ރަމަޟާން މަސް ފެށުމާއި ދިމާކޮށް ސަރުކާރާއި ސަރުކާރުގެ އެކި މުއައްސަސާތަކުން ގިނަ މަސައްކަތްތަކާ އެކި އެކި ޕްރޮގްރާމުތައް ހިންގައެވެ. އަދި ޚާއްސަކޮށް މިސްކިތްތައް މަރާމާތު ކުރުމާއި ދީނީ ދަރުސްތައް ދިނުން ފަދަ ކަންތައްތައް ކުރިއަށް ގެންދެއެވެ. މިފަހަރު ސިޓީ ކައުންސިލުން ވެސް މިވަނީ ރަމަޟާން މަހާ ދިމާކޮށް މާލޭގެ މިސްކިތްތައް މަރާމާތު ކުރުމަށް ފަންޑު ހޯދުމުގެ މަސައްކަތް ފަށާފައެވެ. މިސްކިތްތައް ކައުންސިލާ ސަރުކާރުން ހަވާލުކުރީ އެއްވެސް ބަޖެޓަކާ ނުލާ ކަމަށް ސިޓީ ކައުންސިލުން ވަނީ ތުހުމަތުކޮށްފައެވެ. މިސްކިތްތަކުގެ މެއިންޓެނަންސް މަސައްކަތްތަކާއި، މަރާމާތުތަކަށް ބޮޑެތި ހޭދައެއް ކުރަންޖެހޭއިރު، ކައުންސިލުގެ ބަޖެޓުން މިކަން އެންމެ އެދެވޭ ގޮތަށް ނުކުރެވޭ ކަމަށް ވެސް ކައުންސިލުން ބުނެއެވެ.

މިވަގުތު ސިޓީ ކައުންސިލުން މާލެއާއި ވިލިމާލޭގައި 34 މިސްކިތެއް ބަލަހައްޓަމުންދާއިރު ސަރުކާރުން ދަނީ ކޮންމެ ކައުންސިލަކަށް ވެސް ގްރާންޓުގެ ގޮތުގައި ފައިސާ ދެމުންނެވެ. އަދި އެ ފައިސާއިން ކައުންސިލްތަކުގެ ޚަރަދުތައް ބަލަހައްޓަން ޖެހެއެވެ. ސިޓީ ކައުންސިލުން ފަންޑު ހޯދުމުގެ މަސައްކަތް ފަށާފައިވާއިރު އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވީ މިސްކިތްތައް މަރާމާރު ކުރުމާއި ގުޅޭގޮތުން ސިޓީ ކައުންސިލުން މިނިސްޓްރީއާ އެއްވެސް ވާހަކައެއް ނުވަތަ ކަންބޮޑުވުމެއް ހިއްސާކޮށްފައިނުވާނެ ކަމަށެވެ. ކައުންސިލުން އެކަންބޮޑުވުން ހިއްސާކުރިނަމަ މިނިސްޓްރީން ކައުންސިލަށް އެކަމުގައި އެހީތެރިވެދީނީސް ކަމަށް މިނިސްޓަރު ފާހަގަކުރެއްވިއެވެ.

ސިޓީ ކައުންސިލްގެ ބަޖެޓް ނެތްކަމަށް ބުނާއިރު މިދިޔަ އަހަރު ވެސް އެ ކައުންސިލުން ވަނީ ގިނަގުނަ ހަރަކާތްތަކެއް ހިންގާފައެވެ. އެގޮތުން މިދިޔަ އަހަރު ހެންވޭރު ދަނޑުގައި މާލެ ސިޓީ ކައުންސިލްގެ ފުރަތަމަ ”ސްޓާފް ނައިޓް“ ވަރަށް ބޮޑުކޮށް ބާއްވާފައިވެއެވެ. މާލެ ސިޓީ ކައުންސިލުން ފުރަތަމަ ފަހަރަށް ސްޓާފް ނައިޓެއް ބޭއްވިއިރު މުވައްޒަފުންގެ އަގުވަޒަން ކުރުމަށް އަގުހުރި އިނާމްތަކެއް ވެސް ވަނީ ދީފައެވެ.

މިދިޔަ އަހަރުގެ ރޯދަ މަހު ވެސް ޕާކް ވޮލީބޯޅަ މުބާރާތް ސިޓީކައުންސިލުން ވަނީ ބާއްވާފައެވެ. އަދި މުބާރާތުގައި އަގުހުރި ފައިސާގެ އިނާމު ވެސް ވަނީ ދީފައެވެ. ކޮންމެ ޑިވިޝަނެއްގެ އެއް ވަނަ ޓީމަށް 45،000 ރުފިޔާ ދީފައިވާއިރު، ދެ ވަނަ ޓީމަށް 25،000 ރުފިޔާ ވަނީ ދީފައެވެ. ތިން ވަނަ އަށް 15،000 ރުފިޔާ ދީފައިވާއިރު ހަތަރު ވަނަ ޓީމަށް 10،000 ރުފިޔާ ދީފައިވެއެވެ. އަދި ފަސް ވަނަ ހޯދި ޓީމަށް 5000 ރުފިޔާ ވެސް ދީފައިވެއެވެ. މިދިޔަ ރޯދަ މަހު މި މުބާރާތް ނުބާއްވާ އެ ފައިސާ މިސްކިތްތައް މަރާމާތު ކުރުމަށް ޚަރަދު ކުރިނަމަ މާ ރަނގަޅުވީސް ކަން ޔަޤީނެވެ.

މީގެއިތުރުން މިދިޔަ އަހަރު މާލޭ ސިޓީ ކައުންސިލުން މާލޭގައި ގަސް ވިއްކާ ފިހާރައެއް ވެސް ވަނީ ހުޅުވާފައެވެ. "މާލެ ފެހި"ގެ ނަމުގައި މި ފިހާރަ ހުޅުވާފައިވަނީ ކާނިވާ ސަރަހައްދުގައެވެ. "މާލެ ފެހި" ފިހާރަ ހުޅުވިއިރު މިހާރު 25 ބާވަތެއްގެ ގަހާއި ގަސްހެއްދުމަށް ބޭނުންވާ އެކި ސާމާނު ލިބެންހުރިކަން މާލެސީޓީގެ މޭޔަރު ޑރ. މުހައްމަދު މުއިއްޒު ވެސް ވަނީ ފާހަގަކުރައްވާފައެވެ. އެފަދަ ތަނެއް ތައްޔާރު ކުރުމަށްވެސް ބޮޑެތި ޚަރަދު ތަކެއް ހިނގާނެއެވެ. ހިތުގައި އުފެދޭ ސުވާލަކީ ކައުންސިލްގެ ބެޖުޓުގައި ފައިސާ ނެތީ ހަމައެކަނި މިސްކިތްތައް މަރާމާރު ކުރަންވީމަތޯއެވެ.

ކައުންސިލުން ހަމަ ހަޤީޤަތުގައި ވެސް މިސްކިތްތައް މަރާމާތު ކުރުމަށް ބަޖެޓް ނެތްނަމަ އެކަން ސަރުކާރުގެ ކަމާއި ގުޅޭ އިދާރާތަކާއި ހިއްސާނުކޮށް ރައްޔިތުންނާއި ހަމައަށް ދާން ޖެހުނީ ކީއްވެގެންތޯއެވެ. މިގޮތަށް ފަންޑު ހޯދަން ނުކުތުމުން ރައްޔިތުންގެ ވިސްނުމަށް އަންނާނީ މި ސަރުކާރުން މިސްކިތްތަކަށް އަހައްމިއްޔަތު ނުދޭކަމަށެވެ. ނުވަތަ މިސްކިތްތައް މަރާމާތު ކުރުމަށް އެއްވެސް އެހީތެރިކަމެއް ފޯރުކޮށް ނުދޭ ކަމަށެވެ. މިސްކިތް ތައް މަރާމާތު ކުރުމަށް ފަންޑު ހުޅުވުމުގެ ހަގީގީ ބޭނުމަކީ އެއީ ކަމަށްވެސް ވެދާނެއެވެ. މިސްކިތްތައް މަރާމާތު ކުރުމަށް ސަރުކާރުން އެއްވެސް އެހީތެރިކަމެއް ފޯރުކޮށް ނުދޭ ކަމަށް އާންމުންނަށް ދެއްކުމެވެ.

ސިޔާސީ ފައިދާ ހޯދުމަށް، ސަރުކާރުން ކަމެއް ނުކުރާކަން ދެއްކުމަށް މިފަދަ ކަންތައްތައް ކުރުމަކީ ވަރަށް ދެރަ ކަމެކެވެ. ރަނގަޅު ކަމެއް ވެސް ނުބައި މަޤްސަދެއް އޮވެގެން ކުރަންޏާ އެއީ ރަނގަޅު ކަމެއްގެ ގޮތުގައި ބަލައި ނުގަނެވޭނެއެވެ.