ކުރީ ސަރުކާރުގައި އެޗްޑީސީ ތެރެއިން އުސޫލުތަކާ ޚިލާފު އެތައް ކަމެއް ހިންގާފައިވޭ: އޮޑިޓް

ނިމިދިޔަ ސަރުކާރުގައި ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ތެރެއިން އުސޫލުތަކާ ޚިލާފަށް އެތައް ކަމެއް ހިންގާފައިވާކަން ހާމަވެއްޖެއެވެ.

މިކަން ހާމަވެފައިވަނީ އޮޑިޓަރ ޖެނެރަލް އޮފީހުން އާންމުކޮށްފައިވާ އޮޑިޓް ރިޕޯޓުގައެވެ. މި އޮޑިޓުގައި 2017 ވަނަ އަހަރުން 2018 ވަނަ އަހަރުގެ ނިޔަލަށް އެޗްޑީސީން މުދަލާއި ޚިދުމަތް ހޯދުމުގައި އަމަލުކޮށްފައިވާ ގޮތާއި، އެ މުއްދަތުގައި ކުންފުނީގެ ކޭޝް ފްލޯ ދަށްވުމަށް މެދުވެރިވި ސަބަބުތައް ބަލާފައިވެއެވެ. މިގޮތުން މި އޮޑިޓުގައި މުދަލާއި ޚިދުމަތް ހޯދުމުގައި ކުންފުނީގެ ޕްރޮކިއުމަންޓް ޕޮލިސީއާ އެއްގޮތަށް އަމަލުކޮށްފައިވޭތޯއާއި، ކުންފުނީގެ ވަސީލަތްތައް ބޭނުންކޮށްފައިވަނީ ކުންފުނީގެ މަގުސަދުތައް ހާސިލްކުރުމަށް ކަނޑައަޅާފައިވާ އުސޫލުތަކާ އެއްގޮތަށްތޯ ބެލުމާއި، ކުންފުންޏަށް ދިމާވެފައިވާ ކޭޝް ފްލޯގެ މައްސަލަތައް މެދުވެރިވާން ދިމާވި ސަބަބުތައް ދެނެގަތުން ހިމެނެއެވެ.

Advertisement

އޮޑިޓް ރިޕޯޓުގައި ވާގޮތުން އެޗްޑީސީއަށް މުވައްޒަފުން ހޯދުމުގައި އެކުންފުނިން އާންމުގޮތެއްގައި އަމަލުކުރަމުން އަންނަ އުސޫލުތަކާ ޚިލާފަށް 2018 ވަނަ އަހަރުގެ ތެރޭގައި އާންމުކޮށް އިއުލާނު ނުކޮށް 131 މީހުންނަށް ވަޒީފާ ދީފައިވެއެވެ. އެ މީހުންނަސް ވަޒީފާ ދިނުމުގައި ކުންފުނީގެ އަތްމަތީ ފޮތުގައި ބަޔާންކޮށްފައިވާ ބެކްގްރައުންށް ޗެކާއި ރިފަރެންސް ޗެކް ހަދާފައިނުވާކަމަށާއި، މުވައްޒަފުން ހޮވުމުގައި އިންޓަރވިއު ޕްރޮސެސް ހަރުދަނާގޮތެއްގައި ކުރިއަށް ގެންގޮސްފައިނުވާކަމަށްވެސް ރިޕޯޓުގައިވެއެވެ. އަދި އެޗްޑީސީގެ ބޯޑުން ފާސްކޮށްފައިވާ ގޮތާ ޚިލާފަށް މުވައްޒަފުން ނަގާފައިވުމާއި، މުވައްޒަފުން އިތުރުކުރުމަށް އެޗްޑީސީގެ އެއްވެސް ޑިޕާޓްމެންޓަކުން އެދިފައިވާކަމުގެ ލިޔެކިޔުން ނެތި މުވައްޒަފުން ނަގާފައިވާކަމަށްވެސް އެޗްޑީސީން ފާހަގަކޮށްފައިވެއެވެ.

މީގެ އިތުރުން އެޗްޑީސީން ކުރިއަށްގެންގޮސްފައިވާ ހިޔާވަހި މަޝްރޫއަށް ކުންފުނީގެ ކޭޝް ފްލޯއިން ޖުމްލަ 193.7 މިލިއަން ރުފިޔާ ޚަރަދު ކުރުމުގެ ސަބަބުން ކުންފުނީގެ ކޭޝަން ފްލޯއަށް ނޭދެވޭ އަސަރުކޮށްފައިވާކަމަށް އޮޑިޓް އޮފީހުން ބުނެފައިވެއެވެ. މީގެ ސަބަބުން އެ ކުންފުނިން ހިންގުމަށް ކަނޑައަޅާފައިވާ ޕްރޮޖެކްޓުތައް ހިންގުމަށް ބޭނުންވާ ފައިސާ ހޯދުމަށް ވަނީ ދަތިވެފައެވެ.

2018 ވަނަ އަހަރުގެ ޖުލައި އަދި އޮގަސްޓު މަހުގެ ތެރޭގައި ހުޅުމާލޭ ޔޫތިު ސިޓީ ޕްރޮމޯޓުކުރުމުގެ ނަމުގައި އެޗްޑިސީން ޚަރަދުކޮށްގެން ހަދާފައިވާ ޕޯސްޓަރުތަކަކީ ހުޅުމާލޭ ޔޫތު ސިޓީ ޕްރޮމޯޓްކުރުމަށް ކޮށްފައިވާ ޚަރަދަކަށްވުރެ ބޮޑަށް އެޗްޑީސީގެ މަސައްކަތްކަކާ ގުޅުމެއް ނެތް ހަރަކާތްތަކަކަށް ކޮށްފައިވާ ޚަރަދެއްކަމަސް ފާހަގަވެފައިވާކަމަށް އޮޑިޓް އޮފީހުން ވަނީ ބުނެފައެވެ.

މީގެ އިތުރުން އެޗްޑީސީގެ ބެލުމުގެ ދަށުގައި ހުރި މުހައްމަދު ގާސިމް ޕްރީސްކޫލްގެ ބެލެހެއްޓުން 2 ޖުލައި 2018 އިން 1 ނޮވެމްބަރު 2018 ގެ ނިޔަލަށް އަމިއްލަ ފަރާތަކާ ހަވާލުކުރި މުއްދަތުގައި އެތަނުގައި ހިންގި ބައެއް ހަރަކާތްތަކުގައި އެވްޑީސީގެ މުވައްޒަފުންނާއި އެ ކުންފުނީގެ ބައެއް ވަސީލަތް  ބޭނުންކޮށްފައިވާކަން ވަނީ ފާހަގަކޮށްފައެވެ.

އޮޑިޓް އޮފީހުން ބުނީ ހުޅުމާލޭގައި މަގުބައްތި ހަރުކުރުމުގެ މަސައްކަތް ކުރުމަށް އެތަކެތި ސަޕްލައިކުރާ ރާއްޖެއިން ބޭރުގެ ކުންފުންޏަކާ 26.9 މިލިއަން ރުފިޔާއަށް އެ މަސައްކަތް ހަވާލުކުރީ ވާދަވެރި ބީލަމަކަށް ހުޅުވާލައިގެންނެއް ނޫން ކަމަށެވެ. މަގުބައްތި ހަރުކުރުމަށް ބޭނުންވާ ތަކެތި ގަންނަން ވެފައިވާ އެއްބަސްވުމުގައިވެސް މަގުބައްތި ހަރުކުރުމުގެ މަސައްކަތް އެ ކުންފުންޏާ ހަވާލުކުރުމާ ގުޅޭ އެއްވެސް މާއްދާއެއް ހިމަނާފައިނުވާކަމަށާއި، މަގު ބައްތި ހަރުކުރުމުގެ މަސައްކަތް ސިންގަލް ސޯސް އުސޫލުން ހަވާލުކޮށްފައިވަނީ އެކަށީގެންވާ ސަބަބެއް މެދުވެރިވެގެން ނޫންކަން ފާހަގަވެފައިވާކަމަށް އޮޑިޓް އޮފީހުން ބުނެފައިވެއެވެ.

ހުޅުމާލޭގައި ވޯޓަރ ތީމް ޕާކު ތަރައްގީކުރުމަށް ކަނޑައަޅާފައިވާ ސަރަހައްދު ސާފުކޮށް ހުސްކުރުމަށް ސިންގަލް ސޯސް އުސޫލުން އެޗްޑީސީގެ ޕްރޮކިއުމެންޓް އުސޫލާ ޚިލާފަށް އަމިއްލަ ކުންފުންޏަކާ ހަވާލުކޮށް އެ ކުންފުނިން ކުރި މަސައްކަތުގެ އަގުގެ ގޮތުގައި 18.04 މިލިއަން ރުފިޔާ ދީފައިވާކަމަށް ފާހަގަވިކަމަށް އޮޑިޓް ރިޕޯޓުގައިވެއެވެ. އަދި މަސައްކަތް ނިންމަން ދިން މުއްދަތުގެ ތެރޭގައި މަސައްކަތް ނިންމާފައި ނުވާތީ އިތުރު މުއްދަތު ދީ، އިތުރަށް 6.87 މިލިއަން ރުފިޔާ ދީފައިވާކަން ހާމަވެފައިވާކަމަށް އެޗްޑީސީން ބުނެފައިވެއެވެ.

އޮޑިޓް އޮފީހުން ވަނީ މިކަންކަމާ ގުޅިގެން އަޅާނެ ފިޔަވަޅުތަކާ ގުޅޭގޮތުން އެޗްޑީސީއަށް ލަފާދީފައެވެ.