ޝަރީއަތް ކުރުމާބެހޭ ނިޒާމު ފުރިހަމަވެގެން ދަނީ ހެއްކާބެހޭ ޤާނޫނާއެކުކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

ދައުލަތުގެ މީޑިއާގައި ވާހަކަ ދައްކަވަމުން ޝަމީމް ވިދާޅުވީ، ހެއްކާބެހޭ ޤާނޫނަކީ ޕްރޮސެކިއުޓަރ ޖެނެރަލް އޮފީހުން ކުރާ މަސައްކަތުގެ މައިގަނޑު އެއް ވަސީލަތް ކަމަށެވެ.

މި ޤާނޫނު ވުޖޫދަށް އައުމުގެ ކުރިން ދިމާވަމުން ދިޔަ އެންމެ ބޮޑު ގޮންޖެހުމަކީ ކޯޓަށް ހުށައަޅާ ހެކީގެ ތެރެއިން ބަލައިގަނެވޭނެ ހެއްކާއި، ބުރަދަން ދެވޭނެ ހެއްކާއި، ހެކި ބަލައި ނުގަންނަ ނަމަ ދެން އަމަލު ކުރަންވީ ގޮތާއި، އެކަންކަމާ ގުޅޭ ތަފްސީލުތައް ޤާނޫނެއްގައި ބަޔާންވެފައި ނެތުން ކަމަށް ޝަމީމް ވިދާޅުވިއެވެ.

ޖިނާއީ މައްސަލަތަކުގައި ސާބިތު ކުރުމުގެ މިންގަނޑު ތަފާތުކަން ފާހަގަ ކުރައްވައި ޝަމީމް އިތުރަށް ވިދާޅުވީ، އެ މިންވަރަށް ސާބިތު ކުރަން ބޭނުންކުރާ އެއްޗަކީ ހެކި ކަމަށާއި، މީގެ ކުރިން މަސައްކަތް ކުރަމުން ދިޔައީ އެ ހެކި ހުށައަޅާނެ ގޮތުގެ ތަފްސީލުތައް ނެތި ކަމަށެވެ.

2008 ވަނަ އަހަރުގައި ޤާނޫނު އަސާސީއިން ޖިނާޢީ އަދުލުގެ ނިޒާމަށް ގެނައި ބަދަލުތަކުގެ ތެރެއިން މައިގަނޑު ބޮޑު 3 ޤާނޫނެއް މިހާރު ވުޖޫދުވެގެން އައިސްފައިވާކަން ފާހަގަ ކުރައްވައި ޝަމީމް ވިދާޅުވީ، ފުރަތަމަ ޤާނޫނަކީ ޕީނަލް ކޯޑް ނުވަތަ ޤާނޫނުލްއުޤޫބާތު ކަމަށެވެ.

އަދި ދެވަނަ ޤާނޫނަކީ ޖިނާޢީ އިޖުރާޢަތުގެ ޤާނޫނު ކަމަށާއި، ތިންވަނަ ޤާނޫނަކީ ހެއްކާބެހޭ ޤާނޫނުކަމަށް ޝަމީމް ވިދާޅުވިއެވެ.

ޝަމީމް ވިދާޅުވީ، މިހާރު މި 3 ޤާނޫނުވެސް ވުޖޫދަށް އައިސްފައިވާއިރު، ޝަރީޢަތްކުރުމާބެހޭ ނިޒާމު ފުރިހަމަވެފައިވާކަމަށެވެ. އެއީ ވަރަށް ބޮޑު ބަދަލެއް މުޅި ނިޒާމަށް އަންނާނެ ކަމެއްކަމަށްވެސް ޝަމީމް ވިދާޅުވިއެވެ.

އޭގެ އިތުރުން، މިހާރު ޝަރުޢީ މަރުހަލާގައި ދިމާވާ ގިނަ ކަންކަމަށް ޙައްލު ހޯދޭނެ ގޮތްތައްވެސް ހެއްކާބެހޭ ޤާނޫނުން ފަހިކޮށްދީފައިވާ ކަމަށެވެ.

ހެއްކާބެހޭ ޤާނޫނަކީ، މަދަނީ މައްސަލަތަކާއި ޖިނާޢީ މައްސަލަތަކުގައި ހެކިބަސް ނެގުމާއި، ހެކި ހުށަހެޅުމާއި، ހެކި ބަލައިގަތުމާއި، ހެކި ވަޒަންކުރުމުގައި ތަބާވާންޖެހޭ އުޞޫލުތަކާއި، ކަމެއް ސާބިތުކުރުމަށް ހެކި ބޭނުންވާ ނިސްބަތާއި އެނޫންވެސް ހެއްކާބެހޭ ޢާންމު އުޞޫލުތައް ކަނޑައެޅުމުގެ ޤާނޫނެވެ.

މިޤާނޫނު ގެޒެޓު ކުރެއްވީ 18 ޖުލައި 2022 ގައެވެ. ޢަމަލުކުރަން ފަށާން އޮތީ، އޭގެ 6 މަސްދުވަސްފަހުން، 18 ޖަނަވަރީ 2023 ގައެވެ.