ނަޕޯލީ އަށް ކުޅެމުން އަންނަ އޮސީމެން ހޯދުމަށް ޔުނައިޓެޑުން މަސައްކަތް ކުރަނީ

އިޓާލިއަން ލީގުގެ ނަޕޯލީ އަށް ކުޅެމުން އަންނަ ނައިޖީރިއާ ފޯވާޑު ވިކްޓާ އޮސީމެން ހޯދުމަށް ޕްރިމިއާ ލީގުގެ މެންޗެސްޓަރ ޔުނައިޓެޑުން ބޭނުންވާ ކަމަށް ރިޕޯޓުތައް ބުނެފި އެވެ.

ރިޕޯޓުތައްް ބުނާ ގޮތުން ޔުނައިޓެޑުން އަންނަނީ މި ސީޒަނަށްފަހު އޮސީމެން ހޯދުމަށް ތައްޔާރުވަމުންނެވެ. ޔުނައިޓެޑުން އެ ޓީމުގެ ސްކޮޑުގައި މޮޅު ފޯވާޑެއް ހިމަނަން ބޭނުންވާއިރު، އެ ޓީމުގެ ޓާގެޓަކީ އޮސީމެން ކަމަށް ވެސް ރިޕޯޓުތައް ބުނެ އެވެ. ޔުނައިޓެޑުން ވަނީ ލޯނު އެއްބަސްވުމެއްގެ ދަށުން ނެދަލެންޑްސްގެ ވައުޓް ވެގްހޯސްޓް އެ ޓީމަށް ގެނެސްފަ އެވެ. ނަމަވެސް ވެގްހޯސްޓަކީ ޔުނައިޓެޑުގެ ދިގު މުއްދަތުގެ ޕްލޭންގައި ހިމަނާނެ އޮޕްޝަނެއް ނޫން ކަމަށް ވެސް ރިޕޯޓުތައް ބުނެ އެވެ. ރިޕޯޓުތައް ބުނާ ގޮތުން އޮސީމެން ހޯދުމުގެ މަޝްވަރާތައް ޔުނައިޓެޑުން ކުރަމުން އަންނައިރު، އެކަމުގެ އަލި މަގެއް ފެނުމުން ރަސްމީކޮށް އެކަމުގެ މަސައްކަތް އެ ކުލަބުން ފަށާނެ އެވެ. ނަޕޯލީގައި ވެސް މި ސީޒަންގައި މޮޅު ކުޅުމެއް ދައްކަމުން އަންނަ އޮސީމެން އަކީ ޔުނައިޓެޑުގެ ފޯވާޑް ލައިނަށް އެކަށީގެންވާ ކުޅުންތެރިޔެއްގެ ގޮތުގައި އެ ޓީމުން ދެކޭ ކަމަށް ވެސް ރިޕޯޓުތައް ބުނެ އެވެ.

އުމުރުން 24 އަހަރުގެ އޮސީމެން ނަޕޯލީ އަށް ބަދަލުވީ 2020 ވަނަ އަހަރު އެވެ. އޭގެ ފަހުން އޭނާ ވަނީ ޓީމަށް ކުޅެދިން 79 މެޗުގައި 41 ލަނޑު ޖަހައިފަ އެވެ. ނަޕޯލީން މި ސީޒަންގައި މޮޅު ކުޅުމެއް ދައްކަމުން އަންނައިރު، އޮސީމެންގެ ދައުރު ވަރަށް ބޮޑެވެ. އޮސީމެން އަށް ނައިޖީރިއާގެ ޤައުމީ ޓީމުން ޖާގަ ލިބުނީ 2017 ވަނަ އަހަރު އެވެ. ޤައުމީ ޓީމަށް އޭނާ ވަނީ 22 މެޗު ކުޅެދީ 15 ލަނޑު ޖަހައިދީފަ އެވެ.