ފަންނާނުންގެ މެޗު ކާމިޔާބުކުރީ ސުޕަސްޓާ ޓީމުން
28 ޖެނުއަރީ 2023 | ހޮނިހިރު 07:48ރާއްޖޭގެ މަޝްހޫރު ކޮމީޑިއަން ހުސެއިން ޝާދު (މަޓޭ) ރެފްރީކަން ކުރި މެޗު 14-11 އިން ކާމިޔާބުކުރީ ސުޕަސްޓާ ޓީމު
ގަލޮޅު ރަސްމީ ދަނޑުގައި ކުޅުނު މެޗުގެ ތެރެއިން - ފޮޓޯ/ ވަގުތު
މުނިފޫހިފިލުމުގެ ދާއިރާގައި ހަރަކާތްތެރިވާ އިންޑިއާގެ ބޮލީވުޑް ފަންނާނުންނާއި ދިވެހި ފަންނާނުން ގުޅިގެން ކުޅުނު ފުޓުބޯޅަ މެޗު ސުޕަސްޓާ ޓީމުން ކާމިޔާބުކޮށްފި އެވެ.
މި މެޗު ކުޅެފައިވަނީ ހުކުރު ދުވަހުގެ ރޭ ގަލޮޅު ރަސްމީ ދަނޑުގަ އެވެ. މި މެޗު ކުޅެފައިވަނީ ދެ ޤައުމުގެ ފަންނާނު ދެ ޓީމަކަށް ބަހާލައިގެންނެވެ. އެއީ ރޮކްސްޓާ ޓީމާއި ސުޕަސްޓާ ޓީމެވެ. ރާއްޖޭގެ މަޝްހޫރު ކޮމީޑިއަން ހުސެއިން ޝާދު (މަޓޭ) ރެފްރީކަން ކުރި މެޗު 14-11 އިން ކާމިޔާބުކުރީ ސުޕަސްޓާ ޓީމެވެ. މި މެޗުގައި ކުޅުނު ދިވެހިން ފަންނާނުންގެ ތެރޭގައި މަޝްހޫރު ނެށުންތެރިޔާ ޖާދުﷲ އިސްމާއީލް، ކޮމީޑިއަންނުން ކަމުގައިވާ ނަޒީރު ޝިހާމް (ކާއްޓޭ)، އަލީ ސީޒަންގ ފަދަ ފަރާތްތައް ހިމެނެ އެވެ. މީގެ އިތުރުން މި މެޗުގައި ކުޅުނު އިންޑިއާގެ ފަންނާނުންގެ ތެރޭގައި އަފްތާބް ޝިވްދާސާނީ، ޝަރުމަން ޖޯޝީ އަދި ރޯހިތު ބޯސް ރޯއީ ހިމެނެ އެވެ.
މި މެޗުގައި ޝަރަފުވެރި މެހުމާނަކީ މިސް ޔުނިވަރސް އިންޑިއާގެ މަގާމު ދެ ފަހަރު ހޯދާފައިވާ އެކްޓްރެސް އުރުވަޝީ ރައުޓެލާ އެވެ. މެޗަށްފަހު އޭނާ ވަނީ މޮޅުވި ޓީމަށް ޓްރޮފީ ވެސް ހަވާލުކޮށްފަ އެވެ. މެޗު އިންތިޒާމު ކުރުމުގައި ހަރަކާތްތެރިވެފައި ވަނީ އިންޑިއާގެ އިވެންޓް މެނޭޖްމަންޓްގައި ހަރަކާތްތެރިވާ ޓުއަރނިވަލް ކުންފުންޏެވެ.
