ފްރާންސް ފުޓުބޯޅައިގެ ރައީސް ލީ ގްރައެޓުގެ މައްޗަށް ޖިންސީ ގޯނާ ކުރިކަމުގެ ތުހުމަތު

ފްރާންސް ފުޓުބޯޅަ ފެޑެރޭޝަން (އެފްއެފްއެފް)ގެ ރައީސް ލީ ގްރައެޓް އަންހެނަކަށް ޖިންސީ ގޯނާ ކުރި ކަމުގެ ތުހުމަތުކޮށްފި އެވެ.

ލީ ގްރައެޓް މިވަގުތު ހުރީ ފްރާންސް ފުޓުބޯޅަ ފެޑެރޭޝަންގެ ރައީސްކަމުގެ މަސްއޫލިއްޔަތުން އެކަހެރިވެވަޑައިގެންފަ އެވެ. އެއީ ދާދި ފަހުން ފްރާންސްގެ ފުޓުބޯޅަ ލެޖެންޑް ޒިނެދިން ޒިދާންއާ ގުޅޭ ގޮތުން އޭނާ ދެއްކެވި ވާހަތަކުގެ ސަބަބުން، ސަރުކާރުގެ އިސްވެރިންނާއި އާންމު ރައްޔިތުންގެ ޕްރެޝަރު ބޮޑުވެގެންނެވެ. ލީ ގްރައެޓްގެ ވާހަކަތަކާ ގުޅިގެން އެ ޤައުމުގެ ސްޕޯޓްސް މިނިސްޓަރުގެ ނުރުހުން ވެސް އޭނާ އަށް އަމާޒުވީއިރު، ލީ ގްރައެޓް ވަނީ ފަހުން މައާފަށް އެދިވަޑައިގަންނަވާފަ އެވެ. ރައީސްކަމުގެ މަސްއޫލިއްޔާތުން ލީ ގްރައެޓް އެކަހެރިވެ ވަޑައިގެންފައިވާއިރު، ވަގުތީ ގޮތުން ރައީސްކަމުގެ މަސްއޫލިއްޔަތު އަދާ ކުރައްވަމުން އަންނަނީ ފިލިޕޭ ޑިއާލޯ އެވެ.

ޕެރިހުގެ ޕްރޮސެކިއުޓް އޮފީހުން އަންގާރަ ދުވަހު ބުނީ، ފްރާންސްގެ ފުޓުބޯޅަ ފެޑެރޭޝަންގެ ރައީސް ލީ ގްރައެޓުގެ މައްޗަށް ކުރެވޭ ޖިންސީ ގޯނާގެ ތުހުމަތަކާ ގުޅިގެން، އެ މައްްސަލަ ތަހުގީގުކޮށް، ބަލަމުން އަންނަ ކަމަށެވެ. މީގެ ކުރިން އޭނާގެ މައްޗަށް އެކަމުގެ ތުހުމަތު ކުރެވުނު ނަމަވެސް، ލީ ގްރައެޓް ވަނީ އެކަމަށް އިންކާރުކުރައްވާފަ އެވެ. އަންގާރަ ދުވަހު އެ ޤައުމުގެ ޕްރޮސެކިއުޓުން ލީ ގްރައެޓްގެ މައްސަލަ ބަލަމުން އަންނަކަން ރަސްމީކޮށް ހާމަކުރުމާއެކު، އޭނާގެ ބަހެއް ހޯދުމަށް އެ ޤައުމުގެ މީޑިއާތަކުން ކުރި މަސައްކަތް ވަނީ ނާކާމިޔާބުވެފަ އެވެ. ލީ ގްރައެޓާ ގުޅޭ ގޮތުން ޕޮރޮސެކިއުޓަށް މައްސަލަށް ހުށަހަޅާފައި ވަނީ މި މަހުގެ 13 ވަނަ ދުވަހު ކަމަށް އެ އޮފީހުން ވަނީ މީޑިއާތަަކަށް މައުލޫމާތު ދީފަ އެވެ.

ލީ ގަރައެޓްގެ މައްސަލަ ބަލާކަމަށް ޕްރޮސެކިއުޓުން ހާމަ ކުރުމާއެކު ގިނަ ބަޔަކު އަންނަނީ އޭނާ މަގާމުން ވަގުތުން އިސްތިއުފާ ދެއްވުމަށް ގޮވާލަމުންނެވެ.