ހުސްވެފައިވާ، ޕޯޗުގަލްގެ ގައުމީ ޓީމުގެ ކޯޗުކަމުގެ މަގާމަށް ގެންނަން ބޭނުންވާ މީހުންގެ ލިސްޓުގައި ސްޕެއިންގެ ރޮބާޓޯ މާޓިނޭޒް ހިމެނޭކަމަށް ރިޕޯޓުތައް ބުނެފިއެވެ.

މާޓިނޭޒް އެންމެ ފަހުން ހުރީ ބެލްޖިއަމްގެ ގައުމީ ޓީމުގެ ކޯޗުކަމުގައެވެ. ނަމަވެސް މިދިޔަ އަހަރު ނިމުނު ފީފާ ވޯލްޑް ކަޕްގެ ގްރޫޕް ސްޓޭޖުން ބެލްޖިއަމް ކެޓުމާއެކު މާޓިނޭޒް ވަނީ މަގާމުން އެކަހެރިވެފައެވެ. ޕޯޗުގަލް ޓީމުގެ ކޯޗުކަމުގެ މަގާމު ހުސްކޮށް އޮތީ އެ މަގާމުން ފެނާންޑޯ ސަންޓޯސް ވަކިކުރުމުންނެވެ. ރިޕޯޓުތައް ބުނާގޮތުން ޕޯޗުގަލްއިން ގެންނަން ބޭނުންވާ ލިސްޓުގައި މާޓިނޭޒްގެ ނަން އޮތްއިރު، އެ ގައުމުގެ އެފްއޭއިން އަންނަނީ މާޓިނޭޒާ ވާހަކަ ދައްކަމުން ކަމަށްވެސް ރިޕޯޓުތައް ބުނެއެވެ. ނަމަވެސް އެކަމާމެދު މާޓިނޭޒް ވަކި ގޮތެއް ނުނިންމާ ކަމަށާއި، ވޯލްޑް ކަަޕަށްފަހު މާޓިނޭޒްއަށް ގިނަ ހުށަހެޅުންތަކެއް ލިބެމުން އަންނަ ކަމަށްވެސް ރިޕޯޓުތައް ބުނެއެވެ.

އުމުރުން 49 އަހަރުގެ މާޓިނޭޒްގެ ކޯޗިން ކެރިއަރު ފެށީ 2007 ވަނަ އަހަރުއެވެ. އެއަށްފަހު އޭނާ ބެލްޖިއަމްގެ ގައުމީ ޓީމާ ހަވާލުވީ 2016 ވަނަ އަހަރުއެވެ. މާޓިނޭޒްގެ އިރުޝާދުގެ ދަށުން ބެލްޖިއަމް ވަނީ 80 މެޗު ކުޅެފައެވެ. އޭގެ ތެރެއިން އެ ޓީމު ވަނީ 56 މެޗުން މޮޅުވެ، 13 މެޗުން އެއްވަރުވެފައެވެ. ބަލިވެފައިވަނީ 11 މެޗުންނެވެ. ބެލްޖިއަމާއެކު މާޓިނޭޒްއަށް ހޯދުނު ކާމިޔާބަކީ 2018 ވަނަ އަހަރުގެ ވޯލްޑް ކަޕްގެ ތިންވަނައެވެ.

މާޓިނޭޒްގެ އިތުރުން ޕޯޗުގަލްއިން ގެންނަން ބޭނުންވާ ކޯޗުންގެ ތެރޭގައި، އެ ގައުމުގެ ހޯސޭ މޮރީނިއޯ ހިމެނޭ ކަމަށްވެސް ރިޕޯޓުތައް ބުނެއެވެ. އަދި އިޓަލީގެ ރޯމާއަށް ކޯޗުކަން ކޮށްދެމުން، މޮރީނިއޯ ޕޯޗުގަލަށް އިރުޝާދު ދިނުމަށް އެ ގައުމުގެ އެފްއޭއިން އިއުތިރާޒް ނުކުރާކަމަށްވެސް ރިޕޯޓުތައްބުނެއެވެ. ނަމަވެސް މޮރީނިއޯއާމެދުވެސް އަދި ވަކި ގޮތެއް ނުނިމޭކަމަށާއި، ކޯޗަކު ހަމަޖެއްސުން ލަސްވަނީ އެހެންވެ ކަމަށް ރިޕޯޓުތައް ބުނެއެވެ.