ރޮނަލްޑޯގެ ކެރިއަރުގައި 500 ލީގު ގޯލް، އަލް ނަސްރަށް ފުރަތަމަ ހެޓްރިކް!

ކްރިސްޓިއާނޯ ރޮނަލްޑޯގެ ކެރިއަރުގައި 500 ލީގު ގޯލް ހަމަކޮށްފިއެވެ. މިހަފްތާގައި 38 އަހަރު ފުރުނު ރޮނަލްޑޯ 500 ލީގު ގޯލް ހަމަކުރީ ސައުދީ ޕްރޯ ލީގުގައި އަލް ނަސްރަށް ފުރަތަމަ ހެޓްރިކް ހަދައިިދިން މެޗުގައެވެ.

އަލް-ވަހުދާ 4-0 ން ބަލިކުރި މެޗުގައި ހަތަރު ގޯލްވެސް ޖެހީ ރޮނަލްޑޯއެވެ. މީގެތެރެއިން އެއް ލަނޑު އޭނާ ޖެހީ ޕެނަލްޓީއަކުންނެވެ. މެޗުގައި ޖެހި ހަތަރު ގޯލާއެކު ރޮނަލްޑޯ ކެރިއަރުގައި ޖެހި ލީގު ގޯލްގެ އަދަދަކީ 503 އެވެ. އެއީ ތަފާތު ފަސް ކްލަބެއްގައި, ފަސް ލީގެއްގައެވެ. އެއީ މެންޗެސްޓަރ ޔުނައިޓެޑާއި, ރެއާލް މެޑްރިޑާއި, ޔުވެންޓަސްއާއި, އަލް ނަސްރުގެ އިތުރުން އޭނާގެ ފުރަތަމަ ކްލަބް ސްޕޯޓިންގ ލިސްބަންއެވެ. އަލް ނަސްރަށް ބަދަލުވެ އެކްލަބަށް ކުޅުނު ފުރަތަމަ ތިން މެޗުން ރޮނަލްޑޯއަށް ޖެހުނީ އެންމެ ލަނޑެކެވެ. އެއީވެސް ޕެނަލްޓީއަކުންނެވެ. ރޭގެ މެޗާ ހަމައަށް އައިއިރު ކްލަބަށް ޖަހާދެވިފައިވަނީ ޕެނަލްޓީން ކާމިޔާބުކުރި ހަމައެކަނި ލަނޑެވެ.

ރޮނަލްޑޯގެ ހަތަރު ގޯލުން އަލް ނަސްރު މޮޅުވި މެޗާއެކު ސައުދީ ޕްރޯ ލީގު ތާވަލްގެ އެއްވަނާގައި ޓީމް އޮތީ ގޯލްގެ ތަފާތުންނެވެ. މެންޗެސްޓަރ ޔުނައިޓެޑްގެ އެއްބަސްވުން ނިމުމަކަށް ގެނައުމަށްފަހު ރޮނަލްޑޯ އަލް ނަސްރާ ގުޅުނީ ޑިސެންބަރު މަހުއެވެ.