މި އަހަރުގެ ތެރޭގައި ކޮމިއުނިޓީ ބޭސްޑް ރިހެބިލިޓޭޝަން 5 ސަރަޙައްދެއްގައި ފެށޭނެ: އެންޑީއޭ
ޑިޓޮކްސިފިކޭޝަނަށް ބޭނުންވާ ބޭސްވެސް މިހާރު ބަރާބަަރަށް ލިބެމުންދޭ
ނޭޝަނަލް ޑްރަގް އޭޖެންސީން ބޭއްވި ނޫސްވެރިންގެ ބައްދަލުވުން
މި އަހަރުގެ ތެރޭގައި ކޮމިއުނިޓީ ބޭސްޑް ރިހެބިލިޓޭޝަން 5 ސަރަޙައްދެއްގައި ފެށޭނެކަމަށް ނޭޝަނަލް ޑްރަގް އޭޖެންސީ (އެންޑީއޭ) އިން ބުނެފިއެވެ.
ނޭޝަނަލް ޑްރަގް އޭޖެންސީން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އެ އޭޖެންސީގެ ސީއީއޯ އިމާދު ސޯލިޙު ވިދާޅުވީ، މިދިޔަ 3 މަސް ދުވަހުގެ ތެރޭގައިވެސް އެ އޭޖެންސީން ގިނަ މަސައްކަތްތަކެއް ކުރެވިފައިވާ ކަމަށެވެ.
އިމާދު ވިދާޅުވީ، ކ ހިންމަފުށީގައި ހިންގަމުންދިޔަ އަންހެނުންގެ ރިހެބިލިޓޭޝަން ސަރވިސް މިހާރު ހުޅުމާލޭ ހާފްވޭ ހައުސްގެ ޚިދުމަތަށް ގުޅުވާލެވިފައިވާ ކަމަށާއި، މިވަގުތުވެސް 6 ކްލައިންޓުން އެބަތިބި ކަމަށެވެ.
އޭގެ އިތުރުން، އައްޑޫ ހުޅުމީދޫގައި މި ސަރުކާރުން ޤާއިމުކުރި ސެންޓަރަކީ ޒަމާނީ ވިސްނުމަކާއެކު ބިނާކުރެވުނު ސެންޓަރެއްކަން ފާހަގަ ކުރައްވައި އިމާދު ވިދާޅުވީ، އެ ސެންޓަރުގައި އަލަށް ތައާރަފު ކުރަން ޖެހޭ ޕްރޮގްރާމްތައް ތައާރަފް ކުރުމަށްޓަކައި ގިނަ މަސައްކަތްތަކެއް ކުރެވެމުންދާ ކަމަށެވެ.
އޭގެ އިތުރުން، މެތަޑޯން ޑިސްޕެންސް ޕްރޮގްރާމެއް މުޅިން އަލަށް ހޯމަ ދުވަހުން ފެށިގެން ފެށިފައިވާ ކަމަށާއި، ވެއިޓްލިސްޓް ކުރެވިފައިވާ ތަރުތީބުން ފުރުސަތު ދެވޭނެކަމަށް އޭނާ ވިދާޅުވިއެވެ.
ޑިޓޮކްސިފިކޭޝަނަށް ބޭނުންވާ ބޭސްވެސް މިހާރު ބަރާބަަރަށް ލިބެމުންދާކަމަށް އޭނާ ވިދާޅުވިއެވެ.
ހިތަދޫގެ ޑިޓޮކްސް ސެންޓަރު ހިތަދޫ ރީޖަނަލް ހޮސްޕިޓަލަށް ބަދަލު ކުރެވިފައިވާއިރު، މިހަފްތާގެ ބުރާސްފަތި ދުވަހުން ފެށިގެން 15 ކްލައިންޓުންގެ ބެޗަކާއެކު އަލުން ޑިޓޮކްސިފިކޭޝަންވެސް ފެށޭނެކަމަށްވެސް އިމާދު ވިދާޅުވިއެވެ.
ކ ގުޅީގައި ހިންގަމުން ދިޔަ ސެންޓަރުގައި ދިމާވި ދަތިތަކާއި ގުޅިގެން އެ ތަނުގައި ތިބި ކްލައިންޓުން މިހާރު ހިންމަފުށީ ޕްރޮގްރާމްގެ ތެރެއަށް އެންރޯލް ކުރެވިފައިވާކަމަށްވެސް އޭނާ ވިދާޅުވިއެވެ. އެގޮތުން ގުޅީފަޅުގައި އެ ޕްރޮގްރާމް ހިންގިއިރު ގެންދެވުނީ 10 ކްލައިންޓުން ނަމަވެސް، މިހާރު އެ އަދަދު ދެގުނަ ކުރެވިފައިވާކަމަށް ވިދާޅުވިއެވެ.
އަދި މިއަހަރުގެ ތެރޭގައި ކޮމިއުނިޓީ ބޭސްޑް ރިހެބިލިޓޭޝަން 5 ސަރަޙައްދެއްގައި ފެށޭނެ ކަމަށާއި، އޭގެ ފުރަތަމަ ފިޔަވަހި ހދ ކުޅުދުއްފުށީގައި މިމަހު 26 ގައި ފެށޭނެކަމަށްވެސް އިމާދު ވިދާޅުވިއެވެ. އެގޮތުން އެންޑީއޭގެ މުވައްޒަފުން މިހާރު ކުޅުދުއްފުއްޓަށް ފޮނުވިފައިވާކަމަށްވެސް އޭނާ ވިދާޅުވިއެވެ.
2022 ވަނަ އަހަރު އެންޑީއޭއިން ވަނީ 727 ފަރާތެއްގެ އެސެސްމަންޓު ހަދާފައެވެ. އޭގެ ތެރޭގައި ޑްރަގް ކޯޓުގެ ޙުކުމާއި ގުޅޭ މީހުންނާއި، އަމިއްލައަށް އަންނަ ފަރާތްތަކާއި އަދިވެސް އިތުރު ފަރާތްތައް ހިމެނެއެވެ.
އޭގެ ތެރެއިން 694 މީހުންނަކީ ފިރިހެނުންނެވެ. 33 މީހުންނަކީ އަންހެނުންނެވެ.
އޭގެ އިތުރުން 2022 ވަނަ އަހަރު 257 ފަރާތަކުން ވަނީ ފަރުވާ ފުރިހަަމަކޮށްފައެވެ. އޭގެ ތެރޭގައި 24 އަންހެނުން ހިމެނެއެވެ.
