ޖުމްހޫރީ ޕާޓީގެ ލީޑަރުގެ އެޑްވައިޒަރަކަށް ނިހާން
10 ފެބުރުއަރީ 2023 | ހުކުރު 15:26ނިހާނު އަކީ މިހާރު ޕާޓީގެ ކައުންސިލް މެމްބަރެއް
އަހުމަދު ނިހާނު ހުސެއިން މަނިކު އާއި ޤާސިމް އިބްރާހިމް
ޖުމްހޫރީ ޕާޓީގެ ލީޑަރުގެ އެޑްވައިޒަރު ކަމުގެ މަޤާމަށް އަހުމަދު ނިހާނު ހުސެއިން މަނިކު އައްޔަންކޮށްފިއެވެ.
ޖުމްހޫރީ ޕާޓީން ބުނީ އޭނާ މި މަޤާމަށް އައްޔަން ކުރުމުން ހުކުރު ދުވަހުން ފެށިގެން ނިހާނު އަކީ ޕާޓީގެ ކައުންސިލް މެމްބަރެއް ކަމަށެވެ.
ޖޭޕީގެ ލީޑަރުގެ ބަދަލުގައި ރައީސަކު އައްޔަން ކުރަން، އަސާސީ ގަވާއިދު އިސްލާހު ކުރުމަށް ވެސް އެޕާޓީން ވަނީ ދާދިފަހުން ހުށަހަޅާފައެވެ. ޕާޓީގެ މެމްބަރުންގެ ފަރާތުން އެގޮތަށް ހުށަހަޅާފައިވަނީ މ. ކުނޫޒުގައި އޮތް އެ ޕާޓީގެ ކައުންސިލު ބައްދަލުވުމެއްގައެވެ. އެއީ ޕާޓީގެ އަސާސީ ޤަވާއިދަށް ހުށަހަޅަން ފެންނަކަމަށް މެމްބަރުން ހިއްސާކޮށްފައިވާ ހުށަހެޅުމެކެވެ.
މި ބައްދަލުވުމުގައި އެންމެ ފުރަތަމަ ކުރިއަށްދިޔައީ ދުވަހުގެ އެޖެންޑާ ފާސް ކުރުމެވެ. އެއަށްފަހު 147 ވަނަ ކައުންސިލު ބައްދަލުވުމުގެ ޔައުމިއްުޔާ ވަނީ ފާސްކޮށްފައެވެ. އޭގެ އިތުރުން، ޕާޓީގެ 4 ވަނަ ޤައުމީ ކޮންގްރެސް ބޭއްވުމަށް ނިންމަންޖެހޭ ނިންމުންތަކާއި ގުޅިގެންވެސް މަޝްވަރާކޮށްފައިވާއިރު، ޕާޓީގެ އަސާސީ ޤަވާއިދު އިސްލާޙު ކުރުމަށް ގިނަ ހުށަހެޅުންތަކެއް ވަނީ ހުށަހަޅާފައެވެ.
އޭގެ ތެރެއިން އެއް ކަމަކީ ޕާޓީގެ ލީޑަރުގެ ބަދަލުގައި ރައީސަކު އައްޔަން ކުރަން ގަވާއިދު އިސްލާހު ކުރުން ކަމަށް ޖޭޕީގެ އޮފިޝަލަކު ވިދާޅުވިއެވެ. އޭނާ ވިދާޅުވީ ޕާޓީގެ ރައީސް ކަމަށް ބޭފުޅަކު ހޮވާނީ ޕާޓީގެ ލީޑަރުކަމުގައި މިވަގުތު ހުންނެވި ގާސިމް އިބްރާހިމްވެސް ހިމަނުއްވައިގެން އެ މަގާމަށް ކުރިމަތިލައްވާ ބޭފުޅުންގެ ތެރެއިން ކަމަށެވެ.
އޭނާ ވިދާޅުވީ، އެކަމާ ގުޅޭ ފަހުގެ ނިންމުންތައް ނިންމާނީ ޕާޓީގެ ޤައުމީ ކޮންގްރެސްގައި ކަމަށެވެ. އެގޮތުން ޕާޓީގެ ޤައުމީ ކޮންގްރެސް 25 މޭގައި ބޭއްވުމަށް މި ބައްދަލުވުމުގައި ވަނީ ފާސްކޮށްފައެވެ.
ޕާޓީގެ ގައުމީ ކޮންފަރެންސަށް ތައްޔާރުވުމުގެ ގޮތުން ކުރަންޖެހޭ އެންމެ މުހިއްމު އެއް މަސައްކަތްކަމުގައިވާ ޕާޓީގެ ރަށު ގޮފިތައް އަސާސީ ގަވާއިދާ އެއްގޮތަށް އެކުލަވާލައި ފުރިހަމަކުރުމަށްޓަކައި 7 މެންބަރުންގެ ވަގުތީ ކޮމެޓީއެއް ވަނީ އެކުލަވާލާފައެވެ.
ސިޔާސީ ގޮތުން ޖޭޕީން ނިންމާ މުހިއްމު ނިންމުންތަކަށް ކޮށާލެވޭ މަގަކަށް އެ ކޮންފަރެންސް ވާނެކަމަށް، އެ ޕާޓީގެ ލީޑަރު ގާސިމް އިބްރާހީމް ވަނީ ވިދާޅުވެފައެވެ. އަދި ރިޔާސީ އިންތިޚާބަށް އެ ޕާޓީން ކެންޑިޑޭޓަކު ނެރޭނެކަންވެސް ގާސިމް ވަނީ އިއުލާނުކުރައްވާފައެވެ.
