މިވަގުތަށް އޮޕަރޭޝަން ނިންމާލިނަމަވެސް އެސަރަހައްދުގައި ތެޔޮ ހުރިތޯ އަދިވެސް ބަލާނެ: އެމްއެންޑީއެފް
3 ޖެނުއަރީ 2023 | އަންގާރަ 17:52ފަޅުތެރެއަށް އެޅިފައިވާ ކަޅުތެޔޮ ސާފުކުރުމަށް ފެށި އޮޕަރޭޝަން މިވަގުތަށް ވަނީ ނިންމާލާފައި
ފަޅުތެރެއަށް އެޅުނު ތެޔޮ ނެގުމުގެ މަސައްކަތްކުރަނީ
އެމްއެންޑީއެފް ކޯސްޓްގާޑް އޮއިލް ރެސްޕޮންސް ޓީމާއި މާލޭ އޭރިއާ ސިފައިން ގުޅިގެން, ރަސްމީ ފާލަމާ ދިމާއިން ފަޅުތެރެއަށް އެޅިފައިވާ ކަޅުތެޔޮ އެސަރަހައްދުން ނަގައި ނިންމާލިނަމަވެސް، އަދިވެސް އެސަރަހައްދުގައި ތެޔޮ ހުރިތޯ ބަލަމުންދާނެކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން ބުނީ އެސަރަހައްދަށް އެޅުނު ތެޔޮ ނަގައި އެއްކޮށް ނިންމާލީ އަންގާރަ ދުވަހުގެ މެންދުރު 13:35 ހާއިރުކަމަށެވެ. އެކަމާގުޅޭގޮތުން "ރާއްޖެއެމްވީ"ން ސުވާލުކުރުމުން އެމްއެންޑީއެފްގެ މީޑިޔާ އޮފިޝަލް ވިދާޅުވީ، ފަޅުތެރެއަށް އެޅިފައިވާ ކަޅުތެޔޮ ސާފުކުރުމަށް ފެށި އޮޕަރޭޝަން މިވަގުތަށް ނިމުނީކަމަށެވެ. ނަމަވެސް އަދިވެސް އެސަރަހައްދަށް ތެޔޮ ވަދޭތޯ ބަލަމުން ދާނެކަމަށާއި، އެގޮތުން ބުދަ ދުވަހުވެސް ތެޔޮ ނެގުމުގެ ކަންކަން ކުރިޔަށްގެންދާނެކަމަށެވެ.
އެ ސަރަހައްދަށް ކަޅުތެޔޮ އެޅިފައިވާކަމުގެ މައުލޫމާތު މެރިޓައިމް ރެސްކިޔު ކޯޑިނޭޝަން ސެންޓަރު، އެމް.އާރް.ސީ.ސީއަށް ލިބިފައިވަނީ މިދިޔަ އާދިއްތަ ދުވަހުގެ ހެނދުނު 09:10 ހާއިރު ކަމަށް އެމްއެންޑީއެފުން ބުނެއެވެ. އެމްއެންޑީއެފުން ކުރިން ލަފާކޮށްފައިވަނީ އެސަރަހައްދަށް 1000 ލީޓަރުގެ ކަޅުތެޔޮ އެޅިފައިވާކަމަށެވެ. އެމްއެންޑީއެފުން ކުރި ޓްވީޓްގައި ބުނެފައިވަނީ މިހާތަނަށް 15 ފީފާ ތެޔޮ ނެގިފައިވާކަމަށެވެ.
ތެޔޮ ސާފުކުރުމުގެ މަސައްކަތުގައި ކޯސްޓްގާޑްގެ ޑައިވަރުންނާއި އޮއިލް ޕޮލިއުޝަން ރެސްޕޮންސް ޓީމަށް އެހީތެރިކަން ފޯރުކޮށްދިނުމަށް، އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަނާއި މާލޭ އޭރިއާ މެރީންސްއާއި، މެރިން ޕޮލިސްގެ އިތުރުން، މާލޭ ސިޓީ ކައުންސިލުން ހަރަކާތްތެރިވި ކަމަށް އެމްއެންޑީއެފުން ވަނީ ބުނެފައެވެ.
އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ)އިން ވަނީ އެ ސަރަހައްދަށް ތެޔޮއެޅިފައިވަނީ ކިހިނެއްތޯ ބެލުމުގެ މަސައްކަތް ކުރަމުންދާކަމަށް ބުނެފައެވެ.
