ކެމަރޫންގެ އިދިކޮޅު ލީޑަރު ބަކަރީ އިންތީޚާބު ކާމިޔާބު ވެފައިވާ ކަމަށް އަމިއްލަ އަށް އިއުލާން ކުރައްވައިފި

ކެމަރޫންގެ ރިޔާސީ އިންތިޚާބު ކާމިޔާބު ކުރެވިފައިވާ ކަމަށް، އެ ޤައުމުގެ އިދިކޮޅު ލީޑަރު އިސާ ޗިރޯމާ ބަކަރީ އަމިއްލަފުޅަށް އިއުލާން ކުރައްވައިފި އެވެ.

އަންގާރަ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ބަކަރީ ވަނީ، އާދިއްތަ އޮތް ރިޔާސީ އިންތިޚާބު އޭނާ އަށް ކާމިޔާބު ކުރެވިފައިވާ ކަމަށް އަމިއްލަފުޅަށް އިއުލާން ކުރައްވައިފަ އެވެ. ނަމަވެސް، ކެމަރޫންގެ ރަސްމީ އެއްވެސް އިދާރާ އަކުން މިކަން ހާމަކޮށްފައި ނުވެ އެވެ.

ބަކަރީ ވިދާޅުވެފައި ވަނީ، ކެމަރޫންގެ ރައީސް ކަމުގައި މިހާރު ހުންނެވި ޕައުލް ބިޔާ އޭނާ އަށް ގުޅުއްވައި އިންތިޚާބު ދޫކޮށްލެއްވުމަށް ގޮވާލައްވާފައިވާ ކަމަށެވެ. އެހެން ނަމަވެސް، ކެމަރޫންގެ ރައްޔިތުން އެމީހުންގެ ޗޮއިސް ހޮވާފައިވާ ކަމަށާއި، އެ ޗޮއިސް އަށް އިހްތިރާމް ކުރަން ޖެހޭ ކަމަށް ބަކަރީ ވިދާޅުވެފައިވެ އެވެ.

ކެމަރޫންގެ ސަރުކާރުން އިއުލާން ކޮށްފައި ވަނީ އިންތިޚާބުގެ ނަތީޖާ އަކަށް ވާނީ ކޮންސްޓިޓިއުޝަނަލް ކައުންސިލް އިން އިއުލާން ކުރާ ރަސްމީ ނަތީޖާ އެކަނި ކަމަށެވެ. އެ ނަތީޖާ އިއުލާން ކުރުމަށް އެ ކައުންސިލް އަށް ދެ ހަފުތާގެ މުއްދަތެއް ވަނީ ލިބިދީފަ އެވެ.

ބަކަރީ އަކީ، އުމުރުފުޅުން 90 އަހަރުވެފައިވާ ކެމަރޫންގެ މިހާރުގެ ރައީސް ބިޔާގެ އަރިސް ބޭފުޅެއްގެ ގޮތުގައި މީގެ ކުރިން 20 އަހަރު ވަންދެން ހުންނެވި ފަރާތެކެވެ. ނަމަވެސް، މިއަހަރުގެ ޖޫން މަހުގެ ތެރޭގައި އޭނާ ވަނީ ބިޔާގެ ސަރުކާރުން އިސްތިއުފާ ދެއްވައި، އިންތިޚާބުގައި ވާދަ ކުރެއްވުމުގެ މަސައްކަތް ފައްޓަވައިފަ އެވެ.

އޭނާގެ ކެމްޕެއިން އަށް ބޮޑެތި ޖަމާއަތްތަކާއި، އަދި އިދިކޮޅު ޕާޓީ ތަކުގެ ތާއީދު ވެސް ލިބުނެވެ. ކެމަރޫންގެ އިންތިޚާބުގައި ބިޔާގެ މައްޗަށް ކުރި ހޯދާނެ ކަމަށް ބެލެވިފައިވާ ކެންޑިޑޭޓަކީ ވެސް ބަކަރީ އެވެ.

ކެމަރޫންގެ ރައީސް ކަމުގައި ބިޔާ ހުންނަވާތާ 43 އަހަރުވެފައިވާއިރު، އޭނާ މަސައްކަތް ކުރައްވަނީ ވެރިކަމުގެ އަށް ވަނަ ދައުރެއް ހޯއްދެވުމަށެވެ. ސިޔާސީ މަޝްރަހު ދިރާސާ ކުރާ ފަރާތްތަކުން ފާހަގަކޮށްފައިވާ ގޮތުގައި، ބިޔާ ވެރި ކަމުގެ އަށް ވަނަ ދައުރެއް ހޯއްދަވާނެ ކަމަށް ވަރަށް ބޮޑަށް ބެލެވެ އެވެ. އެއީ ދައުލަތުގެ ވަސީލަތްތަކުގެ މައްޗަށް އޭނާގެ ބާރު އޮތުމާއި، އިދިކޮޅު ފަރާތްތައް ބައިބައިވެފައި އޮތުމުންނެވެ.

އިންތިޚާބު ކާމިޔާބު ކުރެވިފައިވާ ކަމަށް ބަކަރީ އަމިއްލަފުޅަށް އިއުލާން ކުރެއްވި ނަމަވެސް، ކެމަރޫންގެ ސަރުކާރުން މިހާތަނަސް އެއްވެސް އެއްޗެއް ބުނެފައި ނުވެ އެވެ. އެހެން ނަމަވެސް ޓެރިޓޯރިއަލް އެޑްމިނިސްޓްރޭޝަން މިނިސްޓަރު ޕޯލް އަޓަންގާ އެންޖީ ވަނީ، ހަމައެކަނި ކޮންސްޓިޓިއުޝަނަލް ކައުންސިލް އަށް ވޯޓުގެ ނަތީޖާ އިއުލާން ކުރެވޭނެ ކަމަށާއި، އެހެން ފަރާތަކުން ނަތީޖާ އިއުލާން ކުރުމަކީ ޤައުމަށް ޚިޔާނާތްތެރިވުން ކަމަށް ބުނެފަ އެވެ.

ބިޔާ އަކީ ދުނިޔޭގައި ހުންނެވި އެންމެ ދުވަސްވީ ވެރިޔާ އެވެ.