ތުރުކީ-ސީރިޔާ ބިންހެލުމުގައި މަރުވި މީހުންގެ އަދަދު 23،700ން މައްޗަށް
ބިންހެލުމުގެ ސަބަބުން ސީރިއާއިން 5.3 މިލިއަން މީހުންގެ ގެދޮރު ވަނީ ގެއްލިފައި
ތުރުކީ ސީރިޔާ ބިންހެލުމުގައި މަރުވި ބައެއް މީހުން ވަޅުލުމަށް ތައްޔާރުވަނީ
ތުރުކީ އަދި ސީރިއާއަށް އައި ބާރުގަދަ ބިންހެލުމުގައި މަރުވި މީހުންގެ އަދަދު 23،700ށް އަރާފައިވާކަމަށް ބޭރުގެ މީޑިއާތަކުން ރިޕޯޓުކޮށްފިއެވެ.
އަލްޖަޒީރާއިން ރިޕޯޓުކޮށްފައިވާގޮތުން ތުރުކީން އެކަނި މަރުވި މީހުންގެ އަދަދު މިހާރު ވަނީ 20،213ށް އަރާފައެވެ. އަދި ސީރިޔާއިން މަރުވި މީހުންގެ އަދަދު ވަނީ 3،500ށް އަރާފައެވެ.
ފެބްރުއަރީ 6 ވަނަ ދުވަހު ތުރުކީ އަދި ސީރިޔާއަށް 7.8 މެގްނިޑިއުޑްގެ ބާރުމިނުގައި އައި ބިންހެލުމުގެ ސަބަބުން ސީރިއާއިން 5.3 މިލިއަން މީހުންގެ ގެދޮރު ގެއްލިފައިވާކަމަށް އދ އިން ފާހަގަކުރާއިރު، ތުރުކީ އަދި ސީރިޔާގައިވެސް 900،000 މީހުންނަށް ވަނީ ކާބޯތަކެތި ބޭނުންވެފައެވެ.
ބިންހެލުމާ ގުޅިގެން ސީރިޔާއަށް އިންސާނީ އެހީ ފޯރުކޮށްދިނުމަށް ދަތިތަކާ ކުރިމަތިވާކަމަށް އެހީދޭ ޖަމިއްޔާ ޖަމާއަތްތަކުން ކަންބޮޑުވުން ފާޅުކޮށްފައިވާއިރު، ސީރިޔާގެ ސަރުކާރުން ވަނީ އެގައުމުގެ ހަނގުރާމަވެރި ޖަމާއަތްތަކުގެ ކޮންޓްރޯލްގެ ދަށުގައިވާ ސަރަހައްދުތަކަށްވެސް އިންސާނީ އެހީ ފޯރުކޮށްދިނުމަށް އެއްބަސްވެފައެވެ. އެގޮތުން ތުރުކީން ވަނީ އެގައުމާ ސީރިޔާގެ ބޯޑަރު ހުރަސްކޮށް ހަނގުރާމަވެރި ޖަމާއަތްތަކުގެ އަތްދަށުގައި އޮތް ސަރަހައްދުތަކަށް އެހީ ފޯރުކޮށްދިނުމަށް އައު ދެ ރޫޓެއް ހުޅުވުމަށް މަސައްކަތްކުރަމުންދާކަމަށް ބުނެފައެވެ.
