ފަތުރުވެރިކަމުގެ ދާއިރާގައި ހަރަކާތްތެރިވާ ތަންތަނުގެ ޚަބަރާއި މައުލޫމާތު ހިއްސާކުރުމަށް އެދިއްޖެ
4 ޖެނުއަރީ 2023 | ބުދަ 13:08މުވައްޒަފުންނާ ގުޅުންހުރި މައުލޫމާތާއި، ކުންފުނިތަކުން މުޖްތަމައުގެ ކުރިއެރުމަށްޓަކައި ހިންގާ ހަރަކާތްތަކުގެ މައުލޫމާތުވެސް ހިމެނޭ
އިންޓަރ ކޮންޓިނެންޓަލް މޯލްޑިވްސް މާމުނަގައު ރިސޯޓް
މޯލްޑިވްސް ޓޫރިޒަމް އަޕްޑޭޓްސްއަށް، ފަތުރުވެރިކަމުގެ ދާއިރާގައި ހަރަކާތްތެރިވާ ތަންތަނުގެ ޚަބަރާއި މައުލޫމާތު ހިއްސާކުރުމަށް މިނިސްޓްރީ އޮފް ޓޫރިޒަމުން އެދިއްޖެއެވެ.
ޓޫރިޒަމް މިނިސްޓްރީން ބުނީ "މޯލްޑިވްސް ޓޫރިޒަމް އަޕްޑޭޓްސް"ގައި ފަތުރުވެރިކަމުގެ ދާއިރާގެ އިތުރު ޚަބަރުތައް ހިމެނުމުގެ މަގުސަދުގައި، ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ޚަބަރުތަކާއި މައުލޫމާތު ހިއްސާކުރުމަށް ހުޅުވާލާފައިވާކަަމަށެވެ.
މައުލޫމާތު ހިއްސާކުރުމުގައި މުވައްޒަފުންނާ ގުޅުންހުރި މައުލޫމާތާއި، ކުންފުނިތަކުން މުޖްތަމައުގެ ކުރިއެރުމަށްޓަކައި ހިންގާ ހަރަކާތްތަކުގެ މައުލޫމާތާއި، ތަން ތަރައްގީކުރުމަށް ގެނެވޭ އިތުރު އައު ބަދަލުތަކުގެ މައުލޫމާތު ހިމެނެއެވެ.
ތަނުގައި ކުރިއަށްގެންދާ ތިމާވެއްޓާ ރައްޓެހި ދެމެހެއްޓެނިވި ތަރައްގީއާއި ޕްރޮގްރާމްތަކުގެ މައުލޫމާތު ހިއްސާކުރުމަށްވެސް މިނިސްޓްރީން އެދިފައިވެއެވެ.
މުވައްޒަފުންނާ ގުޅުންހުރި މައުލޫމާތުގެ ތެރޭގައި; މުވައްޒަފުންގެ ކުރިއެރުމަށް ހިންގޭ ތަމްރީން ޕްރޮގްރާމާއި، މަސައްކަތާ ގުޅިގެން ލިބޭ އެވޯޑްތަކުގެ މައުލޫމާތުގެ އިތުރުން، ތަނުގެ އިސް މަގާމުތަކަށް ދިވެހި މުވައްޒަފުން އައްޔަންކުރުމާގުޅޭ މައުލޫމާތު ހިއްސާކުރުމަށް މިނިސްޓްރީން ވަނީ އެދިފައެވެ.
ޓޫރިޒަމް މިނިސްޓްރީ އަންނަނީ ކޮންމެ ހަފުތާއަކު "މޯލްޑިވްސް ޓޫރިޒަމް އަޕްޑޭޓްސް" ރިޕޯޓެއް ނެރެމުންނެވެ. މި ރިޕޯޓްގައި، އެ ހަފުތާއެއްގައި ރާއްޖޭގެ ފަތުރުވެރިކަމުގެ އެންމެ ފަހުގެ މައުލޫމާތު ހިއްސާކުރެއެވެ.
