ދުނިޔޭގެ އިޤްތިޞާދީ ކުރިއެރުމުގެ ދުވެލި ބާރުވުމުގެ ކުރިން މި އަހަރު އިންތިހާއަށް މަޑުޖެހޭނެ!

ޔޫކްރައިންގައި ކުރަމުންދާ ވަރުގަދަ ހަނގުރާމަ އެ ގޮތުގައި ކުރިއަށް ގޮސް، އިންޓްރަސްޓް ރޭޓްތައް އުފުލެމުން ދިޔަ ކަމުގައި ވީ ނަމަވެސް، ދުނިޔޭގެ އިޤްތިޞާދު، ކޮންމެވެސް ވަރަކަށް ހެޔޮ ފާލަކަށް އެޅިދާނެ ކަމުގެ އިޝާރާތެއް، ބައިނަލްއަޤްވާމީ މާލީ އިދާރާ (އައިއެމްއެފް) އިން ކުރީ ޖެނުއަރީ 17 ވަނަ ދުވަހުއެވެ.

ޑާވޯސްގައި ކުރިއަށް ދިޔަ ވޯލްޑް އިކޮނޮމިކް ފޯރަމްގައި ތަޤުރީރު ކުރައްވަމުން، އައިއެމްއެފްގެ މެނޭޖިންގް ޑައިރެކްޓަރ ކްރިސްޓަލީނާ ޖޯޖީވާ ވިދާޅުވީ، ދުނިޔޭގެ އިޤްތިޞާދު ހެޔޮ ފާލަކަށް އެޅުމުގެ ކުރިން، މި ހިނގާ 2023 ވަނަ އަހަރަކީ ދުނިޔޭގެ އިޤްތިޞާދީ ކުރިއެރުން އޭގެ އެންމެ އިންތިހާއަށް ދަށްވެގެންދާނެ އަހަރެއް ކަމަށެވެ.

ދުނިޔޭގެ އިޤްތިޞާދީ ކުރިއެރުމުގެ ދުވެލި، 2022 ވަނަ އަހަރު ހުރީ 3.2 ޕަސެންޓްގައި ކަމަށް ވީ ނަމަވެސް، އައިއެމްއެފްގެ އަންދާޒާތަކުން ދައްކާ ގޮތުގައި، މި އަހަރު، ދުނިޔޭގެ އިޤްތިޞާދީ ކުރިއެރުމުގެ ދުވެލި، 2.7 ޕަސެންޓަށް މަޑުޖެހިގެންދާނެއެވެ.

މައިގަނޑު 3 ގޮންޖެހުމަކާ ކުރިމަތިލާން ޖެހިފައި ވާ ކަން ފާހަގަ ކުރައްވަމުން ޖޯޖީވާ ވިދާޅުވީ އެއީ ރަޝިއާއިން ޔޫކްރައިންގައި ކުރަމުންދާ ހަނގުރާމައާއި، ދިރިއުޅުމުގެ ޚަރަދުތައް ބޮޑުވެގެން ދިއުމާއި، އިންޓްރަސްޓް ރޭޓްގެ އަގުތައް އުފުލުން ކަމަށެވެ. މި ޢަދަދުތައް އުފުލިފައި ވަނީ ކައިރި މާޒީގައި ފާއިތުވެ މިދިޔަ އަހަރުތަކުގައި އުފުލިފައި ނުވާހާ މަތީ މިންވަރަކަށް ކަމަށްވެސް ޖޯޖީވާ ވަނީ ފާހަގަ ކުރައްވާފައެވެ.

ޑާވޯސް ފޯރަމްގައި ވާހަކަދައްކަވަމުން ސައުދީ ޢަރަބިއްޔާގެ ފޮރިން މިނިސްޓަރު، ޕްރިންސް ފައިސަލް ބިން ފަރްހާން އަލް ސަޢުދު ވިދާޅުވީ، ތެލުގެ އަގުތައް އެއް ހަމައެއްގައި ހިފެހެއްޓިފައި އޮތް އޮތުމަކީ، ތެޔޮ އުފައްދާ މިންވަރުގެ އަމާޒުތައް ކަނޑައެޅުމުގައި އޯޕެކް ޕްލަސްގެ ޤައުމުތަކާއި އެމެރިކާއާ ދެމެދު މިދިޔަ އަހަރު އުފެދުނު ދެބަސްވުންތަކުގައި، ސައުދީއިން ޚިޔާރު ކުރީ ރަނގަޅު ރާސްތާއެއްކަން އަންގައިދޭ ކަމެއް ކަމަށެވެ.

ދުނިޔޭގެ ބާޒާރަށް އެންމެ ފުޅާ ދާއިރާއެއްގައި ތެޔޮ ސަޕްލައި ކުރަމުންދާ ސައުދީގެ ފޮރިން މިނިސްޓަރު އިތުރަށް ވިދާޅުވީ، ތެލުގެ ބާޒާރާއި ބައިނަލްއަޤުވާމީ އިޤްތިޞާދީ މައިދާނުގައި ހަމަޖެހުން ޤާއިމު ކުރުމުގެ ޒިންމާ، އެ ޤައުމުގެ ކޮނޑުގައި އެޅިފައި ވާ ކަމަށާ، ކުރިމަތިލާން ޖެހޭ މައްސަލަތަކުގައި އެމެރިކާގެ ސަރުކާރާއެކު މަޝްވަރާތައް ކުރިއަށް ގެންދާނެ ކަމަށެވެ.

ސާފު ހަކަތައިގެ މުސްތަޤުބަލަށް ސައުދީއިންވެސް އެއްބާރުލުން ދޭ ކަމަށާ، ނަމަވެސް ޒަމާނުއްސުރެ ބޭނުން ކުރަމުން އަންނަ ހަކަތައިގެ މަސްދަރުތައް ކަށަވަރު ކުރުމަކީވެސް ކުރަން ޖެހޭ ކަމެއް ކަމަށް ޕްރިންސް ފައިސަލް ބިން ފަރްހާން އަލް ސަޢުދު ވަނީ ވިދާޅުވެފައެވެ.

ދުނިޔޭގެ އެންމެ ވަރުގަދަ އިޤްތިޞާދުތަކުން، އެ ދާއިރާއިން މުހިންމު މަޝްވަރާތަކެއް ކުރިއަށް ގެންދިޔަ، ވޯލްޑް އިކޮނޮމިކް ފޯރަމްގެ ބައްދަލުވުންތައް ނިންމާލީ ޖެނުއަރީ 20 ވަނަ ދުވަހުއެވެ.