އިނގިރޭސި ޕްރިމިއާ ލީގުގައި ބްރެންޓްފޯޑު އަތުން ބަލިވެ ގަދަ ފަހަކަށް ޖެހިލަން ލިބުނު ފުރުސަތު ލިވަޕޫލުން ނަގާލައިފި އެވެ.

ހޯމަ ދުވަހުގެ ރޭ ބްރެންޓްފޯޑުގެ ދަނޑުގައި ކުޅުނު މެޗުން ލިވަޕޫލް ބަލިވީ 3-1 އިންނެވެ. މިއީ 1938 ވަނަ އަހަރުގެ ފަހުން ބްރެންޓްފޯޑު އަތުން ލިވަޕޫލް ބަލިވި ފުރަތަމަ ފަހަރެވެ.

މެޗުގައި ފުރަތަމަ ލަނޑު ޖަހައި ލީޑު ނެގީ ބްރެންޓްފޯޑުންނެވެ. މެޗުގައި އެ ޓީމަށް ލީޑު ލިބުނީ ލިވަޕޫލްގެ ޑިފެންޑަރު އިބްރާހިމާ ކޮނާޓޭގެ އަތުން 19 ވަނަ މިނެޓުގައި ބައިކޮޅަށް ވަން ލަނޑުންނެވެ. އޭގެ ފަހުން މެޗުގެ 39 ވަނަ މިނެޓުގައި ބްރެންޓްފޯޑުގެ ފޯވާޑު ޔޯން ވިސާ ވަނީ ލަނޑެއް ޖަހައި އެ ޓީމަށް ލީޑު ފުޅާކޮށްދީފަ އެވެ. ނަމަވެސް ލަނޑު ޖެހި ވަގުތު އޭނާ އޮފްސައިޑުގައި ހުރުމުން ރެފްރީ ވަނީ ލަނޑު ބަަލައިނުގަތުމަށް ނިންމާފަ އެވެ. އޭގެ ތިން މިނެޓު ފަހުން އޭނާ ވަނީ ދެ ވަނަ ލަނޑު ޖަހައި، ލީޑު ފުޅާކޮށްދީފަ އެވެ. އެ ލަނޑު އޭނާ ޖެހީ މިޑްފީލްޑަރު މަތިއަސް ޖެންސަން ތަނަވަސްކޮށްދިން ފުރުސަތަކުންނެވެ. ފުރަތަމަ ހާފު ނިމުނީ ދެ ލަނޑުން ބްރެންޓްފޯޑު ކުރީގައި އޮވެގެންނެވެ.

ދެ ވަނަ ހާފަށް ނުކުމެ ލިވަޕޫލްގެ އުރުގުއޭ ފޯވާޑް ޑާވިން ނޫނޭޒް ވަނީ ލަނޑެއް ޖަހައިފަ އެވެ. ދެ ވަނަ ހާފު ފަށައިގެން ތިން ވަނަ މިނެޓުގައި އޭނާ ޖެހި ލަނޑު ބަލައިނުގަންނަން ވީއޭއާރުން ވަނީ ނިންމާފަ އެވެ. މި މެޗުގައި ވެސް ނޫނޭޒް އަށް ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބިފަ އެވެ. އޭގެ ދެ މިނެޓު ފަހުން ލިވަޕޫލްގެ ފުރަތަމަ ލަނޑު ޖަހައި، އުންމީދު ހޯދައިދިނީ އެލެކްސް އޮކްސްލެޑް ޗެމްބަލިން އެވެ. އެ ލަނޑު އޭނާ ޖެހީ ޑިފެންޑަރު ޓްރެންޓް އެލެކްސެންޑާ އާނޯލްޑް ތަނަވަސްކޮށްދިން ފުރުސަތަކުންނެވެ. އެ ލަނޑަށްފަހު ނަތީޖާ ހަމަހަމަކުރުމަށް ލިވަޕޫލުން މަސައްކަތް ކުރަމުން ދަނިކޮށް، ބްރެންޓްފޯޑުން ވަނީ ތިން ވަނަ ލަނޑެއް ޖަހައިފަ އެވެ. މެޗުގެ 85 ވަނަ މިނެޓުގައި ލަނޑު ޖެހީ ބްރަޔަން އެމްބެއުމޯ އެވެ.

މެޗުން ބަލިވެ ލިވަޕޫލް އޮތީ ތާވަލްގެ ހަ ވަނަ މަގާމުގަ އެވެ. އެއީ ކުޅުނު 17 މެޗުން 28 ޕޮއިންޓާއެކު އެވެ. ފަސް ވަނައިގައި އޮތް ޓޮޓެންހަމަށް ލިބެނީ 30 ޕޮއިންޓެވެ. ލިވަޕޫލް އަތުން މޮޅުވި ބްރެންޓްފޯޑު އޮތީ 18 މެޗުން 26 ޕޮއިންޓާއެކު ހަތް ވަނައިގަ އެވެ.