ކެމްޕެއިން ދަތުރެއްގައި ރައީސް ނަޝީދު ފެށޭ ހަފްތާގައި 7 އަތޮޅަކަށް ވަޑައިގަންނަވަނީ
6 ޖެނުއަރީ 2023 | ހުކުރު 13:43ރައީސް ނަޝީދުގެ މި ދަތުރުފުޅުތަކުގައި ވަޑައިގަންވާނެ ރަށްތަކުގެ ތަފްސީލް އަދި ހާމަކުރައްވާފައެއް ނުވޭ
ރައީސް ނަޝީދު
ކުރިއަށް އޮތް އެމްޑީޕީގެ ރިޔާސީ ޕްރައިމަރީގެ ކެމްޕެއިން އަށްޓަކާ ކުރީގެ ރައީސް މުހައްމަދު ނަޝީދު، އަންނަ ހަފްތާގައި ހަތް އަތޮޅަކަށް ވަޑައިގަންނަވަން ހަމަޖެހިއްޖެއެވެ.
އެމަނިކުފާނުގެ ކެމްޕެއިން ޓީމުން ބުނީ އެމަނިކުފާނު މިފެށޭ ހަފްތާގައި ފުރަތަމަ ވަޑައިގަންނަވަން ހަމަޖެހިފައި ވަނީ ނ، ރ އަދި ބ އަތޮޅަށް ކަމަށެވެ. އެ އަތޮޅުތަކަށް ކުރައްވާ ދަތުރު ފައްޓަވަން ހަމަޖެހިފައި ވަނީ މި މަހުގެ 9 ވަނަ ދުވަހުއެވެ. އެ ދަތުރުފުޅު ނިންމަވާލައްވާނީ މި މަހުގެ 11 ވަނަ ދުވަހުއެވެ. އެއަށް ފަހު 13 ވަނަ ދުވަހުން ފެށިގެން 14 ވަނަ ދުވަހަށް ލ، ތ، މ އަދި ވ އަށް ދަތުރުފުޅެއް ކުރެއްވުމަށް ވަނީ ހަމަޖެހިފައެވެ. ރައީސް ނަޝީދުގެ ކެމްޕެއިން ދަތުރުތައް ކުރިއަށް ހަމަޖެހިފައިވާ ގޮތަށް ބަލާ އިރު މި މަހުގެ 17 ވަނަ ދުވަހު ޅ އަދި މާލެ އަތޮޅަށް ދަތުރުކުރެއްވުމަށް ވަނީ ހަމަޖެހިފައެވެ. އަދި ލ، ތ، މ، ވ ގެ އިތުރު ބައެއް ރަށްތަކަށް މި މަހުގެ 15 ވަނަ ދުވަހު ވަޑައިގަތުމަށް ވަނީ ހަމަޖެހިފައެވެ. މީގެ އިތުރުން މި މަހުގެ 23 އިން 24 އަށް އައްޑޫސިޓީ އަށް ވަޑައިގަތުމަށް ވަނީ ހަމަޖެހިފައެވެ.
ރައީސް ނަޝީދުގެ މި ދަތުރުފުޅުތަކުގައި ވަޑައިގަންވާނެ ރަށްތަކުގެ ތަފްސީލް އަދި ހާމަކުރައްވާފައެއް ނުވެއެވެ. އެމަނިކުފާނު ވަނީ ދާދިފަހުން ފުވައްމުލައް ސިޓީ އަށް ވަޑައިގެން ކެމްޕެެއިން ކުރައްވާފައެވެ. މިހާރު ކުރައްވަމުންދާ ދަތުރުތަކުގައި އެމަނިކުފާނު ގެންދަވަނީ ދޮރުންދޮރަށް ކެމްޕެއިންތައް ހިންގަވަމުންނެވެ. އަދި ހަފްތާއަކު އެއް ފަހަރު މީޑިއާ އާއި ބައްދަލުކުރައްވާ ދަތުރުތަކުގެ ތަފްސީލާއި ކަންބޮޑުވުން ހުރި ކަންކަން އެމަނިކުފާނު ގެންދަވަނީ ފާހަގަކުރައްވަމުންނެވެ.
އެމްޑީޕީގެ ރިޔާސީ ޕްރައިމަރީ ބާއްވަނީ މި ހިނގާ ޖެނުއަރީ މަހުގެ 28 ވަނަ ދުވަހުއެވެ. އެ ޕްރައިމަރީގައި ރައީސް އިބްރާހިމް މުހައްމަދު ޞާލިހު ވެސް ވާދަކުރައްވައެވެ.
