މަގުމަތިން ލިބޭނެ އިންސާފެއް ނެތްކަމަށް ވިދާޅުވި ބޭބޭފުޅުން މިއަދު މަގުމަތީގައި ޗަރުކޭސް ކުޅުއްވުމުގައި!

ރާއްޖޭގެ ސިޔާސީ ހަޔާތުގެ ފިރުކެންފެށި ދައުރު ނިމި ސިޔާސީގޮތުން އުމުރުން ދޮށިވާ ވަރަކަށް ފެންނަ މަންޒަރަކީ, ސިޔާސީ ބޭފުޅުން ހާލަތާ އެއްގޮތަށް ބަހާއި ކުލައާއި މަންޒަރު ބަދަލުކުރައްވާ ގޮތެވެ. ވަގުތާއި ސާއަތު ބެއްލެވުމަށްފަހު، ރުހިވަޑައިގަންނަވާ ގޮތަކަށް ސިޔާސީ ފިކުރާއި އުސޫލުތައް ބަދަލުކުރެއްވުމަކީ ސިޔާސީ ބޭފުޅުންނަށް ނިކަން ފަރިތަ، އަދި އެހާމެ އާދައިގެ ކަމެކެވެ.

ސިޔާސީ ކަންކަމަށް ރާއްޖެ ލޯ ހުޅުވުނީއްސުރެ ރާއްޖޭގައި އޮތީ ދެ ފިކުރެކެވެ. އެންމެ ފުރަތަމަ އެ ފިކުރު ފެށުނީ ކުރީގެ ރައީސް މައުމޫން އަބްދުލްް ގައްޔޫމާއި އެމްޑީޕީ ހިމެނޭހެންނެވެ. އެހެންނަމަވެސް މިހާރު ފިކުރުތައް ބަދަލުވެފައިވާ މަންޒަރު ފެނެއެވެ. އެހެނަސް މިހާރުގެ ހާލަތަށް ބަލައިލިޔަސް ފެންނަނީ މައިގަނޑު ދެ ފިކުރެކެވެ. އެއީ ސަރުކާރު ހިންގާ އެމްޑީޕީގެ ފިކުރާއި އިދިކޮޅު ފިކުރެވެ.

ކޮންމެއަކަސް އަބަދުވެސް އެމްޑީޕީއަށް ފާޑުކިޔުމަށް އެ ޕާޓީގެ ފިކުރު ގަބޫލުނުކުރާ ފަރާތްތަކުން ދައްކާ ވާހަަކައެއް އޮތެވެ. އެއީ، އެމްޑީޕީއަކީ މަގުމަތީގެ ހަރަކާތަށް ފަރިތަ ޕާޓީއެއް ކަމުގެ ވާހަކައެވެ. މަގުމައްޗަށް ނުކުމެ މުޒާހަރާކުރުމާއި ހަޅޭއްފަޅޭއް ޖެހުމަކީ އެމްޑީޕީގެ ސްޓައިލްކަމުގެ ވާހަކައެވެ. ސިޔާސީ އޮއިވަރާއެކު ރާއްޖޭގައި ކޮންމެ ވެރިކަމެއްގައިވެސް ވެރިކަމުގެ އިސްފަޑީގައި ތިއްބަވާ ބޭފުޅުންނާ ޖަލުގޮޅި ނިކަން ގާތެވެ. ލީޑަރުންގެ ގޮތުގައި ޕާޓީތަކުން ބަލައިގަންނަ ފަރާތްތަކުން އެންމެ ގިނައިން ޖަލުގައި ތިއްބަވަންޖެހުނީ ނިމިދިޔަ ރައީސް އަބްދުﷲ ޔާމީންގެ ވެރިކަމުގައެވެ.

އޭރު ރެޔާއި ދުވާލު އިދިކޮޅު ފަރާތްތަކުން ދިޔައީ މަގުތަކަށް އެއްވެ އެކަމާ ދެކޮޅަށް އަޑު އުފުލަމުންނެވެ. އޭރު ބާރުވެރިކަމުގައި ތިއްބެވީ މިހާރު އިދިކޮޅު އޮޑީގައި ތިއްބެވި ބޭފުޅުންނެވެ. އެ ދުވަހު ކުރެއްވި މަލާމާތަކީ، ތަންތަނަށް އެއްވާހިތްވާނަމަ ހައްޖަށް ދާންވީނޫންހޭ ވިދާޅުވެ ރައީސް ޔާމީން ކުރެއްވި މަލާމާތެެވެ. މަގުމަތިން ލިބޭނެ އިންސާފެއް ނޯންނާނެ ކަމަށް ވިދާޅުވެ އޭރު ސަރުކާރުގައި ތިއްބެވި ފަރާތްތަކުން ވިދާޅުވަމުން ގެންދެވީ، މުޒާހަރާކުރުމަކީ ސިޔާސީ ޗަރުކޭހެއް ކަމަށެވެ. އެދުވަހު އާއްމުން ދަމާކޫއްތާފައި މުޒާހަރާއިން ހައްޔަކުރުމުން ވިދާޅުވީ އެއީ ސިޔާސީ ފޮޓޯއަށް ކުޅޭ ސިޔާސީ ފިލްމު ކަމަށެވެ. އެ ދުވަހު ޕެޕަރސްޕްރޭގެ ދިލަ އާއްމުންނަށް ކުރިމަތިވުމުން ވިދާޅުވީ ފުލުހުންގެ ފަރާތުން އަނިޔާވަނީ މުޒާހަރާއަށް ދާތީ ކަމަށެވެ. ހައްޔަރުކުރަނީ މިސްކިތުގައި ތިއްބާތޯ ސުވާލުކުރައްވައި މިވެރިންގެ ރައީސް ދެއްކެވި ވާހަކަފުޅު އަދި ދިވެހިން ހަނދާން ހުންނާނެއެވެ.

ނަމަވެސް މިއަދުތޯއެވެ؟ ކުރިން މަގުމަތީގެ އެއްވުމާ ދެކޮޅު ހެއްދެވި ރައީސްގެ އަރިސް ބޭބޭފުޅުން މިއަދު ސިލްސިލާކޮށް މަގުތަކަށް ނުކުންނަވަނީ ހަމަ އެ ވިދާޅުވާ ސިޔާސީ ޗަރުކޭސްކުޅުއްވަން ނޫންތޯއެވެ؟ މުޒާހަރާއިން މީހަކު ހައްޔަރުކޮށްފިނަމަ އެ ވާހަކަވެސް ފޮޓޯއާއި ވީޑިއޯއާއެކު ދައްކަވައެވެ. މިއަދު އެއީ ސިޔާސީ ފިލްމަކަށް ނުވޭތޯއެވެ؟ މުޒާހަރާގައި ފުލުހުން އަމަލުކުރާ ގޮތް ހަރުކަށިވެގެން އެ ޝަކުވާވެސް ކުރައްވަނީއެވެ. މިއަދު މި ބޭފުޅުންނަށް ޖެހުނު ހާލަކީ، މިބޭފުޅުންގެ ރައީސް ޖަލުގައި ހުންނެވުމުގެ އުދާސް ބަންޑުންކޮށްލައްވަން ޖެހުނު ވަގުތު އަމިއްލައަށް ފާސްކުރި ގާނޫނުގައި ކަސްތޮޅު އެޅިފައިވުމެވެ. އެއްކަލަ އެއްވެ އުޅުމުގެ ހައްގުވެސް މިއަދު އޮތީ ހަނިވެފައެވެ. އަމިއްލައަށް ފޭހުނު އިލޮށިގަނޑުގެ ތޫނުކަން އިހުސާސްކުރައްވަން ޖެހުނީވެސް ތިމާމެން އަމިއްލައަށެވެ. އިއްޔެ މަގުމަތިން ނުލިބޭނެކަމަށް ވިދާޅުވި އިންސާފު ހޯއްދަވަން މިއަދު އެތިއްބެވީ މަގުތަކަށް ނުކުންނަވައެވެ. އެއްވާ މީހުން މަދުވުން އެއީ އަދި މުޅިން އެހެން ވާހަކައެއް ނޫންތޯއެވެ؟