އިހަވަންދޫ ހޮސްޕިޓަލުގެ މަސައްކަތް ބަޔަކާ ހަވާލުކޮށްފި
މިއީ 123.3 މިލިއަން ރުފިޔާގެ މަޝްރޫއެއް
ހެލްތު މިނިސްޓްރީގައި ބޭއްވި ސޮއިކުރުމުގެ ރަސްމިއްޔާތުގެ ތެރެއިން
ހއ.އިހަވަންދޫގައި ތަރައްގީކުރުމަށް ހަމަޖެހިފައިވާ އައު ހޮސްޕިޓަލުގެ މަސައްކަތް ބަޔަކާ ހަވާލުކޮށްފިއެވެ.
މިނިސްޓްރީ އޮފް ހެލްތުގެ ފަރާތުން މިމަސައްކަތް ހަވާލުކޮށްފައިވަނީ ޑުޕްލެކްސް ޕްރައިވެޓް ލިމިޓެޑާއެވެ. މިމަސައްކަތް އެކުންފުންޏާއި ހަވާލުކޮށްފައިވަނީ 18 މަސް ދުވަހުގެ ތެރޭގައި ނިންމާގޮތަށެވެ.
އެ މިނިސްޓްރީން ބުނެފައިވާ ގޮތުގައި އިހަވަންދޫގައި ތަރައްގީ ކުރަނީ 30 އެނދުގެ ހޮސްޕިޓަލެކެވެ. އެގޮތުން ހޮސްޕިޓަލު އިމާރާތާއި އެކޮމޮޑޭޝަން ބިލްޑިން އާއި ސަރވިސް ބިލްޑިންގެ މަސައްކަތް ވެސް އެ ކުންފުނިން ކުރަން ޖެހޭނެއެވެ.
ކޮންޓްރެކްޓަރ ފައިނޭންސް އުސޫލުން ކުރިއަށްގެންދާ މިމަޝްރޫޢުގެ ފައިނޭންސަރަކީ ބޭންކް އޮފް މޯލްޑިވްސްއެވެ. މިއީ 123،303،792 (ސަތޭކަ ތޭވީސް މިލިއަން ތިން ލައްކަ ތިންހާސް ހަތްސަތޭކަ ނުވަދިހަ ދެ) ރުފިޔާގެ މަޝްރޫއެކެވެ.
