ފީފާގެ އެންމެ މޮޅު ކޯޗުންނަށް ވާދަކުރަނީ ސްކަލޯނީ، އަންޗެލޮޓީ އަދި ގާޑިއޯލާ

ފީފާ އިން ހޮވާ އަހަރުގެ އެންމެ މޮޅު ކޯޗުގެ އެވޯޑުގެ ގަދަ ތިން ކޯޗުން އިއުލާންކޮށްފި އެވެ.

މިއަހަރުގެ އެންމެ މޮޅު ކޯޗަށް ވާދަކުރާ ތިން މީހުންނަކީ އާޖެންޓީނާގެ ކޯޗު ލިއޮނަލް ސްކަލޯނީ އާއި ރެއާލް މެޑްރިޑުގެ ކޯޗު ކާލޯ އަންޗެލޮޓީގެ އިތުރުން މެންޗެސްޓަރ ސިޓީގެ ކޯޗު ޕެޕް ގާޑިއޯލާ އެވެ. މިއީ ސްކަލޯނީ އާއި އަންޗެލޮޓީ މި އެވޯޑުގެ ގަދަ ތިނެއްގައި ހިމެނުނު ފުރަތަމަ ފަހަރެވެ. މީގެ ކުރިން ގާޑިއޯލާ ވަނީ ދެ އަހަރަކު އެވޯޑުގެ ގަދަ ތިނެއްގައި ހިމެނިފަ އެވެ.

ސްކަލޯނީ ވަނީ އާޖެންޓީނާއާއެކު މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތް ކާމިޔާބުކޮށްފަ އެވެ. މީގެ އިތުރުން ވޯލްޑް ކަޕާ ހަމައަށް އައި އިރު، އާޖެންޓީނާ ވަނީ ބަލިނުވެ 36 މެޗު ހަމަކޮށްފަ އެވެ. ނަމަވެސް ވޯލްޑް ކަޕްގެ ފުރަތަމަ މެޗުގައި ސައުދީ އަރަބިޔާ އަތުން ބަލިވުމުން، އިޓަލީން ޤާއިމުކޮށްފައިވާ ރެކޯޑު މުގުރާލެވޭ ގޮތެއް ނުވި އެވެ. އާޖެންޓީނާގެ ކޯޗުކަމާ ސްކަލޯނީ ހަވާލުވި ފަހުން އެ ޓީމުން އަންނަނީ ރަނގަޅު ނަތީޖާތެއް ވެސް ނެރެމުންނެވެ. އޭނާގެ އިރުޝާދުގެ ދަށުން އާޖެންޓީނާ އިން ވަނީ ތިން ތައްޓެއް ކާމިޔާބުކޮށްފަ އެވެ. އެއީ ކޮޕަ އެމެރިކާ މުބާރާތައި، ފައިނަލިސިމާގެ އިތުރުން ވޯލްޑް ކަޕް މުބާރާތެވެ. އިޓަލީގެ އަންޗެލޮޓީ ވަނީ މިދިޔަ އަހަރު ރެއާލާއެކު ގިނަ ކާމިޔާބީތަކެއް ހޯދައިފަ އެވެ. އޭގެ ތެރޭގައި ސްޕެނިޝް ލީގާއި، ސްޕެނިޝް ސުޕަ ކަޕާއި، ޔުއެފާ ޗެމްޕިއަން ލީގާއި، ޔުއެފާ ސުޕަ ކަޕް ހިމެނެ އެވެ. ސްޕެއިންގެ ގާޑިއޯލާ ވަނީ ސިޓީއާއެކު މިދިޔަ އަހަރު ޕްރިމިއާ ލީގު ކާމިޔާބުކޮށްފަ އެވެ.

މީގެ އިތުރުން އަންހެން އެންމެ މޮޅު ކޯޗުންނަށް ވާދަކުރަނީ ލިއޯންގެ ސޯނިއާ ބޮމްޕަސްޓޯ އާއި ބްރެޒިލް ޤައުމީ ޓީމުގެ ޕިއާ ސުންދޭގް އަދި އިންގްލެންޑު ޤައުމީ ޓީމުގެ ކޯޗު ސަރީނާ ވިއެމަން އެވެ. މީގެ ތެރެއިން ސަރީނާ ވިއެމަން ވަނީ ދެ އަހަރު މި އެވޯޑު ކާމިޔާބުކޮށްފަ އެވެ. މިއީ ސޯނިއާ ބޮމްޕަސްޓޯ މި އެވޯޑުގެ ގަދަ ތިނެއްގައި ހިމެނުނު ފުރަތަމަ ފަަހަރެވެ. ޕިއާ ސުންދޭގް ވަނީ 2016 ވަނަ އަހަރު އޮތް އެވޯޑުގެ ގަދަ ތިނެއްގައި ހިމެނިފަ އެވެ.