އަމީނިއްޔާ ސްކޫލް ބަލިކޮށް ހުރަވީ ސްކޫލަށް ވެސް ރަނގަޅު ފެށުމެއް

އިންޓަ ސްކޫލް 17 އަހަރުން ދަށުގެ ފުޓުބޯޅަ މުބާރާތުގައި އަމީނިއްޔާ ސްކޫލް ބަލިކޮށް، ހުރަވީ ސްކޫލް އިން ވެސް މޮޅަކުން މުބާރާތް ފަށައިފި އެވެ.

ގްރޫޕް ސީ ގައި އަންގާރަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ހުރަވީން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފު ނިމުނީ ދެ ޓީމު އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ހުރަވީންނެވެ. މެޗުގެ 20 ވަނަ މިނެޓުގައި އެ ޓީމަށް ލީޑު ނަގައިދިނީ އިޒްމާން އިބްރާހީމް ރަޝީދު އެވެ. ނަމަވެސް އޭގެ ނުވަ މިނެޓު ފަހުން އަމީނިއްޔާ އިން ވަނީ ލަނޑު ޖަހައި ނަތީޖާ ހަމަހަމަކޮށްފަ އެވެ. އެ ޓީމަށް ނަތީޖާ ހަމަހަމަކޮށްދިނީ އަޙުމަދު ރާއިފް އަޝްހާސް އެވެ. މެޗުން ހުރަވީ މޮޅުކޮށްދިން ލަނޑު ޖެހީ ޙުސެއިން ޝަޔާން ޞަލާޙު އެވެ.

މި ގްރޫޕްގައި އިސްކަންދަރު ސްކޫލާއި ގުރައިދޫ ސްކޫލް ވާދަކުރި މެޗު 2-0 އިން ކާމިޔާބުކޮށްގެން، އިސްކަންދަރު އެއް ވަނައިގައި އޮތީ ފައިދާ ލަނޑުންނެވެ. އިސްކަންދަރާއި، ހުރަވީ އަށް ވެސް ލިބެނީ ތިން ޕޮއިންޓެވެ.

މުބާރާތުގެ ކުޅުން ބުދަ ދުވަހު ވެސް ކުރިއަށް ދާނެ އެވެ. ބުދަ ދުވަހު ކުރިއަށް ދާނީ ގްރޫޕް ޑީގެ ކުޅުމެވެ. ބުދަ ދުވަހު ހަވީރު އޮންނަ މެޗުގައި ބައްދަލު ކުރާނީ ދަރުމަވަންތަ ސްކޫލާއި، ޣިޔާޘުއްދީން އިންޓަނޭޝަނަލް ސްކޫލް އެވެ. އެ ގްރޫޕްގެ ދެ ވަނަ މެޗުގައި ރެހެންދި ސްކޫލާއި، ކަލާފާނު ސްކޫލް ވާދަކުރާނީ ބުދަ ދުވަހުގެ ރޭ އެވެ.