ދެ ވަނަ މެޗުގައި ޣިޔާޘުއްދީން ކޮޅަށް ލަނޑު ފުންޏެއް ޖަހައިގެން ކަލާފާނަށް ފުރަތަމަ މޮޅު
23 ޖެނުއަރީ 2023 | ހޯމަ 02:18ޣިޔާޘުއްދީނާ ދެކޮޅަށް ކުޅުނު މެޗު ކަލާފާނުން ކާމިޔާބުކުރީ 14-0 އިން
އިންޓަ ސްކޫލް ފުޓުބޯޅަ މުބާރާތުގެ ތެރެއިން
އިންޓަ ސްކޫލް 17 އަހަރުން ދަށުގެ ފުޓުބޯޅަ މުބާރާތުގައި ޣިޔާޘުއްދީން އިންޓަނޭޝަނަލް ސްކޫލް ބަލިކޮށް ކަލާފާނު ސްކޫލް އިން މުބާރާތުގައި ފުރަތަމަ މޮޅު ހޯދައިފި އެވެ.
މުބާރާތުގައި ކަލާފާނު ސްކޫލްގެ ފުރަތަމަ މެޗުގައި އެ ޓީމު ވަނީ ބަލިވެފަ އެވެ. ގްރޫޕް ޑީގައި އާދިއްތަ ދުވަހުގެ ހަވީރު ގަލޮޅު ރަސްމީ ދަނޑުގައި ޣިޔާޘުއްދީނާ ދެކޮޅަށް ކުޅުނު މެޗު ކަލާފާނުން ކާމިޔާބުކުރީ 14-0 އިންނެވެ. މެޗުގެ ފުރަތަމަ ހާފުގައި ކަލާފާނުން ވަނީ ފަސް ލަނޑު ޖަހައިފަ އެވެ. އެ ޓީމުގެ އަނެއް ނުވަ ލަނޑު ޖަހާފައިވަނީ ދެ ވަނަ ހާފުގަ އެވެ. މެޗުގައި ކަލާފާނުގެ އަގްސަން އަޙުމަދު ނަސީމް ވަނީ ހަތަރު ލަނޑު ޖަހައިފަ އެވެ. އެ ޓީމުގެ ޙުސެއިން ޔަމީން އާއި އަޙުމަދު އަތުވަން އަލީ އަދި އަޙުމަދު ނިފާހު އިބްރާހިމް ވަނީ ކޮންމެ ކުޅުންތެރިޔަކު ދެ ލަނޑު ޖަހައިފަ އެވެ. ކަލާފާނުގެ އަޙުމަދު ރާއިފް ނަސީމް އާއި މުޙައްމަދު މީކާއީލް އާއި އަޙުމަދު އާލިމް ވަނީ އެއް ލަނޑު ޖަހައިފަ އެވެ. އަނެއް ލަނޑަކީ ޣިޔާޘުއްދީން ސްކޫލްގެ އިބްރާހިމް ނަބްހާން އަތުން ބައި ކޮޅަށް ވަތް ލަނޑެކެވެ.
މުބާރާތުގައި ކަލާފާނަށް ކުރިއަށް ދެން އޮތީ ދަރުވަމަންތަ ސްކޫލާ ދެކޮޅަށް ކުޅޭ މެޗެވެ.
