ފްލައި ދުބާއީން އައްޑޫއަށް ދަތުރުތައް ފެށުން ފަސްކޮށްފި
ދަތުރުތައް ފަށާނީ 24 ޖޫންގައި
ފްލައި ދުބާއީގެ ބޯޓެއް
ޔޫއޭއީގެ ބަޖެޓް އެއަރލައިން ކަމަށްވާ، ފްލައި ދުބާއީ އިން އައްޑު ސިޓީ ގަން އިންޓަރނޭޝަނަލް އެއަރޕޯޓަށް ފަށަން ތާވަލު ކުރި ދަތުރުތައް ފަސްކޮށްފިއެވެ.
އެ އެއަރލައިނުން ކުރިން ނިންމާފައި އޮތީ މި ފެށޭ ފެބްރުއަރީ މަހު އައްޑުއަށް ސީދާ ދަތުރުތައް ފެށުމަށެވެ. ނަމަވެސް މިހާރު ވަނީ ދަތުރުތައް ފަށާ ތާރީހުގެ ގޮތުގައި 24 ޖޫން ކަނޑައަޅައިފައެވެ. އަދި އެ ގޮތަށް ނިންމައި ޓިކެޓު ގަތުމަށް ވެސް ވަނީ ހުޅުވާލައިފައެވެ.
ފްލައި ދުބާއީ އިން އައްޑުއަށް ފެބްރުއަރި މަހު ދަތުރު ފަށާނެ ކަމަށް ބުނެ ޓިކެޓް ވިއްކަން ފެށުމުން ބައެއް ފަރާތްތަކުން ވަނީ ޓިކެޓް ގަނެފައެވެ. އެ ފަރާތްތަކަށް އިތުރު އެއްވެސް ޗަރޖަކާ ނުލައި ދަތުރު ކުރާ ތާރީހު ބަދަލު ކުރެވޭނެ ކަމަށް އެ އެއަރލައިނުން ބުނެއެވެ.
މީގެ އިތުރުން ފެބްރުއަރީއިން ފެށިގެން ޖޫން 24 އާ ހަމައަށް ޓިކެޓް ނަގާފައިވާ ފަރާތްތަކުގެ ތެރެއިން އެ ތާރީހެއްގައި ދަތުރު ކުރަން ބޭޏުންވާ ފަރާތްތަކަށް ވެލާނާ އިންޓަރނޭޝަނަލް އެއަރޮޕޯޓުން ދުބާއީއަށް ހިލޭ ޓިކެޓް ލިބޭނެއެވެ. އަދި ދެ ދުވަހުގެ ހުރުމާއި އެތެރޭގެ އުދުހުންތައް ވެސް ހިލޭ ލިބޭނެ ކަމަށް އެ އެއަރލައިނުން ވަނީ ބުނެފައެވެ.
ފްލައި ދުބާއީއިން އައްޑުއާސް ދަތުރުތައް ފެށުމުން އެ އަރލައިނުން ދަތުރު ކުރާ މްންޒިލްތަކުގެ އަދަދު 185 އަށް އަރާނެއެވެ. އެ އެއަރލައިނުން ދަތުރު ކުރާ ފަތުރުވެރިންގެ ތެރެއިން ހުވަދު އަތޮޅަށް ދާން ބޭނުންވާ ފަރާތްތަކަށް ކޫއްޑޫ އެއަރޕޯޓަށް ދެވޭނެ އިންތިޒާމް ޤައުމީ އެއަރލައިން، މޯލްޑިވިއަން އިން ހަމަޖެހޭނެ ކަމަށް ވަނީ ބުނެފައެވެ.
ފްލައި ދުބާއީ އަކީ އައްޑުއަށް ދަތުރުތައް ފަށާނެ ޔޫއޭއީގެ ފުރަތަމަ އެއަރލައިނެވެ.
