މުޒާހަރާގެ ތެރެއިން ހައްޔަރުކުރުމަށްފަހު ޑރ.މުއިއްޒު ދޫކޮށްލައިފި
މުއިއްޒު ހައްޔަރުކުރުމާއި ގުޅިގެން މާލެ ސިޓީ ކައުންސިލުން ވެސް ވަނީ ބަޔާނެއް ނެރެފައި
މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު
ކުރީގެ ރައީސް އަބްދުﷲ ޔާމީން މިނިވަންކުރުމަށް ގޮވާލާ އިދިކޮޅު ޕީޕީއެމް/ޕީއެންސީން މާލޭގައި ކުރިޔަށްގެންދާ މުޒާހަރާގެތެރެއިން އަންގާރަ ދުވަހުގެ ރޭ ހައްޔަރުކުރި މާލެ ސިޓީގެ މޭޔަރު ޑރ މުހައްމަދު މުއިއްޒު ދޫކޮށްލައިފިއެވެ.
ރައީސް ޔާމީން ޖަލަށް ލުމަށް ހުކުމްކުރުމާއި ގުޅިގެން އިދިކޮޅު ފަރާތްތަކުން ދަނީ ކޮންމެ ރެޔަކު ސިލްސިލާ މުޒާހަރާތަކެއް ބާއްވަމުންނެވެ. އަދި މިމުޒާހަރާތަކުގައި ކޮންމެ ރެޔަކުވެސް މީހުން ހައްޔަރުކުރަމުންދާކަން ފާހަގަކޮށްލެވެއެވެ. ނަމަވެސް މިއީ މުޒާހަރާއަކުން މުއިއްޒު ހައްޔަރުކުރި ފުރަތަމަ ފަހަރެވެ.
މުއިއްޒު ހައްޔަރުކުރުމާއި ގުޅިގެން މާލެ ސިޓީ ކައުންސިލުން ވެސް ވަނީ އެކަން ކުށްވެރިކޮށް ނޫސް ބަޔާނެއް ނެރެފައެވެ. އެބަޔާނުގައި ބުނެފައިވަނީ ގާނޫނު އަސާސީން ލިބިދޭ ޚިޔާލުފާޅުކުރުމުގެ މިނިވަންކަމުގެ ދަށުން ޕީޕީއެމް/ޕީއެންސީ ކޯލިޝަނުން ކުރިޔަށްގެންދިޔަ ޝުއޫރުފާޅުކުރުމުގެ ތެރެއިން މޭޔަރު ހައްޔަރުކޮށްފައިވާކަމަށް ބުނެ މުއިއްޒު ދޫކޮށްލުމަށް ވަނީ ގޮވާލާފައެވެ.
ރައީސް ޔާމީނަށް 11 އަހަރުގެ ޖަލު ހުކުމެއް ކްރިމިނަލް ކޯޓުން އިއްވީ ވ. އާރަށުގެ މައްސަލައިގައި ޔާމީންގެ މައްޗަށް އުފުލާފައިވާ މަނީ ލޯންޑްރިންގެ ދައުވާ އާއި ރިޝްވަތު ހިފުމުގެ ކުށުގެ ދައުވާ އެމަނިކުފާނުގެ މައްޗަށް ސާބިތުވުމުންނެވެ.
