ނިމިދިޔަ ވެރިކަމުގައި އޮތް އަނިޔާވެރިކަން އަލުން ދެކޭކަށް ދިވެހިން ބޭނުމެއް ނުވޭ: ރައީސް
8 ޖެނުއަރީ 2023 | އާދީއްތަ 07:06އަމާޒަކީ ކުރިއަށް އޮތް ރިޔާސީ އިންތިޚާބު އެމްޑީޕީއަށް ކާމިޔާބުކޮށްދިނުން
ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު
ނިމިދިޔަ ވެރިކަމުގައި އޮތް އަނިޔާވެރިކަން އަލުން ދެކޭކަށް ދިވެހިން ބޭނުމެއް ނުވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.
ރިޔާސީ ޕްރައިމަރީގެ ކެމްޕޭނަށް ނ މިލަދޫއަށް ކުރެއްވި ދަތުރުފުޅުގައި ވާހަކަ ދައްކަވަމުން ރައީސް ވިދާޅުވީ، އެމަނިކުފާނުގެ އަމާޒަކީ ކުރިއަށް އޮތް ރިޔާސީ އިންތިޚާބު އެމްޑީޕީއަށް ކާމިޔާބުކޮށްދީ، ރައްޔިތުންނަށް ފޯރުކޮށްދޭން ފަށާފައިވާ ޚިދުމަތްތަކާއި، ރަށްރަށުގެ ތަރައްޤީގެ މަޝްރޫއުތައް ހުއްޓުމެއް ނެތި ކުރިއަށް ގެންދެވުން ކަމަށެވެ.
ރާއްޖެ ތަރައްޤީ ކުރެވޭނީ ކުދި ރަށްތައްވެސް ތަރައްޤީ ކޮށްގެންކަން ފާހަގަ ކުރައްވައި ރައީސް އިތުރަށް ވިދާޅުވީ، ކުދި ރަށްތަކާމެދު މީގެ ކުރިން އޮތީ ވަރަށް ބޮޑަށް އިހުމާލުވެފައި ކަމަށެވެ.
މުޅި ރާއްޖެ ތަރައްޤީވާނީ ރާއްޖޭގެ އެކި ކަންކޮޅުތަކުގައި އުޅޭ ހުރިހާ އެންމެންނަށްވެސް ބޭނުންވާ އަސާސީ ޚިދުމަތްތައް ފޯރުކޮށްދީގެންކަމަށް ރައީސް ވިދާޅުވިއެވެ. ސަރުކާރުން މަސައްކަތް ކުރަމުންދަނީވެސް އެ އަމާޒަށްކަން ރައީސް ފާހަގަ ކުރެއްވިއެވެ.
ރައީސް އިތުރަށް ވިދާޅުވީ، ކިތަންމެ ފޮނި އުއްމީދެއްކޮށް، ކިތަންމެ ކަމެއް ކުރަން ބޭނުންވި ނަމަވެސް، އެކަންކަން ކޮށްދެވޭނީ ސަރުކާރުގައި ތިބެގެން ކަމަށެވެ. ވީއިރު އެކަމަށްޓަކައި ވެރިކަމުގައި ތިބުން މުހިއްމުކަމަށް ރައީސް ވިދާޅުވިއެވެ.
ނިމިދިޔަ ވެރިކަމުގައި އޮތް އަނިޔާވެރިކަމަށް އަލިއަޅުވާލައްވާ ރައީސް ވިދާޅުވީ، އެއްވެސް މީހަކު އަލުން އެ އަނިޔާވެރިކަން ބަލަން ބޭނުން ނުވާ ކަމަށާއި، އެމްޑީޕީއަށް އިންތިޚާބު ކާމިޔާބު ކޮށްދެވޭނެ ކަމުގެ އުއްމީދު ބޮޑު ކަމަށެވެ.
ރައީސް ވަނީ ނ އަތޮޅުގެ ރަށްތަކަށް ކޮށްދެމުން އައި ޚިދުމަތްތައް ތަފާތު ކުރުމެއް ނެތި ފޯރުކޮށްދެއްވަމުން ގެންދަވާނެކަމަށް ވިދާޅުވެފައެވެ.
އޭގެ އިތުރުން، ޕްރައިމަރީއަށްފަހުވެސް ޕާޓީ އެކަތިގަނޑެއްގެ ގޮތުގައި އޮތުމުގެ މުހިއްމުކަމުގެ މައްޗަށް ރައީސްގެ ވާހަކަފުޅުގައި އަލިއަޅުވާލައްވާފައިވެއެވެ.
