އައްޑޫގެ މަގު ހެދުމުގެ މަސައްކަތް ކައިރިން ބައްލަވަން މިނިސްޓަރ އަސްލަމް އައްޑޫއަށް ދުވަސްކޮޅަކަށް ބަދަލުވެވަޑައިގަންނަވަނީ
8 ފެބުރުއަރީ 2023 | ބުދަ 10:44މޫވިން އިކްވިޕްމަންޓާއެކީގައި ބަންޑު ޖެހުމުގެ މަސައްކަތް ކޮންޓްރެކްޓަރ ކުރައްވަމުން އެބަގެންދަވާ
އައްޑޫ ސިޓީގެ މަގުތައް ޒަމާނީ ފެންވަރަކަށް ހެދުމަށް ކުރަމުންދާ މަސައްކަތުގެ ތެރެއިން
އައްޑޫ ރައްޔިތުންގެ ކަންބޮޑުވުންތަކެއް ހުރި މަގު ހެދުމުގެ މަސައްކަތް ގާތުން ބެއްލެވުމަށް ދުވަސްކޮޅަކަށް މިނިސްޓަރ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ، މުހައްމަދު އަސްލަމް އެ ސިޓީއަށް ވަޑައިގަންވަން ހަމެޖެހިފައިވާކަމަށް ވިދާޅުވެއްޖެއެވެ.
މިނިސްޓަރ އަސްލަމް މިހެން ވިދާޅުވި މަރަދޫ ދާއިރާގެ މެންބަރު އިބްރާހިމް ޝަރީފް ކުރެއްވި ސުވާލަށް ޖަވާބުދެއްވަމުންނެވެ. މެންބަރު ޝަރީފް ވިދާޅުވީ އައްޑޫ މަގު އަދި ބިން ހިއްކާ ނިމޭނީ ކޮންއިރަކުތޯއެވެ. އަދި މަގު ހެދުމުގެ މަސައްކަތުގައި ކަންބޮޑުވުންތަކެއް އެބަހުރި ކަމަށާއި، އެކަން ހައްލުކުރެވޭނީ ކޮންއިރަކުތޯއެވެ.
މެންބަރު ޝަރީފުގެ ސުވާލުގެ ޖަވާބުގައި މިނިސްޓަރ އަސްލަމް ވިދާޅުވި ބިން ހިއްކުމުގެ މަސައްކަތަށް ކޮންޓްރެކްޓަރ ސައިޓަށް މޮބިލައިޒްކޮށްފައިވާ ކަމަށެވެ. އަދި މޫވިން އިކްވިޕްމަންޓާއެކީގައި ބަންޑު ޖެހުމުގެ މަސައްކަތް ކޮންޓްރެކްޓަރ ކުރައްވަމުން އެބަގެންދަވާ ކަމަށާއި، ކޮންޓްރެކްޓްގެ މަސައްކަތް ނިންމުމަށް އިތުރު ވަގުތު ދީފައި ނުވާނެ ކަމަށެވެ.
މިނިސްޓަރ ވިދާޅުވި މަގު ހެދުމުގެ މަސައްކަތުގައި ހިތްހަމަނުޖެހުންތަކެއް އެބަހުރި ކަމަށެވެ. ގިނަ މަގުތަކެއް އެއްފަހަރާ ކޮނެފައި ހުރުމުން އައްޑޫގައި މައްސަލަތަކެއް އެބަހުރި ކަމަށާއި، އެކަންކަން ހައްލުކުރުމަށް އައްޑޫގައި ދުވަސްކޮޅަކު ހުންނެވުމަށް ހޮނިހިރު ދުވަހު ސިޓީއަށް ވަޑައިގަންނަވަން ހަމަޖެހިފައިވާ ކަމަށް ވިދާޅުވިއެވެ.
އައްޑޫ ސިޓީގެ ބިން ހިއްކުމަށް ބޭނުންވާ މެޝިނަރީ ގެންގޮސް މަސައްކަތް ފަށަން ވަނީ ތައްޔާރުވެފައެވެ. އައްޑޫ ސިޓީ ބިން ހިއްކުމުގެ މަޝްރޫޢުއާ ހަވާލުވެފައިވާ ނެދަލޭންޑްސްގެ ވެން އޫޑް ޑްރެޖިން ކުންފުނިން ބުނެފައިވަނީ ބިން ހިއްކުމަށް ވެލި ނެގުމަށް ޓަކައި އެ ކުންފުނިން އޮޕަރޭޓު ކުރާ އެޗްއޭއެމް 318 ޑްރެޖަރު ރާއްޖެއަށް ގެންނާނެ ކަމަށެވެ. އަދި 18 މަސް ދުވަހުގެ ތެރޭގައި މަޝްރޫޢު ނިންމާނެ ކަމަށް ވެސް އެކުންފުނިން ވަނީ ބުނެފައެވެ.
މި މަޝްރޫޢޫގެ ދަށުން އައްޑޫ ސިޓީގައި ޖުމުލަ 194.3 ހެކްޓަރުގެ ބިން އިތުރު ކުރެވިގެންދާނެ އަދި މި މަޝްރޫޢުގެ ދަށުން ގޮނޑުދޮށް ހިމާޔަތް ކުރުމުގެ މަސައްކަތްވެސް ކުރިއަށް ގެންދާނެއެވެ.
ހިތަދޫއަށް 90 ހެކްޓަރު ބިމާއި މަރަދޫ އަދި މަރަދޫފޭދޫއަށް 16 ހެކްޓަރުގެބިމާއި ފަތުރުވެރިކަމަށް ޚާއްސަކުރެވިގެން އައްޑޫ ސިޓީ ފަޅުތެރޭއިން 8.3 ހެކްޓަރުގެ 3 ރަށަކާއި 4 ލޭން ޑިޓުއަރ ލިންކު ރޯޑުގެބްރިޖުގެ އެމްބޭންކްމަންޓަށް 3.3 ހެކްޓަރު ބިން ހިއްކުމަށް ވަނީ ހަމަޖެހިފައެވެ. 18 މަސްދުވަސް ތެރޭގައި ނިންމުމަށް ޙަވާލުކުރި މި މަޝްރޫއަކީ ޖުމްލަ 1.3 ބިލިއަން ރުފިޔާގެ މަޝްރޫއެކެވެ.
އިންޑިއަން އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން, އައްޑޫ ސިޓީގެ މަގުހެދުމާއި ފެން ހިންދުމުގެ ނިޒާމް ގާއިމްކުރުމަށްޓަކައި 21 ފެބްރުއަރީ 2021ގައި މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރާ އިންޑިއާގެ އެފްކޯންސް އިންފްރާސްޓްރަކްޗަރ ލިމިޓެޑާ ދެމެދު ސޮއިކުރެވުނެވެ. މި މަޝްރޫއުގެ އަގު 77،630،898.00 (ހަތްދިހަ ހަތް މިލިއަން ހަސަތޭކަ ތިރީސް ހާސް އަށްސަތޭކަ ނުވަދިހަ އަށް) ޔޫއެސް ޑޮލަރަށް އަރާއިރު, އެއީ ދިވެހި ރުފިޔާއިން ބަލާނަމަ 1,197,068,447.16 (އެއްބިލިއަން އެއްސަތޭކަ ނުވަދިހަ ހަތް މިލިއަން ފަސް ދޮޅަސް އަށްހާސް ހަތަރުސަތޭކަ ސާޅީސް ހަތް ރުފިޔާ ސޯޅަ ލާރި)އެވެ. މި މަޝްރޫއު ނިންމުމަށް ދީފައިވަނީ 730 ދުވަހެވެ.
