ދުނިޔޭގެ ބީޗް ވޮލީ ބޯޅަ ރޭންކިންގގައި ކުޑަކާއްޓޭއާއި އެޑަމަށް ބޮޑު ކުރިއެރުމެއް

ދުނިޔޭގެ ބީޗުވޮލީ ބޯޅައިގެ ރޭންކިންގގައި ރާއްޖޭގެ ގައުމީ ބީޗް ވޮލީ ބޯޅަ ޓީމުގެ އެއް ވަނަ ޕެއަރ އިސްމާއީލް ސާޖިދު (ކުޑަކާއްޓޭ)އާއި އާދަމް ނަސީމް (އެޑަމް) ބޮޑު ކުރިއެރުމެއް ހޯދައިފިއެވެ.

ކުޑަ ކާއްޓޭއާއި އެޑަމަށް ރޭންކިންގގައި ރަނގަޅު ކުރިއެރުމެއް ލިބުނީ ނިމުނު އަހަރު އޮތް މުބާރާތްތަކުގައި އެ ދެ ކުޅުންތެރިން ދެއްކި ކުޅުމުންނެވެ. މީގެ އިތުރުން މިދިޔަ ޑިސެމްބަރު މަހުގެ ފަހު ކޮޅު ބަންގްލަދޭޝްގައި އޮތް ސެންޓްރަލް ޒޯން ބީޗް ވޮލީ ބޯޅަ މުބާރާތުގައި ވާދަކޮށް، މި ޕެއަރއިން ވަނީ މުބާރާތުގެ ރަން މެޑަލް ހޯދާފައެވެ.

ރޭންކިންގައި ކުޑަކާއްޓޭއާއި އެޑަމް އޮތީ 744 ޕޮއިންޓާއެކު، 218 ވަނާގައި ރޭންކްކުރެވިފައެވެ. މި ޕެއަރއަކީ މިވަގުތު ސާކް ސަރަހައްދުންވެސް ދުނިޔޭގައި އެންމެ ރޭންކިންގ ރަނގަޅު ޕެއަރއެވެ. މި ޕެއަރއިން ވަނީ މިދިޔަ އަހަރުގެ ތެރޭގައި ޖުމުލަ ދެ މެޑަލެއްވެސް ހޯދާފައެވެ. އެއީ އެންމެ ފަހުން ހޯދި ރަން މެޑަލްގެ އިތުރުން، ކޮމަންވެލްތު ގޭމްސް ކޮލިފައިންގގައި ހޯދި ރިހި މެޑަލެވެ.

ރޭންކިންގގެ އެއް ވަނާގައި އޮތީ ނޯރވޭގެ ދެ ކުޅުންތެރިން ކަމަށްވާ ކްރިސްޓިއަން ސޮރަމްއާއި އެންޑާސް މޮލްއެވެ. މި ޕެއަރއިން ވަނީ މިދިޔަ އަހަރު އޮތް ތިން މުބާރާތަކުން ރަން މެޑަލް ހޯދާފައެވެ.