ހޯރަފުށީ ކައިރިން ފެނުނު ކިނބޫ ދޫކޮށްލައިފި
22 ޖެނުއަރީ 2023 | އާދީއްތަ 02:23ކިނބޫގެ ދިގުމިނުގައި ގާތްގަނޑަކަށް 6 ފޫޓު ހުރި
ހޯރަފުށި ކައިރިން ފެނުނު ކިނބޫ
ހއ.ހޯރަފުއްޓާ އެއް ފަޅެއްގައި އޮންނަ އުނގުލުފިނޮޅާއި ހުވަހަންދޫއާ ދެމެދުން ހޮނިހިރު ދުވަހު ފެނުނު ކިނބޫ ދޫކޮށްލައިފިއެވެ.
އެމްއެންޑީއެފް އިން މައުލޫމާތު ދޭ ގޮތުގައި އެ ސަރަހައްދުން ކިނބުލެއް ފެނިފައިވާ ކަމުގެ މައުލޫމާތު އެމްއެންޑީއެފް ނޮދަން އޭރިއާ ކޯސްޓްގާޑް ފަސްޓް ސްކޮޑްރަންއަށް ލިބިފައިވަނީ ހޮނިހިރު ދުވަހުގެ މެންދުރު 12:50 ހާއިރުއެވެ. އެ އިދާރާއިން މައުލޫމާތު ދޭ ގޮތުގައި އެ ކިނބޫ ފެނުނީ ދޯންޏެއްގައި މަސް ބޭނުމަށް އެ ސަރަހައްދަށް ނުކުމެ އުޅުނު ބަޔަކަށެވެ.
މި ހާދިސާގެ މަޢުލޫމާތު ލިބުމުން އެމްއެންޑީއެފް ކޯސްޓްގާޑް ފަސްޓް ސްކޮޑްރަންގެ ސިފައިން ދިޔައިރު، އެ ސަރަހައްދުގައި މަސްބާނަން އުޅުނު ދޯނިން އޮތީ ކަންވާރެއްގައި ކިނބޫ ބާނާފައި ކަމަށް އެ އިދާރާއިން ބުންޏެވެ. އަދި އެ ސަރަހައްދަށް ގޮސް ސިފައިން، އެމްއެންޑީއެފް ކޯސްޓްގާޑު އުޅަނދަށް އެ ކިނބޫ ނެގި ކަމަށާއި އޭގެ ދިގުމިނުގައި ގާތްގަނޑަކަށް 6 ފޫޓު ހުރި ކަމަށް އެމްއެންޑީއެފުން ބުންޏެވެ.
މި ކިނބޫ ހިފުމަށްފަހު އެމްއެންޑީއެފް އިން ވަނީ ހޯރަފުށީގެ ހުޅަނގުން 45 ވަރަކަށް ނޯޓިކަލް މޭލު ބޭރަށް އެ ދޫކޮށްލާފައެވެ.
ހޯރަފުށީ ކައިރިން ކިނބުލެއް ފެނިފައިވާއިރު ކ. ބޮލިދުއްފަރު ކައިރިން ވެސް ދާދި ފަހުން ކިނބުލެއް ވަނީ ފެނިފައެވެ. އެ ކިނބުލުގެ ދިގުމިނުގައި 14 ފޫޓު ހުރިއިރު އެ ކިނބޫ ވެސް ވަނީ ބޮލިދުއްފަރުން 24 ނޯޓިކަލް މޭލު ބޭރަށް ދޫކޮށްލާފައެވެ.
