ކޮރަޕްޝަނަށް އޮތް ހިރާސް ކުޑަކުރުމަށް މަސައްކަތް ކުރުމަށް އޭސީސީއާ ކަސްޓަމްސްއާ ދެމެދު އެމްއޯޔޫއެއްގައި ސޮއިކޮށްފި
ކޮރަޕްޝަން ހިނގިޔަނުދިމަށްޓަކައި ދެ މުއައްސަސާ ގުޅިގެން ކުރެވޭނެ މަސައްކަތްތައް ދެނެގަނެވޭނެ
ކޮރަޕްޝަނަށް އޮތް ހިރާސް ކުޑަކުރުމަށް މަސައްކަތްކުރުމަށް އޭސީސީއާ ކަސްޓަމްސްއާ ދެމެދު އެމްއޯޔޫގައި ސޮއިކުރުން
ކަސްޓަމްސް ދާއިރާގައި ނަޒާހަތްތެރިކަން ކުރިއަރުވައި މަސައްކަތުގައި އެއްބާރުލުން ދިނުމަށް ދާއިރާތައް ކަނޑައަޅައި، ގުޅިގެން މަސައްކަތްކުރުމަށް، އެންޓި-ކޮރަޕްޝަން ކޮމިޝަނާ މޯލްޑިވްސް ކަސްޓަމްސް ސަރވިސްއާ ދެމެދު ފަހުމުނަމާއެއްގައި ސޮއިކޮށްފިއެވެ.
މޯލްޑިވްސް ކަސްޓަމްސް ސަރވިސްގައި ބޭއްވި ރަސްމިއްޔާތެއްގައި މި ފަހުމުނާމާގައި އެންޓި-ކޮރަޕްޝަން ކޮމިޝަނުގެ ފަރާތުން ސޮއިކުރެއްވީ ކޮމިޝަނުގެ ރައީސް އާދަމް ޝާމިލެވެ. އަދި ކަސްޓަމްސްގެ ފަރާތުން ސޮއިކުރެއްވީ ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފެވެ.
މި ފަހުމުނާމާއަކީ ކަސްޓަމްސް ދާއިރާގައި ނަޒާހަތްތެރިކަން ކުރިއަރުވައި އިދާރީ ހިންގުމުގެ ތެރެއިންނާއި، ޚިދުމަތް ދިނުމުގައި ކޮރަޕްޝަނަށް އޮތް ހިރާސް ކުޑަކުރުމަށް ގުޅިގެން މަސައްކަތްކުރުމަށާއި، މިފަދަ ގޮންޖެހުންބޮޑު މަސައްކަތްތަކެއް ކުރިއަށްއޮތްތަނުގައި ވަކި މިސްރާބެއް ކަނޑައަޅައިގެން ކުރުމަށް ދެފަރާތުގެ މެދުގައި ވެވުނު އެއްބަސްވުމެކެވެ.
މި ރަސްމިއްޔާތުގައި ވާހަކަފުޅުދައްކަވަމުން އެންޓި-ކޮރަޕްޝަން ކޮމިޝަނުގެ ނާއިބު ރައީސް އަބްދުއްސަލާމް ވިދާޅުވީ، އޭސީސީން ދައުލަތުގެ އިދާރާތަކާއެކު ސޮއިކުރާ މިފަދަ ކޮންމެ އެއްބަސްވުމަކީވެސް ގިނަ ދުވަސްތަކެއްގެމަތިން ކުރެވޭ މުހިއްމު މަޝްވަރާތަކަކަށްފަހު، އިދާރާތަކުގެ މަސައްކަތްތައް ހަލުއިކޮށް އިތުރުބާރުހިފޭ ފަސޭހަ ނިޒާމެއްގެ ތެރެއިން ޚިދުމަތް ފޯރުކޮށްދިނުމަށް ސޮއިކުރާ މުހިއްމު ފަހުމުނާމާއެއްކަމަށެވެ.
އެހެންކަމުން މިފަދަ އެމްއޯޔޫތަކުގައި ސޮއިކުރުމުން އަމާޒުވާ ފާޑުކިއުންތަކަށް ބެލުމެއް ނެތި ގާނޫނުން މަތިކޮށްފައިވާ ޒިންމާތައް އަދާކުރުމަށް ކޮންމެ މުއްސަސާއަކުންވެސް މަސައްކަތް ކުރަންޖެހޭކަމަށެވެ.
މިރަސްމިއްޔާތުގައި ކޮމިޝަނަރ ޖެނެރަލް އޮފް ކަސްޓަމްސް ވިދާޅުވީ، ކަސްޓަމްސްގެ މުވައްޒަފުންގެ މެދުގައި ނަޒާހަތްތެރިކަން ކުރިއަރުވައި، މިދާއިރާއިން އެންމެ އެދެވޭ ގޮތެއްގައި ޚިދުމަތްދިނުމުގެ ކަންކަން ބައްޓަންކުރުމަށް އޭސީސީގެ ފަންނީ ލަފާ ކަސްޓަމްސްއަށް ލިބެމުންދާކަމަށާއި، މި ސޮއިކުރެވުނު ފަހުމުނާމާގެ ސަބަބުން އެ މަސައްކަތްތައް އިތުރު ހަރުފަތްތަކަށް ކުރިއަރައިގެން ދާނެކަމަށެވެ.
މިރަސްމިއްޔާތުގައި އޭސީސީގެ މެންބަރުންނާއި އިސް ބައެއް ވެރިންގެ އިތުރުން މޯލްޑިވްސް ކަސްޓަމްސް ސަރވިސްގެ އިސް ބައެއް ވެރިން ބައިވެރިވެވަޑައިގެންނެވިއެވެ.
