"ސިޔާސީ ހަރަކާތްތަކުގެ ނަމުގައި ރައީސްގެ ސަލާމަތަށް ނުރައްކާކުރުމުގެ ފުރުސަތެއް ނުލިބޭނެ"
ކެމްޕޭން ދަތުރުތަކުގައި ރައީސްގެ ސެކިއުރިޓީ ވަރުގަދަކުރުމާގުޅިގެން ގިނަ ފާޑުކިޔުންތަކެއް އަމާޒުވަމުންދޭ
ރައީސް އޮފީހުގެ ތަރުޖަމާނު މިއުވާން މުހައްމަދު
ސިޔާސީ ހަރަކާތްތަކުގެ ނަމުގައި ރަށުތެރޭގެ ހަމަޖެހުން ނަގާލައި ރައީސުލްޖުމްހޫރިއްޔާގެ ސަލާމަތަށް ނުރައްކާކުރުމުގެ ފުރުސަތެއް ސަލާމަތީ ޚިދުމަތްތަކަކުން ނުދޭނެ ކަމަށް ރައީސް އޮފީހުން ބުނެފިއެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ރައީސްގެ ކެމްޕޭން ދަތުރުފުޅުތަކުގައި ރަށްރަށުގައި ސަލާމަތީ ކަންކަން ވަރުގަދަކުރުމާއި ގުޅިގެން އެކި ގޮތްގޮތަށް ވާހަކަ ދެކެވެމުންދާކަމަށެވެ.
މިއުވާން ވިދާޅުވީ ސަރުކާރުން އަބަދުވެސް އެއްވެ އުޅުމާއި ޚިޔާލު ފާޅުކުރުމުގެ މިނިވަންކަން ދޭނެ ކަމަށެވެ. ކެމްޕޭންގެ ތެރޭގައިވެސް ޝުއޫރުފާޅުކުރަން ބޭނުންވާ ފަރާތްތަކަށް އެ ފުރުސަތުވެސް ދެމުންދާކަމަށާއި، ރައީސް ސާލިހަކީ މަލްޓި ޕާޓީ ޑިމޮކްރެސީއަށް ވަރަށް ފަރިތަ ބޭފުޅެއް ކަމަށް މިއުވާން ވިދާޅުވިއެވެ.
އެހެންނަމަވެސް ސިޔާސީ ހަރަކާތްތަކުގެ ނަމުގައި ރައީސުލްޖުމްހޫރިއްޔާގެ ސަލާމަތަށް ނުރައްކާކުރުމުގެ ފުރުސަތެއް ސަލާމަތީ ޚިދުމަތްތަކަކުން ނުދޭނެ ކަމަށް މިއުވާން ވިދާޅުވިއެވެ.
މިއުވާން އިތުރަށް ވިދާޅުވީ އިދިކޮޅު ފަރާތްތަކުގެ ޚިޔާލު ފާޅުކުރުމުގެ މިނިވަންކަމަކީ ސަރުކާރުގެ ޕާޓީތަކުން ބާއްވާ ސިޔާސީ ހަރަކާތްތަކަށް ހުރަސްއެޅޭ ގޮތަށް ކުރެވޭ ކަމަކަށް ވެގެންނުވާނެ ކަމަށެވެ.
