އަލަށް ޚިދުމަތަށް ނުކުންނަ ޓެކްސީ ޑްރައިވަރުންނާއި ޓެކްސީި ޚިދުމަތުގައި މަސައްކަތްކުރާ މީހުން އެއްގަމު ދަތުރުފަތުރުކުރުމުގެ ގާނޫނާއި ގަވާއިދުތަކަށް އިތުރަށް އަހުލުވެރި ކުރުވުމަށް މި އަހަރު ހިންގާ ފުރަތަމަ ޕްރޮގްރާމް ފަށައިފިއެވެ.

ފުލުހުން ބުނީ ރޯޑް ސޭފްޓީ އެވެއަރނަސް އެންޑް ޕްރިވެންޝަންގެ ފަރާތުން ކުރިއަށްގެންދާ މި ތަމްރީން ޕްރޮގްރާމްގައި، އެއްގަމު ދަތުރުފަތުރުގެ ގާނޫނާއި ގަވާއިދުތަކާއި މަގުމަތީގެ އަދަބުތަކުގެ އިތުރުން، ޓެކްސީ ގަވާއިދާ ގުޅޭގޮތުން މައުލޫމާތު ދިނުމަށް ހަމަޖެހިފައިވާ ކަމަށެވެ. އަދި އެކްސިޑެންޓްތަކާއި މަގުމަތީގައި ދިމާވާ އެކިއެކި މައްސަލަތައް ހައްލުކުރުމަށް ޓެކްސީ ޑްރައިވަރުންނަށް އަދާކުރެވިދާނެ ދައުރާ ގުޅޭގޮތުން މައުލޫމާތު ފޯރުކޮށްދީފައި ވާނެކަމަށެވެ. މީގެ އިތުރުން އެފަދަ ހާދިސާއެއް ހިނގައިފިނަމަ ޑްރައިވަރުންގެ އަމަލުތައް ބަހައްޓަންވީ ގޮތްތަކާ ގުޅޭގޮތުންވެސް މައުލޫމާތު ހިއްސާކުރުމަށް ހަމަޖެހިފައިވެއެވެ.

ފުލުހުން ބުނިގޮތުގައި، ޓެކްސީ ޑްރައިވަރުން ތަމްރީންކުރުމާއި ތާޒާކުރުމުގެ ޕްރޮގްރާމަކީ ކޮންމެ އަހަރަކުވެސް ހަތަރު ބުރަކަށް ބަހާލައިގެން ކުރިއަށްގެންދާ ޕްރޮގްރާމެކެވެ.

މި ޕްރޮގްރާމަކީ ޓެކްސީ ޑްރައިވަރުން ޓެކްސީކުރުމުގެ ލައިސަންސަށް އެދޭއިރު ފުރިހަމަކުރުމަށް ގަވާއިދުގައި ލާޒިމުކުރާ ތަމްރީނެއްކަން ފާހަގަކޮށްލެވެއެވެ.

ބުދަ ދުވަހުން ފެށިގެން ހަފުތާއެއްހާ ދުވަހަށް ކުރިއަށްގެންދާ މި ޕްރޮގްރާމްގައި، ޓެކްސީ ޚިދުމަތާ އަލަށް ގުޅޭ 212 މީހުންނާއި މިހާރުވެސް ޓެކްސީ ޚިދުމަތްދޭ 90 މީހުން ބައިވެރިވެފައިވާ ކަމަށް ފުލުހުން ބުނެއެވެ.