަށް އާޒިމް ވިދާޅުވިއެވެ. އެވްރެޖްކޮށް ބަލާނަމަ އެއީ ކޮންމެ 11 ދުވަހަކުން ތަރައްޤީގެ މަޝްރޫއެއް ނިންމުން ކަމަަށް އާޒިމް ވިދާޅުވިއެވެ.

ރައީސް ސާލިޙުގެ ވެރިކަމަކީ ރާއްޖެ ދުއް އެންމެ "ބަރާބަރު ސަރުކާރު" ކަމަށް އާޒިމް ސިފަ ކުރެއްވި އެވެ. އަދި ޖަޒީރާވަންތަ ތަރައްޤީގައި ރައީސް ސާލިޙު ބަލިކޮށްލެއްވުމަކީ "ނާމުމްކިން، އިމްޕޮސިބަލް" ކަމެއްކަމަށް އާޒިމް ވިދާޅުވިއެވެ.

ކުޑަގިރިއަކީ މާލޭ ރައްޔިތުންނަށް ލިބިގެންދާނެ އުފާވެރި ހަދިޔާއަކަށްވާނެކަމަށް ވެސް އާޒިމް ވިދާޅުވިއެވެ.