އިނގިރޭސި އެފްއޭ ކަޕްގެ ހަތަރު ވަނަ ބުރުގައި ޕްރެސްޓަން ނޯތު އެންޑް ބަލިކޮށް ޓޮޓެންހަމުން މުބާރާތުގެ ފަސް ވަނަ ބުރަސް ދަތުރުކޮށްފި އެވެ.
ހޮނިހިރު ދުވަހުގެ ރޭ ކުޅުނު މެޗު ޓޮޓެންހަމުން ކާމިޔާބު ކުރީ 3-0 އިންނެވެ. މެޗުގައި އެ ޓީމުގެ ތިން ލަނޑު ވެސް ޖަހާފައި ވަނީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ފަސް ވަނަ މިނެޓުގައި ޓޮޓެންހަމަށް ލީޑު ނަގައިދިނީ ސައުތު ކޮރެއާގެ ސޮން ހެއުން މިން އެވެ. އެއީ އެ ޓީމުގެ ޓަންގަންޑާ ދިން ބޯޅައެއް އޭރިޔާ ބޭރު ހުރެ ގޯލަށް ފޮނުވާލައިގެން ސޮން ކާމިޔާބުކޮށްދިން ލަނޑެކެވެ. ޓޮޓެންހަމްގެ ދެ ވަނަ ލަނޑު ވެސް ޖެހީ ސޮން އެވެ. އެއީ މެޗުގެ 69 ވަނަ މިނެޓުއި އިވާން ޕެރިސިޗް ދިން ބޯޅައެއް ގޯލަށް ފޮނުވާލައިގެންނެވެ. އެ ޓީމުގެ ތިން ވަނަ ލަނޑު މެޗުގެ 87 ވަނަ މިނެޓުގައި ޖެހީ އާނައުޓް ޑަންޖޫމާ އެވެ. އޭނާ ކުޅެން ނިކުމެފައި ވަނީ ބަދަލު ކުޅުންތެރިޔެއްގެ ގޮތުގަ އެވެ.
މެޗަށްފަހު ޓޮޓެންހަމްގެ ކޯޗު އެންޓޯނިއޯ ކޮންޓޭ ބުނީ އޭނާ ދައްކަމުން އަންނަ ވާހަކަތަކަކީ ހަގީގަތެއްކަން ކުޅުންތެރިން ސާބިތުކޮށްދެމުން އަންނަ ކަމަށެވެ. އެގޮތުން މެޗުގައި ވެސް ފެނުނީ ޓޮޓެންހަމްގެ ކުޅުންތެރިން ޓީމެއްގެ ގޮތުގައި ކުޅެފި ނަމަ، އެ ޓީމާ ދެކޮޅަށް ކުޅެން އިދިކޮޅު ޓީމަށް އުނދަގޫވާ މަންޒަރު ކަމަށެވެ. އިތުރަށް ކޮންޓޭ ބުނީ އަމާޒަކީ ރަނގަޅު ކުރަން ހުރި ކަންކަމާއެކު ކުރިއަސް ދިޔުން ކަމަށެވެ.
