ކުޅުދުއްފުށި ހޮސްޕިޓަލުގެ އޯޕީޑީ އިމާރާތުގެ މަސައްކަތް ނިމިއްޖެ
22 ޖެނުއަރީ 2023 | އާދީއްތަ 07:48މި މަޝްރޫއުގެ އަގަކީ 20.2 މިލިއަން ރުފިޔާ
ކުޅުދުއްފުށީ ހޮސްޕިޓަލުގެ އޯޕީޑީ އިމާރާތް
ހދ. ކުޅުދުއްފުށި ރީޖަނަލް ހޮސްޕިޓަލުގެ އޯޕީޑީ އިމާރާތުގެ މަސައްކަތް ނިމިއްޖެއެވެ.
މި މަޝްރޫއުގެ ދަށުން ބަލިމީހުން ބަލާ 21 ކޮޓަރިއާއި ފަރުވާ ދޭ އެއް ކޮޓަރިއާ އެއް ޕްރޮސިޖަރ ކޮޓަރިއާ އެއް ނަރސިންގ ސްޓޭޝަނަކާއި 6،189 އަކަފޫޓުގެ ވެއިޓިން ލައުންޖެއް ވަނީ ހަދާފައެވެ. އަދި ޑިސްޕްލޭ ހުންނަ 32 ކިއު ސިސްޓަމެއް ބަހައްޓާފައިވާއިރު ސީސީޓީވީ ކެމެރާ ވެސް ވަނީ ހަރުކޮށްފައެވެ.
ހެލްތު މިނިސްޓްރީން އެމްޓީސީސީއާ ހަވާލުކޮށްގެން ކުރިއަށް ގެންދިޔަ މި މަޝްރޫއުގެ އަގަކީ 20.2 މިލިއަން ރުފިޔާއެވެ.
ރާއްޖޭގެ އެންމެ އުތުރުގެ ތިން އަތޮޅު ސިއްހީ ހިދުމަތަށް ބަރޯސާވެފައި އޮންނަ، ކުޅުދުއްފުށީ ރީޖަނަލް ހޮސްޕިޓަލުން ކޮންމެ ދުވަހަކު އެތައް ސަތޭކަ ބަޔަކު ހިދުމަތް ހޯދަ އެވެ. އޯޕީޑީ ކޮންސަލްޓޭޝަން ރޫމް މަދުވުމުގެ ސަބަބުން ވެއިޓިން ލިސްޓު މަދުކުރުމަށް ގިނަ ގޮންޖެހުންތަކެއް އޮތީ ހޮސްޕިޓަލަށް ކުރިމަތިވެފައެވެ.
އެ ހޮސްޕިޓަލަކީ މާލެ ފިޔަވައި އުތުރުގެ އެހެން ހޮސްޕިޓަލުތަކުން ނުލިބޭ ބައެއް ހިދުމަތްތަކުގެ ތެރޭގައި ހިމެނޭ، ސްޕީޗް ތެރަޕީ އާއި ނިއުރޯ ޑައިގްނޯސްޓިކްގެ ހިދުމަތް ވެސް ލިބޭ ތަނެކެވެ.
ކުޅުދުއްފުށީ ރީޖަނަލް ހޮސްޕިޓަލުން ބުނީ މިދިޔަ އަހަރަކީ ކުޅުދުއްފުށީ ރީޖަނަލް ހޮސްޕިޓަލަށް ތަފާތު އެކި ދާއިރާތަކުން ފާހަގަކޮށްލެވޭ ގިނަ ކާމިޔާބީތަކެއް ލިބުނު އަހަރެއް ކަމަށެވެ. އޭގެ ތެރޭގައި ހޮސްޕިޓަލަށް ލިބިފައިވާ އުމްރާނީ ތަރައްގީ އާއި އިންސާނީ ވަސީލަތްތައް ކުރިއެރުވުމާއި އަދި ބޭނުންކުރާ މެޑިކަލް އިކުއިޕްމަންޓްތަކަށް ލިބުން ކުރިއެރުންތައް ހިމެނޭ ކަމަށް ބުންޏެވެ.
މިދިޔަ އަހަރުގެ އޮކްޓޫބަރު މަހުގެ ނިޔަލަށް ކުޅުދުއްފުށީ ރީޖަނަލް ހޮސްޕިޓަލުގެ އޯޕީޑީގެ ހިދުމަތް 98،147 މީހަކު ބޭނުންކުރި އެވެ. އާރުޓީއެލް ފެރީގެ ހިދުމަތާ އެކު އެ ހިދުމަތް ހޯދާ މީހުންގެ އަދަދު އިތުރުވެފައިވާ ކަމަށް ހޮސްޕިޓަލުން ބުންޏެވެ.
