ދުވާލެއްގެ މައްޗަށް 5567 ފަތުރުވެރިން އައިސްފައިވޭ
ފަތުރުވެރިން އަންނަ އަދަދު ވަނީ އިތުރުވާން ފަށާފައި
ޖެނުއަރީ 25 ވަނަ ދުވަހުގެ ނިޔަލަށް 155,886 ފަތުރުވެރިން ރާއްޖެ އަތުވެއްޖެއެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން، މިހާތަނަށް 155,886 ފަތުރުވެރިން ރާއްޖެ އައިސްފައިވާއިރު، މިއީ މިދިޔަ އަހަރުގެ މި މުއްދަތާ އަޅައިބަލާއިރު 32.5 އިންސައްތަ އިތުރު އަދަދެކެވެ.
2022 ވަނަ އަހަރުގެ މި މުއްދަތުގައި އައިސްފައިވަނީ 117,608 ފަތުރުވެރިންނެވެ. އަދި 2021 ވަނަ އަހަރު އައިސްފައިވަނީ 81,117 ފަތުރުވެރިންނެވެ. ޓުއަރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން، ދުވާލެއްގެ މައްޗަށް 5567 ފަތުރުވެރިން އައިސްފައިވެއެވެ. އަދި އެވްރެޖްކޮށް 8 ދުވަހު މަޑުކޮށްފައިވެއެވެ.
މިއަހަރުގެ ޓޮޕް 10 މާކެޓްގެ ތެރޭގައި ހިމެނެނީ ރަޝިއާ، އިންޑިއާ، އިޓަލީ، އިނގިރޭސިވިލާތް، ޖަރުމަނުވިލާތް، އެމެރިކާ، ފްރާންސް، ޗައިނާ، ކަޒަކިސްތާން އަދި ސްވިޒަލޭންޑެވެ.
މިހާތަނަށް 172 ރިސޯޓުން އަންނަނީ ހިދުމަތް ދެމުންނެވެ. އެއީ 41،049 އެނދެވެ. 1640 އެނދާއެކު 13 ހޮޓަލަކުން ހިދުމަތް ދެމުން އަންނަ އިރު، 14،178 އެނދާއެކު 877 ގެސްޓްހައުސްއިން އަންނަނީ ހިދުމަތް ދެމުންނެވެ. އަދި 2901 އެނދާއެކު 157 ސަފާރީތައް އަންނަނީ އޮޕަރޭޓް ކުރަމުންނެވެ.
