ރައީސްގެ ރައްދު: ގާނޫނު އަސާސީ އާއި ނިޒާމު ބަދަލުކޮށްގެން ވެރިކަން ބޭނުންވަނީ ކާކުކަން އެންމެންނަށްވެސް އެނގޭ

ގާނޫނު އަސާސީ އާއި ވެރިކަމުގެ ނިޒާމަށް ބަދަލު ގެނެސްގެން ވެރިކަމަށް އަންނަނީ ކޮން ބޭފުޅެއްކަން ހުރިހާ އެންމެންނަށްވެސް އެނގޭނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީގައި ރައީސް ޞާލިހަށް ހުޅުމާލެ އިން ތާއީދުކުރާ ކެމްޕެއިން ގުރޫޕްތަކާއެކު ބޭއްވެވި ޖަލްސާގައި ވާހަކަފުޅުދައްކަވަމުން ރައީސް މިމޭރުމުން ވިދާޅުވީ ރައީސްއާ ދެން ވާދަކުރައްވާ ރައީސް މުހައްމަދު ނަޝީދު ދެއްކެވި ވާހަކަފުޅުތަކަށް ރައްދުދެއްވަމުންނެވެ. ބ. ހިތާދޫގައި ބޭއްވި ކެމްޕެއިން ޖަލްސާގައި ނަޝީދު ވިދާޅުވެފައިވަނީ، މި ދައުރު އެކީ ނިންމަވައި އަނެއްކާ އެހެން ދައުރެއްގެ ވާހަކަފުޅު ރައީސް އިބްރާހިމް މުހައްމަދު ސާލިހު ވިދާޅުވަމުން ގެންދަވާއިރު ދެވަނަ ދައުރު ނިންމުމަށް ފަހު ގާނޫނުއަސާސީ ބަދަލު ކުރާ ވާހަކަ ވެސް އެ މަނިކުފާނު ވިދާޅުވާނެ ކަމަށެވެ.

ރައީސް ނަޝީދުގެ ވާހަކަފުޅުތަކަށް ރައްދުދެއްވަމުން ނަޝީދުގެ ނަން ވިދާޅުނުވެ ރައީސް ޞާލިހު ވާހަކަފުޅުދެއްކެވީ ނޫސްތަކުން ފެނުނު ސުރުޚީތަކެއްކަމަށް ވިދާޅުވެއެވެ. އެގޮތުން ރައީސް ޞާލިހަށް އަމާޒުކުރައްވާ ވެރިކަމަށް ތިން ވަނަ ދައުރަކަށްވެސް ވަޑައިގެންނެވުމަށް މަސައްކަތްކުރައްވާނެކަމަށް ރައީސް ނަޝީދު ވިދާޅުވި ވާހަކައާ ގުޅިގެން ރައީސް ޞާލިހު ވަނީ ގާނޫނު އަސާސީ ބަދަލުކޮށްގެން ވެރިކަމަށް އަންނަން އުޅެނީ ކާކުތޯ އައްސަވާފައެވެ.

މީގެއިތުރުން ރައީސް ވިދާޅުވީ ރިޔާސީ ނިޒާމެއްގައި އޮންނަނީ ދެ ދައުރުކަމަށެވެ. ދެ ދައުރަށްވުރެ އިތުރަށް ކުރިމަތިލައްވަންވެސް އަދި ބަރުލަމާނީ ނިޒާމެއްގައި ވެރިކަމުގެ ތެރޭގައި ދެމިހުންނަވަންވެސް ނެތިންކަމަށް ރައީސް ވިދާޅުވިއެވެ.

ރައީސް ވިދާޅުވީ އެމަނިކުފާނަކީ ރިޔާސީ ނިޒާމަށް ތާއީދުކުރައްވާ ބޭފުޅެއްކަމަށެވެ.

ރައީސް ޞާލިހު ވެރިކަމަށް ގެންނެވީ އެމަނިކުފާނު ކަމަށާއި އެހެންކަމުން ވެރިކަމުން ބާލާނީވެސް އެމަނިކުފާނުކަމަށް ނަޝީދު ވިދާޅުވި ވާހަކަފުޅަށްވެސް ރައީސް ޞާލިހު ވަނީ ރައްދުދެއްވާފައެވެ. އެކަމަށް ރައްދުދެއްވަމުން ރައީސް ޞާލިހު ވިދާޅުވީ އިންސާނުންނަށް އޮންނަނީ މަސައްކަތްކުރުން ކަމަށާއި ވެރިކަމަކީ މާތްﷲ ދެއްވާ އެއްޗެއްކަމަށެވެ. މަގާމުގައި ދެމި ހުންނަނީވެސް މާތް ރަސްކަލާންގެ އިރާދަފުޅުންކަމަށާއި މަގާމުގައި ހުންނަނީ އެންމެ މީހެއްގެ ތާއީދާއެކު ނޫންކަމަށެވެ.

މިމަހުގެ 28 ވަނަ ދުވަހު އޮންނަ އެމްޑީޕީގެ ރިޔާސީ ޕްރައިމަރީގައި ވާދަކުރައްވަނީ ރައީސް ޞާލިހާއި ރައީސް ނަޝީދެވެ. ދެ ބޭފުޅުންގެ ކެމްޕެއިން ފޯރީގައި ހިނގަމުން އަންނައިރު ބަހުގެ ހަމަލާތައް އަންނަނީ ބަދަލުކުރެވެމުންނެވެ.

ރައީސް ޞާލިހާއި ރައީސް ނަޝީދާ ދެމެދު ޚިޔާލު ތަފާތުވާ މައިގަނޑު އެއް ސަބަބަކަށް ވެރިކަމުގެ ނިޒާމު ބަދަލުކުރުމުގެ މައްސަލަ ހިމެނެއެވެ. ވެރިކަމުގެ ނިޒާމު ބަރުލަމާނީ އަށް ބަދަލުކުރުމަށް އެމައްސަލަ ނިމިގެންދިޔަ އެމްޑީޕީ ކޮންގްރެސްއަށް ވެސް ނަޝީދު ހުށަހެޅުއްވިއެވެ. ނަމަވެސް ރައީސް ޞާލިހުއާ މަޝްވަރާކުރެއްވުމަށްފަހު އެވަގުތަށް އެކަން ވަނީ މަޑުޖައްސާލާފައެވެ.