ޖަރުމަނު ލީގުގައި ވުލްވްސްބާގާ ދެކޮޅަށް ކުޅުނު މެޗުން މޮޅުވެ ބަޔާން މިއުނިކުން އަލުން އެއް ވަނަ އަށް ޖެހިލައިފި އެވެ.

އާދިއްތަ ދުވަހުގެ ރޭ ބަޔާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 4-2 އިންނެވެ. މެޗުގައި ބަޔާންގެ ފުރަތަމަ ލަނޑު ނުވަ ވަނަ މިނެޓުގައި ޖެހީ ކިންގްސްލީ ކޯމަން އެވެ. އެއީ އަލްފޮންސޯ ޑޭވިސްގެ އެހީތެރިކަމާއެކު އޭނާ ޖެހި ލަނޑެކެވެ. އޭގެ ހަ މިނެޓު ފަހުން ޔާއޯ ކަންސޭލޯ ތަނަވަސްކޮށްދިން ފުރުސަތެއްގައި ކޯމަން ވަނީ ދެ ވަނަ ލަނޑު ޖަހައި، ބަޔާނަށް ލީޑު ފުޅާކޮށްދީފަ އެވެ. މެންޗެސްޓަރ ސިޓީ ދޫކޮށް ބަޔާނަށް ބަދަލުވި ކަންސޭލޯގެ ފުރަތަމަ މެޗުގައި ވެސް އޭނާ ވަނީ މޮޅު ކުޅުމެެއް ދައްކައިފަ އެވެ. މެޗުގެ 19 ވަނަ މިނެޓުގައި ބަޔާންގެ ތިން ވަނަ ލަނޑު ތޯމަސް މުލާ ޖެހީ ޔޯސުއާ ކިމިކް ތަނަވަސްކޮށްދިން ފުރުސަތެއްގަ އެވެ. ފުރަތަމަ ހާފު ނިމުމުގެ ކުރިން ވުލްވްސްބާގްގެ ޖަކޫބް ކަމިންސްކީ ވަނީ އެ ޓީމުގެ ފުރަތަމަ ލަނޑު ޖަހައިފަ އެވެ. ދެ ވަނަ ހާފު ފަށައިގެން ބަޔާނަށް އުނދަގޫވީ މެޗުގެ 54 ވަނަ މިނެޓުގައި ދެ ވަނަ ރީނދޫ ކާޑާއެކު ކިމިކް އަށް ރަތް ކާޑު ދެއްކުމުންނެވެ. މެޗުގެ ބާކީ ބައި އެ ޓީމުން ފުރިހަމަ ކުރީ 10 ކުޅުންތެރިންނާއެކު އެވެ. މެޗުގެ 73 ވަނަ މިނެޓުގައި ބަޔާންގެ ހަތަރު ވަނަ ލަނޑު ބެންޖަމިން ޕަވާޑު ދިން ބޯޅައަކުން ޖެހީ ޖަމާލް މުސިއާލާ އެވެ. ވުލްވްސްބާގްގެ ދެ ވަނަ ލަނޑު 81 ވަނަ މިނެޓުގައި ޖެހީ މަޓިއަސް ސްވަންބާގް އެވެ.

މެޗުން މޮޅުވެ ބަޔާން އޮތީ އެއް ވަަނައިގަ އެވެ. އެއީ ކުޅުނު 19 މެޗުން 40 ޕޮއިންޓާއެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތީ ޔޫނިއަން ބާލިން އެވެ.