އާޖެންޓީނާގެ ގޯލް ކީޕަރު ރޫލީ ހޯދުމަށް އަޔެކްސްއިން މަސައްކަތްކުރަނީ
އެކަމުގެ މަޝްވަރާތައް، ރޫލީއާއި ވިލަރެއާލާއެކު އަޔެކްސްއިން މިހާރު އަންނަނީ ކުރަމުން
އާޖެންޓީނާގެ ގޯލް ކީޕަރު، ރޫލީ
އާޖެންޓީނާގެ ގޯލް ކީޕަރު ޖެރޮނިމޯ ރޫލީ ހޯދުމަށް އަޔެކްސްއިން މަސައްކަތްކުރަމުން އަންނަކަމަށް މީޑިއާ ރިޕޯޓުތައް ބުނެފިއެވެ.
އުމުރުން 30 އަހަރުގެ ރޫލީ މިހާރު ކުޅެމުން އަންނަނީ ސްޕެއިންގެ ވިލަރެއާލަށެވެ. މޮންޓްޕެލިއާ ދޫކޮށް ރޫލީ ވިލަރެއާލަށް ބަދަލުވީ 2020 ވަނަ އަހަރުއެވެ. އެ ކުލަބާއެކު އޭނާ ހަދާފައިވާ ހަތަރު އަހަރު ދުވަހުގެ އެއްބަސްވުން ހަމަވާނީ އަންނަ އަހަރުއެވެ. ރޫލީ ވަނީ ވިލަރެއާލަށް 79 މެޗުގައި ގޯލު ބަލަހައްޓައިދީފައެވެ.
އައު އަހަރާއެކު އަޔެކްސްއިން ހޯދަން ބޭނުންވާ ކުޅުންތެރިންގެ ލިސްޓުގެ ކުރީގައި އޮތީ ރޫލީކަމަށް ރިޕޯޓުތައް ބުނެއެވެ. މީގެ އިތުރުން އަޔެކްސްއިން މަސައްކަތް ކުރަމުން އަންނަނީ މި ޖެނުއަރީ މަހު ރޫލީގެ ސޮއި ހޯދުމަށް ކަމަށާއި، އެކަމަށް ވިލަރެއާލަށް ދައްކަންޖެހޭ އަދަދު ދެއްކުމަށް އަޔެކްސް އޮތީ ތައްޔާރަށް ކަމަށްވެސް ރިޕޯޓުތައް ބުނެއެވެ. އެކަމުގެ މަޝްވަރާތައް ރޫލީއާއި ވިލަރެއާލާއެކު އަޔެކްސްއިން މިހާރު އަންނަނީ ކުރަމުން ކަމަށްވެސް ރިޕޯޓުތައް ބުނެއެވެ. ވިލަރެއާލާއެކު ރޫލީ ވަނީ ޔުއެފާ ޔޫރޮޕާ ލީގު ކާމިޔާބުކޮށްފައެވެ.
ރޫލީ އަންނަނީ 2018 ވަނަ އަހަރުން ފެށިގެން އާޖެންޓީނާގެ ގައުމީ ޓީމަށްވެސް ކުޅެމުންނެވެ. މިހާތަނަށް އޭނާ ގައުމީ ޓީމަށް ކުޅެފައިވަނީ އެންމެ ހަތަރު މެޗެވެ. ރޫލީ ވަނީ އާޖެންޓީނާއާއެކު މިދިޔަ އަހަރު އޮތް ވޯލްޑް ކަޕްވެސް ކާމިޔާބުކޮށްފައެވެ.
