އިނގިރޭސި އެފްއޭ ކަޕްގެ ތިންވަނަ ބުރުގައި އެވަރޓަން ބަލިކޮށް މެންޗެސްޓަރ ޔުނައިޓެޑުން ޖެހިޖެހިގެން ހަތް ވަނަ މޮޅު ހޯދައި، ހަތަރުވަނަ ބުރުން ޖާގަ ހޯދައިފިއެވެ.

ހުކުރު ދުވަހުގެ ރޭ ޔުނައިޓެޑުގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 3-1ންނެވެ. އެންމެ ފަހުން ވާދަވެރި މެޗެއްގައި ޔުނައިޓެޑު ބަލިވީ މިދިޔަ ނޮވެމްބަރު މަހުއެވެ. އެސްޓަން ވިލާ އަތުން ލީގުގައި ބަލިވި މެޗަށްފަހު، ޖެހިޖެހިގެން ކުޅުނު ވާދަވެރި ހަތް މެޗުވެސް ޔުނައިޓެޑުން ވަނީ ކާމިޔާބުކޮށްފައެވެ.

މެޗުގައި ފުރަތަމަ ލަނޑު ޖަހައި ލީޑު ނެގީވެސް ޔުނައިޓެޑުންނެވެ. މެޗުގެ ހަތަރު ވަނަ މިނެޓުގައި މާކަސް ރަޝްފޯޑު ތަނަވަސްކޮށްދިން ފުރުސަތަކުން ޔުނައިޓެޑަށް ލީޑު ނަގައިދިނީ އެންޓޮނީއެވެ. އެއީ އެވަޓަންގެ ގޯލު އޭރިޔާ ތެރެއަށް ވަދެ، ތިރި ތިރިން ރަޝްފޯޑު ތަނަވަސްކޮށްދިން ބޯޅައެއް މަޑު މަޑުން ފައިން ޖަހަައި ގޯލަށް ވައްދާލައިގެންނެވެ. ނަމަވެސް މެޗުގެ 14 ވަނަ މިނެޓުގައި އެވަރޓަންގެ ކޯނޯ ކޯޑީ ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. އެއީ ޔުނައިޓެޑުގެ އޭރިޔާ ތެރެއިން ނީލް މައުޕޭ ފޮނުވާލި ބޯޅަ ގޯލް ކީޕަރު ޑޭވިޑް ޑެހެއާގެ ފައިގައި ޖެހި ލިބުނު ވަގުތު ގޯލަށް ފޮނުވާލައިގެން ކޯޑީ ޖެހި ލަނޑެކެވެ.

ޔުނައިޓެޑަށް މެޗުގައި އަލުން ލީޑު ލިބުނީ ކޯޑީ އަތުން ބައިކޮޅަށް ވަތް ލަނޑަކުންނެވެ. ދެ ވަނަ ހާފުގެ 52 ވަނަ މިނެޓުގައި ރަޝްފޯޑު ހުރަސްކުރި ބޯޅައަކަށް ކުޅެން އުޅުމުގެ ތެރޭގައި ކޯޑީގެ ފައިގައި ޖެހި ބޯޅަ ގޯލަށް ވަނީއެވެ. މެޗުގައި ޔުނައިޓެޑުގެ ތިން ވަނަ ލަނޑު ޖެހީ، މި ފަހަކަށް އައިސް މޮޅަށް ކުޅެމުން އަންނަ ރަޝްފޯޑެވެ. އެއީ ޔުނައިޓެޑުގެ އެލެހާންޑްރޯ ގަނާޗޯއަށް އެވަޓަންގެ ގޮޑްފްރޭ ކުރި ފައުލަކަށް ލިބުނު ޕެނަލްޓީއެއްގައި ރަޝްފޯޑު ކާމިޔާބުކޮށްދިން ލަނޑެކެވެ.

ޔުނައިޓެޑުން އަންނަނީ ޕްރިމިއަރ ލީގުގައިވެސް މޮޅަށް ކުޅެމުންނެވެ. މިވަގުތު އެ ޓީމު އޮތީ ލީގު ތާވަލްގެ ހަތަރުވަނާގައެވެ. އެއީ ތިން ވަނާގައި އޮތް ނިއުކާސަލަށްވުރެ މެޗެއް މަދުން ކުޅެގެންނެވެ. ދެ ޓީމަށްވެސް 35 ޕޮއިންޓު ލިބޭއިރު، ނިއުކާސަލް ކުރިހޯދަނީ ފައިދާ ގޯލުންނެވެ.