އަލް އަހްލީ ބަލިކޮށް ފީފާ ކްލަބް ވަރލްޑްކަޕްގެ ފައިނަލަށް ރެއާލް މެޑްރިޑް

ފީފާ ކްލަބް ވަރލްޑްކަޕްގެ ސެމީފައިނަލްގައި މިޞްރުގެ އަލް އަހުލީ ބަލިކޮށް, ސްޕެއިންގެ ރެއާލް މެޑްރިޑް ފައިނަލަށް ދަތުރުކޮށްފިއެވެ.

ސެމީފައިނަލް މެޗު ރެއާލްއިން ކާމިޔާބުކުރީ 4-1 ނެވެ. މެޗުގައި ރެއާލްއަށް ލީޑް ނެގުނީ ފުރަތަމަ ހާފް ނިމެން ތިން މިނެޓަށް ވެފައިވަނިކޮށެވެ. ލީޑް ނަގައިދިނީ ވިނީޝިއުސް ޖޫނިއަރއެވެ. ދެވަނަ ހާފް ފަށައިގެން ފުރަތަމަ މިނެޓުގައި ދެވަނަ ލަނޑު ޖެހީ ފެޑެރީކޯ ވަލްވާޑޭއެވެ. ތިންވަނަ ގޯލް އިތު ވަގުތުގެ ދެވަނަ މިނެޓުގައި ޖެހީ ރޮޑްރީގޯއެވެ. އަދި ފަހު ގޯލް އިތުރު ވަގުތުގެ އަށްވަނަ މިނެޓްގައި ޖެހީ ސާޖިއޯ އަރިބަސްއެވެ. މެޗުގެ 87 ވަނަ މިނެޓްގައި ލިބުނު ޕެނަލްޓީއެއް މިޑްފީލްޑަރ ލުކަ މޮޑްރިޗް އަތުން ނާކާމިޔާބުވިއެވެ. ޕެނަލްޓީ ކީޕަރު މަތަކުރީއެވެ. ރެއާލްއިން ދެ ލަނޑު ޖަހާފއިވަނިކޮށް, އަލް އަހްލީގެ ހަމައެކަނި ލަނޑު 65 ވަނަ މިނެޓުގައި ޕެނަލްޓީއަކުން ޖެހީ މާލޯލްއެވެ.

ފައިނަލްގައި ރެއާލް މެޑްރިޑް ވާދަކުރަން ޖެހޭނީ ސައުދީ އަރަބިޔާގެ އަލް ހިލާލްއާއެވެ. ފައިނަލް މެޗު ކުޅޭނީ ހޮނިހިރު ދުވަހުއެވެ. ތިންވަނަ ހޮވާ މެޗުގައި އަލް އަހުލީ ވާދަކުރާނީ ބްރެޒިލްގެ ފްލަމެންގޯއާއެވެ.