ހާޓް އެޓޭކެއް ޖެހިގެން، ޕީއެސްޖީ އަދި ކެމަރޫންގެ ކުރީގެ މިޑްފީލްޑަރު އެމްބަމީ މަރުވެއްޖެ

ކެމަރޫން އަދި ޕެރިސް ސެއިންޓް ޖާމަން (ޕީއެސްޖީ)ގެ ކުރީގެ މިޑްފީލްޑަރު މޮޑެސްޓޭ އެމްބަމީ މަރުވެއްޖެ އެވެ.

އުމުރުން 40 އަހަރުގައި އެމްބަމީ މަރުވީ ހާޓް އެޓޭކެއް ޖެހިގެން ކަމަށް އޭނާގެ އާއިލާއާ ހަވާލީ މީޑިއާ ތަކުގައި ވަނީ ރިޕޯޓުކޮށްފަ އެވެ. އެމްބަމީ އޭނާގެ ސީނިއާ ކެރިއަރު ފެށީ 2000 ވަނަ އަހަރު އެވެ. އޭގެ ފަހުން އޭނާ ވަނީ ގިނަ ކުލަބުތަކަށް ކުޅެފަ އެވެ. އޭގެ ތެރޭގައި ފްރާންސްގެ ޕީއެސްޖީގެ އިތުރުން މާސޭ ވެސް ހިމެނެ އެވެ. އެމްބަމީ ވަނީ ޕީއެސްޖީ އަށް 83 މެޗު ކުޅެދީފަ އެވެ. އެ ކުލަބާއެކު 2004 ވަނަ އަހަރާއި 2006 ވަނަ އަހަރުގެ ފްރާންސް ކަޕް އޭނާ ވަނީ ކާމިޔާބުކޮށްފަ އެވެ. އެމްބަމީ އަށް ކެމަރޫންގެ ޤައުމީ ޓީމުން ވެސް ޖާގަ ލިބުނީ 2000 ވަނަ އަހަރު އެވެ. އޭނާ ވަނީ ޤައުމީ ޓީމަށް ކުޅެދިން ނުވަ އަހަރުގެ ތެރޭގައި 37 މެޗު ކުޅެދީފަ އެވެ. ކެމަރޫން އިން 2000 ވަނަ އަހަރު އޮތް ސިޑްނޭ އޮލިމްޕިކްސްގެ ރަން މެޑަލް ހޯދި ޓީމުގެ ސްކޮޑުގައި ވެސް އޭނާ ހިމެނުނެވެ.

އެމްބަމީ މަރުވުމާ ގުޅިގެން ޕީއެސްޖީން ވަނީ އެކަމުގެ ހިތާމަ ފާޅުކޮށްފަ އެވެ. ޕީއެސްޖީން ވަނީ އެމްބަމީގެ އާއިލަށް ތައުޒިޔާ ވެސް ފޮނުވާފަ އެވެ.