މި ޖެނުއަރީ މަހުގެ 28 ވަނަ ދުވަހު އޮންނަ އެމްޑީޕީގެ ރިޔާސީ ޕްރައިމަރީ އާ ގުޅޭގޮތުން ޕްރައިމަރީގައި ވާދަކުރައްވާ އެއް ކެންޑިޑޭޓްކަމުގައިވާ ރައީސް މުހައްމަދު ނަޝީދުގެ ފަރާތްޕުޅުން މައިގަނޑު ހަތަރު މައްސަލައެއް ހުށަހަޅުއްވައިފިއެވެ.
ފުރަތަމަ ކަމެއްގެ ގޮތުގައި ފާހަގަ ކުރައްވާފައިވަނީ އިނގިލީގެ ނިޝާންޖެހި މެމްބަރޝިޕް ފޯމެއް ނެތިގެންކަމަށާއި އެހެން ޕާޓީއެއްގައި ނަން އޮވެގެންކަމަށް ބުނެ އެމްޑީޕީގެ 39،398 މެމްބަރުން (ޕާޓީގެ ދަފްތަރުގެ %42) މެމްބަރުން ޕާޓީގެ ދަފުތަރުން އުނިކޮށްފައި އޮތުމެވެ. މިއީ ރައީސް ނަޝީދަށް ވޯޓުދިނުން އެންމެ ގާތް މެމްބަރުންގެ ވޯޓުލުމުގެ ހައްގު ނިގުޅައިގަތުމަށް ހިންގާފައިވާ ނާއިންސާފު އަދި ހީލަތްތެރި އަމަލެއްކަމަށާއި މިއީ ބަލައިގަނެވޭނެ ކަމެއް ނޫންކަމަށް ނަޝީދުގެ ކެމްޕެއިން ޓީމުން ވަނީ ބުނެފައެވެ.
މިނިވަން އިންސާފުވެރި ރިޔާސީ ޕްރައިމަރީއަކަށް ގޮވާލާ ނަޝީދު ހުށަހެޅުއްވި މިބަޔާނުގައި ވަނީ މާފަހުން އެކުލަވާލާ ޝަރުތުތަކެއް މާއިހުއްސުރެ އެމްޑީޕީއަށް ސޮއިކޮށްގެން ތިބި ޕާޓީގެ އެންމެ ސީނިއަރ މެމްބަރުންގެ މައްޗަށް ތަންފީޒުކުރުމަކީ ބުއްދީގެ މަގުންވެސް އަދި ގާނޫނުގެ ދަށުންވެސް ބަލައިގަނެވޭނެ ކަމެއް ނޫންކަމަށާއި އެހެންކަމުން ގަނޑުކޮށް އުނިކުރި މެމްބަރުންގެ މެމްބަރޝިޕް އިޔާދަކޮށް އެމެމްބަރުންގެ ސިޔާސީ-މަދަނީ ހައްގުތައް ހިމާޔަތްވާނެ މަގުން އިންތިޚާބުގައި ވޯޓުލުމުގެ ފުރުސަތު ދިނުމަށް ޕާޓީގެ ޗެއާ ޕާސަން އާއި އިސް އޮފިޝަލުންގެ މައްޗަށް ގޮވާލާކަމަށެވެ.
ރިޔާސީ ޕްރައިމަރީގެ ކަންކަން އިންތިޒާމުކުރުމަށް އެމްޑީޕީގެ ގައުމީ މަޖިލީހުން އެކުލަވާލާފައިވާ 5 މެމްބަރުންގެ އިންތިޚާބީ ކޮމިޓީން ހޯމަ ދުވަހު އެމްޑީޕީ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޓީގެ މެމްބަރުން އިބްރާހީމް ވަހީދު (އިބުރޭ)ވިދާޅުވީ ނަޝީދުގެ ގާތް ބޭފުޅުންނާއި ނަޝީދަށް ތާއީދުކުރާ މެމްބަރުން ޕާޓީން ވަކިކުރިކަމަށް ގަބޫލުނުކުރައްވާކަމަށެވެ. 39،000 މެމްބަރުންގެ ތެރޭގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ އެއްބަނޑު އެއްބަފާ ބޭބޭފުޅުންވެސް ހިމެނޭކަމަށާއި އެބޭފުޅުން ޕާޓީން ކެނޑިފައި އޮތުމުން އަލުން ޕާޓީއަށް ރަޖިސްޓްރީވީ ކަމަށް އިބުރޭ ވިދާޅުވިއެވެ.
އެމްޑީޕީގެ ދަފްތަރުން 39،000 މެމްބަރުން ވަކިކުރި މައްސަލަ ފެންމަތިވެފައިވަނީ މިދިޔަ އަހަރުގެ މެއި މަހުގެ ތެރޭގައި އެމްޑީޕީގެ ގައުމީ މަޖިލީހުން އީސީގެ އެމްޑީޕީގެ ދަފުތަރުގައި ނެތް މެމްބަރުންނަކީ އެމްޑީޕީގެ މެމްބަރުން ނޫންކަމަށް ނިންމި ހިސާބުންނެވެ. އެއާއެކު އެމްޑީޕީން ގެންގުޅުނު ޕާޓީގެ ލިސްޓުން 39000ށް ވުރެ ގިނަ މެމްބަރުން ވަނީ އުނިވެފައެވެ. އިބުރޭ ވިދާޅުވީ އޭގެތެރެއިން 18،000ށް ވުރެ ގިނަ މެމްބަރުންނަކީ އެހެން ޕާޓީތަކުގެ ދަފުތަރުގައި ތިބި މެމްބަރުންކަމަށެވެ.
އެގަރާރު ހުރިހާ އެމްޕީން ނަށާއި ދާއިރާގެ ރައީސުންނަށް ގަރާރު ގައުމީ މަޖިލީހަށް ހުހެޅުމުގެ ކުރިން ޕާޓީގެ މެމްބަރ ޝިޕް ސައްހަ ކުރަން ހުރިހާ ދާއިރާގެ އެމްޕީންނަށް ކާކުކަމާއި އައިޑީކާޑު ނަންބަރާއި އެޑްރަހާއި ލިސްޓު ހަދާފައި ދިނިން. މި މީހުންނަށޭ އަސަރުކުރާނީ. އެއީ މެއި 29ގެ ކުރިން ކޮށްފައިއޮތް ކަމެއް. ޕާޓީގެ އަސާސީ ގަވާއިދުގެ 19 ވަނަ މާއްދާގައި ބުނޭ ޕާޓީގެ މެމްބަރުކަން ބާތިލްވާނެ ސަބަބުތަކެއް . އޭގައި މިބުނަނީ އެހެން ސިޔާސީ ޕާޓީއެއްގައި ބައިވެރިވުން، އެހެން ސިޔާސީ ޕާޓީއެއްގައި ހަރަކާތްތެރިވުން. އެ 39000 މީހުންގެ ތެރޭގައި 18000ށް ވުރެ ގިނަ މީހުންނަކީ އެހެން ޕާޓީތަކުގެ ދަފްތަރުގައި ރަޖިސްޓްރީ ގައި އޮތް މީހުން. އެހެންވީމާ ޕާޓީގެ އަސާސީ ގަވާއިދު ބުނާގޮތުން އެއޮތީ މެމްބަރޝިޕް ބާތިލުވެފައި. އޭގައި ކުރެވޭނެ އިތުރު ކަމެއްނެތް.ކޮމިޓީގެ މެމްބަރ އިބްރާހީމް ވަހީދު (އިބުރޭ)
ޕާޓީގެ ދަފުތަރަށް މިބަދަލު ގެނައީ އެންމެ ޞައްހަ ވޯޓާސް ލިސްޓެއް ބޭއްވުމަށްކަމަށާއި އޭރު އެބަދަލު ގެނެސް ޕާޓީއަށް ވަނުމަށް ތިންމަސް ދުވަސް މެމްބަރުންނަށް ދިންކަމަށް ކޮމިޓީ މެމްބަރުން ވިދާޅުވިއެވެ. އެމުއްދަތުގެ ތެރޭގައި 5500 މެމްބަރުން އަލުން ޕާޓީއާ ގުޅުނުކަމަށް ވިދާޅުވިއެވެ. މިއީ ނޭންގި ހިނގާފައިވާކަމެއް ނޫންކަމަށާއި ކުއްލިއަކަށް ހިނގާފައިވާކަމެއްވެސް ނޫންކަމަށް އިބުރޭ ވިދާޅުވިއެވެ.
ރައީސް ނަޝީދު ދެވަނަ އަށް ހުށަހަޅުއްވާފައިވާ މައްސަލައަކީ ރިޔާސީ ޕްރައިމަރީގެ އެންމެހައި ކަންކަން އިންތިޒާމުކޮށް ބެލެހެއްޓުމުގެ ޒިންމާ އަސާސީ ގަވާއިދުން ހަވާލުކޮށްފައިވާ ކޮމިޓީ، އަސާސީ ގަވާއިދުގައި ބަޔާންކުރާ ގޮތަށް ގައުމީ މަޖިލީހުން އިންތިޚާބު ކުރުމުގެ ކުރިން ކޮމިޓީން ކުރަންޖެހޭ މަސައްކަތް ކޮންމެވެސް އެހެން ފަރާތަކުންކޮށް، ޕާޓީން އެކަން އިއުލާނުކޮށް ކުރިޔަށް ގެންދިޔުމެވެ. ރައީސް ނަޝީދުގެ ކެމްޕެއިނުން ދެކޭގޮތުގައި އެއީ އަސާސީ ގަވާއިދާ ޚިލާފުކަމެއްކަމަށް ވަނީ ފާހަގަކުރައްވާފައެވެ.
ނޫސްވެރިންގެ ބައްދަލުވުމުގައި އެކަމާއި ގުޅޭގޮތުން ވާހަކަދައްކަމުން އިބުރޭ ވިދާޅުވީ ކޮމިޓީ އެކުލަވާލެވުމާއެކު ކޮމިޓީ ބައްދަލުވުން ބާއްވާ އެންމެ ފުރަތަމަކަމަކަށްވެސް ބެލީ މީގެކުރިން ޕާޓީން އަމަލުކޮށްފައިވާ ގޮތްކަމަށެވެ. 5 މެމްބަރުންގެ ކޮމިޓީއެއް ނަގައިގެން ރިޔާސީ ޕްރައިމަރީއެއްގެ ކަންކަން ކޮށްފައިވަނީ 2013 އަދި 2018 ވަނަ އަހަރުކަމަށާއި 2008 ވަނަ އަހަރުގެ ރިޔާސީ ޕްރައިމަރީ ބޭއްވިއިރު 5 މެމްބަރުންގެ ކޮމިޓީއެއް ނެގުމަށް އަސާސީ ގަވާއިދުގައި ނެތްކަމަށެވެ.
2013 ވަނަ އަހަރު ރިޔާސީ ޕްރައިމަރީ އަށް އިއުލާންކުރެއްވީ އޭރުގެ ޗެއާޕާސަން މާރިޔާ އަހުމަދު ދީދީ ކަމަށާއި ޕްރައިމަރީ އޮންނާނެކަމާއި އޮންނާނެ ދުވަސް އިއުލާންކުރެއްވީ މާރިޔާ ކަމަށެވެ. އޭގެފަހުން އޮތް ގައުމީ މަޖިލީހެއްގައި ފަސް މެމްބަރުންގެ ކޮމިޓީއެއް ނެގުމަށް ފާސްވިކަމަށާއި ނަމަވެސް އޭރު އޮންނަނީ ޕްރައިމަރީ ބާއްވާނެ ދުވަސް އިއުލާންކޮށްފައި ކަމަށެވެ.
އޭގެފަހުން 2018 ވަނަ އަހަރު ޕްރައިމަރީ ބާއްވަން އިއުލާންކުރެއްވީ އޭރު ޗެއާޕާސަން އަކަށް ހުންނެވި ހަސަން ލަތީފުކަމަށް އިބުރޭ ވިދާޅުވިއެވެ.
2018 ވަނަ އަހަރު ކަން ހިނގާފައިވަނީ 2018 ވަނަ އަހަރު ޖެނުއަރީ 1 ވަނަ ދުވަހު އޭރުގެ ޗެއާޕާސަން ހަސަން ލަތީފގް މާބުލް ހޮޓެލްގައި ޕްރެސް އެއް ބާއްވަނީ. މިވަގުތުވެސް ޕާޓީގެ ފޭސްބުކް ޕޭޖުގައި އެ ފެންނަން އެބަހުރި. އެޕްރެސް ކޮންފެރެންސްގައި ހަސަން ލަތީފް އިއުލާންކުރައްވަނީ މަރޗް މަހު ޕްރައިމަރީއަށް ހުޅުވާލާ ވާހަކަ. އޭޕްރީލް މަހު އިންތިޚާބު އޮންނާނެ ވާހަކަ ހުރިހާ ކަމެއް. އިއުލާންކޮށްފައި އެއަހަރަކު ނެތް 5 މެމްބަރުން ކޮމިޓީ ނަގާފައެއް .އެހެންވީމާ އަޅުގަނޑުމެންނަށް އެނގޭ 5 މެމްބަރުންގެ ކޮމިޓީ ނެގުމުގެ ކުރިން މިކަން މިގޮތަށް ކުރެވިފައި، ކުރޭކަން އަދި ކޮށްފައިވެސް ވާކަން. އެއުސޫލުން ފާހަގަވީ މިކޮމިޓީން ކުރަންޖެހޭ ކަމެއް އެހެން ފަރާތަކުން ކޮށްފައިނެތްކަން. އެހެންވެ އެގޮތަށް މަސައްކަތްތައް ކުރިޔަށްގެންދިޔައީ. އޭގެފަގުން ބައްދަލުވުންތައް ބާއްވާ އެހެން ކަންކަންކުރަމުން މިދަނީ.ކޮމިޓީގެ މެމްބަރ އިބްރާހީމް ވަހީދު (އިބުރޭ)
ތިން ވަނަ މައްސަލައެއްގެ ގޮތުގައި ނަޝީދުގެ ކެމްޕެއިން ޓީމުން ފާހަގަކުރައްވާފައިވަނީ 18 ޑިސެމްބަރ 2022 ގައި ރިޔާސީ ޕްރައިމަރީ އިއުލާންކޮށްފައިވާއިރު، "ރިޔާސީ ޕްރައިމަރީގައި ވާދަކުރާ ކެންޑިޑޭޓުންނަށް ތާއީދު ހޯދުމަށް ފުރަންޖެހޭ ފޯމު" އެތާރީޚުގެ މާކުރިން ވާދަވެރި ކެންޑިޑޭޓް، ރައީސް އިބްރާހީމް މުހައްމަދު ޞާލިހުގެ ކެމްޕެއިން ޓީމަށް ލިބި އެމުއްދަތުގައި ތާއީދު ފޯމުތައް ފުރަމުން ގެންގޮސްފައިވުމެވެ. އެގޮތުން 5 ޑިސެމްބަރ 2022ގެ މާ ކުރިއްސުރެ ކެމްޕެއިން އިސް ހަރަކާތްތެރިން ތާއީދު ފޯމުފުރާކަމުގެ ސޯޝަލް މީޑިޔާ ޕޯސްޓެއް ފޮޓޯއާއެކު އާންމުކޮށްފައިވެއެވެ.
މިކަން މިހައި ހާމަކަން ބޮޑުކޮށް ކުރުމުންވެސް، އެކަން ހިންގާފައިވާ ފަރާތްތައް ދެނެގަނެ އެފަރާތްތަކާމެދު އެއްވެސް ފިޔަވަޅެއް އަޅާފައި ނެތުމުން އެނގެނީ، ހިނގަމުންދާ ޕްރައިމަރީގެ މަސައްކަތުގައި އިންސާފުވެރިކަން ގެއްލިފައިވާ މިންވަރުކަމަށް ނަޝީދުގެ ކެމްޕެއިން ޓީމުން ވަނީ ފާހަގަކޮށްފައެވެ.
މިމައްސަލައާ ގުޅޭގޮތުން ވާހަކަދައްކަވަމުން އިބުރޭ ވިދާޅުވީ ދެ ކެންޑިޑޭޓުންނަށްވެސް ތާއީދު ފޯމު ޑިސެމްބަރ 1 ވަނަ ދުވަހު ދީފައިވާކަމަށެވެ. އެހެންކަމުން ޑިސެމްބަރ 5 ވަނަ ދުވަހު ފޯމު ފުރަން އުޅުން އެއީ މައްސަލައެއްގެ ގޮތުގައި ނުދެކޭކަމަށެވެ.
ހަތަރު ވަނަ މައްސަލައެއްގެ ގޮތުގައި ރައީސް ނަޝީދުގެ ކެމްޕެއިން ޓީމުން ފާހަގަކޮށްފައިވަނީ ރިޔާސީ އިންތިޚާބުގެ ޕްރައިމަރީގައި ވޯޓުލެވޭނެ ކަމަށް ޕާޓީން ކަނޑައަޅާފައިވަނީ އިލެކްޝަންސް ކޮމިޝަންގެ ދަފުތަރުގައި ހިމެނޭ ޕާޓީގެ މެމްބަރުން އެކަނި ކަމަށެވެ. އެގޮތުން ޕާޓީގެ ނިންމުމަކީ ރިޔާސީ ޕްރައިމަރީއަށް ކުރިމަތިލުމަށް ހުޅުވާލި ތާރީޚުކަމުގައިވާ 18 ޑިސެމްވަރ 2022 އާ ހަމައަށް ޕާޓީގެ މެމްބަރުންގެ ގޮތުގައި ރަޖިސްޓްރީވެފައިވާ މެމްބަރުންނަށްކަމަށެވެ.
އެހެންނަމަވެސް އެތާރީޚުގައި އީސީގެ ދަފުތަރުގައި ނުހިމެނޭ 457 މީހަކު އެމްޑީޕީގެ ދަފުތަރުގައި ހިމަނާފައިވާކަމަށާއި އެހެންކަމުން ގަބޫލުކުރެވެނީ އެމީސް މީހުން ދަފުތަރުގައި ހިމަނާފައިވަނީ ވާދަވެރި ކެންޑިޑޭޓަށް ނާޖާއިޒް ފައިދާ ހޯދާ ދިނުމުގެ ބޭނުމުގައި ކަމަށެވެ.
މިކަމަށް ޖަވާބު ދެއްވަމުން އިބުރޭ ވިދާޅުވީ މިމައްސަލައަށް ރިއާޔަތްކުރުމަށްފަހު ނިންމާފައިވަނީ ޑިސެމްބަރ 18 ވަނަ ދުވަހާ ހަމައަށް އީސީގެ ދަފުތަރުގައިނެތް މީހުން ދާއިމީ ލިސްޓަށް ނުލާ ގޮތަށްކަމަށެވެ.
އެމައްސަލަ ބެލީ ޝަކުވާ ކޮމިޓީން. މީގެ ކުރިން އަމަލުކުރާ ގޮތުން ވިއްޔާ ޕާޓީއަށް ފޯމު ލިބުނީމާ ޕާޓީން އީސީއަށް ހުށަހެޅީމާ ދަފްތަރު ކޮށްދޭ. ނަމަވެސް މިހާރު އީސީއަށް ހުށަހެޅީމާ އީސީން ގެޒެޓްކޮށްފަ، އެއް ހަފުތާ ވަންދެން މީހުންނަށް ޝަކުވާ ހުށަހަޅަން ފުރުސަތު ދީފަ، އޭގެ ފަހުން ޝަކުވާ ނާންނަނަމަ ދަފްތަރުކޮށްދެނީ. އެހެންވެ އެމަރުހަލާއާ ހެދި ލަސްވެފަ އޮތް ކަމެއް. އަދި ނަޝީދުގެ ކެމްޕެއިން ޓީމުން ޝަކުވާކުރުމާ ގުޅިގެން، މިބުނިގޮތަށް ޑިސެމްބަރ 18 ވަނަ ދުވަހާ ހަމައަށް ނެތް މީހުން ދާއިމީ ލިސްޓަށް ނުލާގޮތަށް ނިންމީ. ރައީސް ނަޝީދު ޝަކުވާ ހުށަހެޅުއްވުމާއެކު އީސީގެ ދަފްތަރުގަ ނެތް މީހުންނަށް ނުލެވޭ ގޮތަށް ނިންމާފައިވަނީ.ކޮމިޓީގެ މެމްބަރު އިބްރާހީމް ވަހީދު (އިބުރޭ)
ރައީސް ނަޝީދުގެ ކެމްޕެއިން ޓީމުން ވަނީ ވޯޓާސް ލިސްޓަށް ޝަކުވާ ހުށަހަޅަން ލިބުނު މުއްދަތު ކުޑަކަން ވެސް މީގެކުރިން ފާހަގަކޮށްފައެވެ. އެމްޑީޕީން ހާމަކުރި ވޯޓަރސް ލިސްޓުގައިވާ ގޮތުން 57،714 މީހުންނަށް ވޯޓުލެވޭނެއެވެ.
އެމްޑީޕީގެ ރިޔާސީ ޕްރައިމަރީގެ ޓައިމްލައިން ދައްކާ ގޮތުން ރިޔާސީ ޕްރައިމަރީގެ ފައިނަލް ވޯޓާސް ލިސްޓު އާއްމުކުރާނީ 3 ޖެނުއަރީ 2023 ގައެވެ.
