ރިޕްލޭ މެޗުގައި ވުލްވްސް ބަލިކޮށް ލިވަޕޫލް ހަތަރު ވަނަ ބުރަށް

އިނގިރޭސި އެފްއޭ ކަޕްގެ ތިން ވަނަ ބުރުގެ ރިޕްލޭ މެޗުގައި ވުލްވްސް ބަލިކޮށް ލިވަޕޫލް މުބާރާތުގެ ހަތަރު ވަނަ ބުރުން ޖާގަ ހޯދައިފި އެވެ.

ލިވަޕޫލް އާއި ވުލްވްސް އަށް ރިޕްލޭ މެޗު ކުޅެން ޖެހުނީ ތިން ވަނަ ބުރުގައި ލިވަޕޫލް ދަނޑުގައި ކުޅުނު މެޗު އެއްވަރުވުމުންނެވެ. ވުލްވްސް ދަނޑުގައި ކުޅުނު ރިޕްލޭ މެޗު ލިވަޕޫލުން ކާމިޔާބުކުރީ 1-0 އިންނެވެ.

މެޗު ފަށައިގެން ލިވަޕޫލް އިން ވަނީ ހަމަލާ އުފައްދައި ލަނޑު ޖެހުމަށް މަސައްކަތް ކޮށްފަ އެވެ. މެޗުގެ ހަމައެކަނި ލަނޑު 13 ވަނަ މިނެޓުގައި ޖެހީ ލިވަޕޫލްގެ ހާވީ އެލިއަޓް އެވެ. އެއީ ތިއާގޯ ދިން ބޯޅައެއް ހިފައިގެން ގޮސް ވުލްވްސްގެ އެރިޔާ ބޭރުން ގޯލަށް ބޯޅަ ފޮނުވާލައިގެންނެވެ. އޭގެ ފަހުން ލިވަޕޫލްގެ ފަބިއޯ ކަވާލިއޯ ލަނޑެއް ޖެހި ނަމަވެސް، އޭނާ އޮފްސައިޑުގައި ހުރުމުން ލަނޑު ބަލައިގެންފައެއް ނުވެ އެވެ.

މުބާރާތުގެ ހަތަރު ވަނަ ބުރުގައި ލިވަޕޫލް ވާދަކުރަން ޖެހޭނީ ބްރައިޓަންއާ އެވެ. ޕްރިމިއާ ލީގުގައި މި މަހުގެ 14 ވަނަ ދުވަހު ބްރައިޓަނާ ދެކޮޅަށް ކުޅުނު މެޗުން ލިވަޕޫލް ބަލިވީ 3-0 އިންނެވެ. އެފްއޭ ކަޕްގެ ހަތަރު ވަނަ ބުރުގައި ލިވަޕޫލް އިން ބްރައިޓަނާ ދެކޮޅަށް ނިކުންނާނީ މި މަހުގެ 29 ވަނަ ދުވަހު އެވެ.